Naj ichamile:
7
¡Kaw saqꞌalkano jilni hawoj yul haxanhabꞌ,hach iskutzꞌin naj yahaw konhobꞌ!
Haxa habꞌul lahan hakaꞌ chꞌen ome yebꞌ chꞌen uwe
watxꞌebꞌil yu hunu naj kaw helan.
2 Wal hamuxuk, lahan hakaꞌ hunu vaso petan yehi,
nohna yu tzet chijukꞌu.
Haxa hakꞌul, lahan hakaꞌ hunu tenan ixim trigo,
hoyaniko isxumak teꞌ lirio yinh.
3 Haꞌ kabꞌebꞌ hawim, lahan hakaꞌ kakꞌonh yunin noꞌ sajche hun yu ispitzkꞌahi.
4 Haꞌ hanuqꞌ, lahan hakaꞌ torre marfil.
Haxa isbꞌaqꞌ hasat lahan hakaꞌ tanque ay bꞌey Hesbón,
ayko iskawilal pulta Bat-rabim.
Hatxam, lahan hakaꞌ torre ay bꞌey txꞌotxꞌ Líbano,
hakanto yinh konhobꞌ Damasco.
5 Haxa hawiꞌ, lahan hakaꞌ witz carmelo.
Haꞌ xil hawiꞌ lahan hakaꞌ txꞌal txꞌal kajmutzꞌmunhe yet naj rey,
lokankanh istiꞌ yatut naj.
6 ¡Kaw kawla ix hachkanoj, kaw saqꞌal kach jilni,
kaw ochebꞌil hachkanoj!
7 Wal hatel, lahan hakaꞌ yekanh istel teꞌ palmera, haxa hawim,
lahan hakaꞌ hun chayan sat teꞌ palma.
8 Walnihan hakaꞌ tiꞌ: «Chinahtojan yinh iswiꞌ teꞌ palma tiꞌ,
kat wok tzabꞌnojan yinh isqꞌabꞌ teꞌ,» kinchihan.
Lahan hawim hakaꞌ ischayanil sat teꞌ uva; haꞌ xobꞌ hatiꞌ lahan hakaꞌ xuqꞌal sam teꞌ manzan.
9 Hatiꞌ, lahan hakaꞌ teꞌ vino kaw kꞌul,
kaw xayako iskꞌulal chiwabꞌehan.
Kaw labꞌan chꞌayto yul isnuqꞌ naj winaj,
naj ochebꞌil hawu.
Haꞌ vino tuꞌ kaw labꞌan yokto yul kotiꞌ yebꞌ labꞌan yekꞌto yinh jeh.
Ix ixale:
10 Hanintiꞌan yet naj bꞌay kaw ayko wanmahan wehan,
haꞌ winhan kaw chaqꞌkano tzalaho iskꞌul naj.
11 Hach bꞌay kaw ayko wanmatiꞌan, kata,
tonh xolaj tzꞌunubꞌ,
kat jekꞌ hunu aqꞌbꞌal xol isxumakil yul yaldea.
12 Kaw sahabꞌ chonhah yet hekal,
kat kotoh jilno teꞌ uva,
kat jilni tato lanhan iswolni teꞌ yebꞌ ta lanhanxa isxumakli teꞌ.
Chijilni tato lanhan isxumaklipaxo teꞌ granada,
haꞌ tuꞌ xin chintzalahan tawinh.
13 Kaw xuqꞌ yekꞌ sam teꞌ mandrágora,
ha istiꞌ kopulta ayayo sunil teꞌ lobꞌehal.
Hach bꞌay kaw ayko wanmahan,
xaꞌinpohilojan teꞌ lobꞌehal kaw qꞌuwanxa tawet,
yebꞌ teꞌ lobꞌehal lanhanto inbꞌixnilojan.