8
Ayxikꞌa innohan hawehi,ayxikꞌa yinh inmiꞌan chachtxutxwi.
Ta hak tuꞌ chintzꞌohan hatiꞌ yet chachwilnihan yulaj bꞌeh,
yinh hakaꞌ tuꞌ machi mak chibꞌuchwa winhan.
2 Chimkach witojan,
kat kach waniktojan yul yatut inmiꞌan,
chimkin hakuyan,
chimwaqꞌan vino hawukꞌuꞌ yebꞌ yal teꞌ granada.
3 Chawakto hamekqꞌabꞌ yalanh inwiꞌan,
kat kinhalaqꞌnayojan yu hawatxꞌqꞌabꞌ.
Naj ichamile:
4 ¡Hex qꞌopotaj ah konhobꞌ Jerusalén,
taqꞌwekano yu hetiꞌ tato mach cheyilo iswayanh ix bꞌay ayko wanmahan,
wal xin wayojabꞌ ix hakaꞌtikꞌa chiyoche iskꞌul!
Kaw ayko yanma naj ichamile yinh yixal
Ebꞌix qꞌopo chibꞌitni:
5 ¿Mak ix chitit bꞌey txꞌotxꞌ desierto qꞌehaniko yinh iswixikꞌ naj winaj, bꞌay kaw ayko yanma?
Naj ichamile:
Haꞌ yich huneꞌ teꞌ manzan wilojan hawayanh,
haꞌ bꞌey tuꞌ yabꞌe hamiꞌ isyaꞌil iskꞌul yet hapitzkꞌahi.
Ix ixale:
6 Aqꞌinikojan hakaꞌ hunu sello yul hawanma,
ako inbꞌihan yinh haqꞌabꞌ.
Haꞌ mak ayko yanma yinh yetbꞌi,
huneꞌ tuꞌ kaw ay yipalil lahan hakaꞌ kamikal;
haꞌ mak chiyoche yetbꞌi
lahan hakaꞌ bꞌay mujan kamom,
mach chisbꞌejtzo tzet tzabꞌilxayo yu;
hayet ayleko yanma yinh hunun,
lahan hakaꞌ tzaqꞌaqꞌ chiꞌah xaj qꞌaꞌ yinh.a
7 Haꞌ sunil ha haꞌ,
mach chu yaqꞌni tanho haꞌ yanma ayiko yinh hunun,
nitam ishowal haꞌ nime haꞌ chu istanhtzeniloj.
Ta ay hunu mak chiyalte sunil tzet ay yul yatut
selelo yanma huneꞌ mak yinh yetbꞌi,
yinh kaw yeli chiyahlaxkanilto huneꞌ tuꞌ.
Ebꞌnaj nohe:
8 Ay huneꞌ ix nichꞌan janabꞌanh txanto,
maxhto yim ix,
¿tzet wal jutenanh ix tato ay mak chiqꞌanni ix?
9 Tato lahan ix hakaꞌ hunu chꞌen kꞌubꞌ
chimkowatxꞌekanhanh hunu nha yibꞌanh ix,
plata chꞌok yinh.
Ta xin lahan ix hakaꞌ hunu pulta,
chimkopahikojanh teꞌ aqꞌinteꞌ cedro yinh.
Ix ixale:
10 Hanintiꞌan, lahan hinan hakaꞌ chꞌen kꞌubꞌ;
haꞌ wiman,
lahan hakaꞌ torre,
hataxtikꞌa yet kinyilnihan naj yokkano aqꞌankꞌulal yinh wanmahan.
11 Haꞌ yaꞌ Salomón ay huneꞌ istzꞌunubꞌ yaꞌ bꞌay ay teꞌ uva bꞌey Baal-amón;
yaniko yaꞌ yuva tuꞌ istanheꞌ hunteqꞌan ebꞌnaj.
Haxa yet istxonhlaxto sat teꞌ uva tuꞌ,
yinito hunun ebꞌnaj mil melyu plata istoholo teꞌ tet yaꞌ.
12 Huneꞌ tzꞌunubꞌ tuꞌ xin ayko insatajan.
Hach Salomón,
haꞌ chꞌen mil melyu hawet ye chꞌen,
wal chꞌen kabꞌ ciento xin yet ebꞌnaj chitanhen teꞌ uva ye chꞌen.
Hanintiꞌan ay intzꞌunubꞌan, haꞌ ton teꞌ uva.
Naj ichamile:
13 Hach tiꞌ ay ayachiko xol hatzꞌunubꞌ.
Haꞌ ebꞌnaj jetbꞌi chiyabꞌe ebꞌnaj yul hanuqꞌ,
hakinpax tuꞌan chiwochehan wabꞌehan yul hanuqꞌ.
Ix ixale:
14 Titanh yinh anhe hach bꞌay kaw ayko wanmahan,
aqꞌ anhe hakaꞌ noꞌ miꞌe sajche chiꞌekꞌ tꞌujla yinhla istzalanil witz
bꞌay ay te teꞌ kaw xuqꞌ sam.