Hanhechꞌan Komam Jahawil chꞌaqꞌni kolbꞌanile
43
Wal tinanh hak tiꞌ chiyu yalni Komam Jahawil, Komam kach watxꞌen hach Jacob,Komam kach watxꞌen hach Israel: «Mach chaxhxiwi,
yuto haninan kach inkolan, wanikojan habꞌi, wetan hawehi.
2 Hayet chachekꞌ xol ha haꞌ, haninan chinokan hawetbꞌihoj,
hayet chachekꞌto yul haꞌ nime haꞌ, mach chahiqꞌto haꞌ.
Hayet chachekꞌto xol qꞌa qꞌaꞌ mach chaxhtzꞌatoj, mach chitzuji qꞌaꞌ tawinh.
3 Yuto hanin Yahawilintiꞌan, haDiosal wehan, machi istxꞌojal winhan,
haninan haKolomal, xawaqꞌan Egipto, yebꞌ Etiopía yebꞌ Seba haloqꞌbꞌaniloj.
4 Yuto kaw ochebꞌil hach wuhan, kaw ay hawelapno yul insatan, kaw xahan kach wilan,
chiwakojan ebꞌnaj winaj yebꞌ ej konhobꞌ yul isqꞌabꞌ isyaꞌtajil haseleloj, yunhe kach inkolnihan.
5 Mach chaxhxiwi, yuto hanintiꞌan ayinikojan hawetbꞌihoj.
Haꞌ hawuninal pujanto bꞌay chiꞌahilo tzꞌayik yebꞌ bꞌay chito tzꞌayik chiwawtetijan,
kat inkutxbꞌanikojan.
6 Haxa tet ebꞌnaj ay bꞌey yetkꞌulal norte chiwalan tet:
“Aqꞌ meltzoho yuninal Israel, inqꞌanaꞌan,” kinchihan.
Haxa tet ebꞌnaj ay bꞌey yetkꞌulal sur, chiwalaꞌan tet:
“Mach chakach istit ebꞌnaj,
iweti inkꞌaholan yebꞌ inkutzꞌinan ay bꞌey nahat tuꞌ,
bꞌey islahobꞌal sat yibꞌanhqꞌinal tiꞌ,” kinchihan.
7 Sunil ebꞌnaj tuꞌ ayko inbꞌihan yinh, inwatxꞌehan ebꞌnaj,
waqꞌ pitzkꞌahojan ebꞌnaj yu yaniko ebꞌnaj inmayan,» xhi Komam.
Israel chaqꞌ isbꞌa yinh
8 Iwelti konhobꞌ tiꞌ, anma ay isbꞌaqꞌ sat yaj mach chu yilni,
anma ay istxikin, yajaꞌ mach chabꞌe.
9 Iskutxbꞌahojabꞌiko isbꞌa sunil nimeta konhobꞌ, kat iskutxbꞌanpaxiko isbꞌa sunil ej konhobꞌ.
¿Mak hediosal hex nime konhobꞌ hex tiꞌ halni yet yalanhtokanoj yinh tzet chiyu tinanh,
maka chala tzet yu yet yalanhtokanoj?
Yiqꞌabꞌti mak chaqꞌ isbꞌa yinh, kat yabꞌelaxi, kat yal-laxi tato yeli.
10 Chalnipaxo Komam Jahawil: «Hex tiꞌ, cheyaqꞌ hebꞌa yinh,
yebꞌ xin inchejabꞌan sikꞌbꞌililo wuhan yunhe kinheyohtanhenan,
kat heyanayto yul heyanma winhan,
yunhe hetxumni tato hanintiꞌan huneꞌnhe haꞌ hinan,
machi hunuxa dios bꞌabꞌel insatajan, machi hunuxa tzujan wintajilojan.
11 Hanintiꞌan, haninan Yahawil hinan, machi hunuxa mak ay yip chiꞌaqꞌni kolbꞌanile hakaꞌ intiꞌan.
12 Haninan walan tato chexinkolan, yijni isbꞌa hakaꞌ walnihan,
waqꞌnihan ohtanhelaxoj; hankawhinan walan maxhtaj hunteqꞌan chihal-lax diosal halniloj,
hex tiꞌ cheyaqꞌ hebꞌa yinh, ta haninan heDiosal.
13 Hayet maxhto tzꞌayikal, ay inxatikꞌahan; machi hunu mak tiꞌ chu iskolnilo isbꞌa yul inqꞌabꞌan.
Haꞌ tzet chinwatxꞌehan, ¿mak chu yetantoj?» xhi Komam.
14 Hak tiꞌ chu yalni Komam Jahawil, heKolomal,
Komam machi istxꞌojal, isDiosal Israel hakaꞌ tiꞌ:
«Chiwatojan hunteqꞌan ebꞌnaj yaqꞌaꞌko howal yinh Babilonia, yu kexinkolnihan,
chiwaqꞌnihan elokanhan sunil anma tuꞌ,
hak tuꞌ xin ebꞌnaj caldeo chiꞌelkanh ebꞌnaj yul isbarco kaw ayko ismayoj.a
15 Hanin Yahawilintiꞌan, machi intxꞌojalan,
haninan watxꞌenhe Israel.
16 Haꞌ Komam Jahawil hajni bꞌeh xol haꞌ mar,
Komam chiwatxꞌen bꞌeh xol ha haꞌ kaw ay yip isbꞌelwi.
17 Haꞌ Komam aqꞌni eloti ebꞌnaj soldado yet howal kaw nimankano isbꞌisil,
yebꞌ kaw aykano yip yebꞌ iscarruaje yebꞌ ischeh yet howal, yajaꞌ hun yu yaykꞌaykano sunil,
matxa xin ahwanoj, istanhkaniloj hakaꞌ chu istanhilo qꞌa qꞌaꞌ yinh ismechahil cantil.
18 Tinanh xin chiyal Komam tet iskonhobꞌ hakaꞌ tiꞌ: Matxahojabꞌ chenahti tzetaj xaꞌekꞌtoj,
matxahojabꞌ chiꞌekꞌ henabꞌal yinh tzetaj xayu yettax payat.
19 Wal tinanh ay akꞌ tzet ye tuꞌ tiꞌ chinwatxꞌehan,
toxa xin cheyilaꞌ, ¿tom mach cheyohtajoj xin?
Chinwatxꞌehan hunxa bꞌeh sat txꞌotxꞌ desierto,
chiwaqꞌ aholojan ha haꞌ chꞌel yojomal sat txꞌotxꞌ machi tzꞌunubꞌ chꞌah sat.
20 Chiyaqꞌako noꞌ howla noqꞌ ay xol telaj inmayan,
yebꞌ noꞌ oj yebꞌ yunin noꞌ avestruz,
yuto chiwaqꞌ hajlohojan ha haꞌ sat txꞌotxꞌ desierto;
chiwaqꞌpaxo aholojan ha haꞌ chꞌekꞌ yojomal sat txꞌo txꞌotxꞌ matzet chiꞌah sat yu yukꞌni inkonhobꞌan sikꞌbꞌililo wuhan.
21 Haꞌ huneꞌ konhobꞌ tiꞌ inwatxꞌehan wetojan yu yalnikꞌo kꞌul-la tzotiꞌ winhan.
22 Yajaꞌ hach tiꞌ, hach Jacob mach kinhawawtehan,
haxa hach Israel kintibꞌayojan hawu.
23 Mach hanhus no noqꞌ xahanbꞌalil wetan,
mach hawaqꞌ haxahanbꞌal wetan yu hawaniko inmayan,
mach inqꞌanan yebꞌalqꞌabꞌe tawet, machi bꞌay chachsiki hanhusni pom wetan.
24 Mach haloqꞌ teꞌ ah kaw xuqꞌ sam yu hamelyu yu hawaqꞌni teꞌ wetan,
machi bꞌay noh inkꞌulan yu ismantecahil no noqꞌ chꞌaqꞌlax yinh xahanbꞌalil.
Wal xin hawayo yalil hamul wibꞌanhan, istibꞌayo hatxꞌojal wuhan.
25 Hanintiꞌan haninan chinhokanhan hamul yu iskꞌulal inkꞌulan winhan,
matxa xin chinnatijan hamul tuꞌ.
26 Aqꞌ wohtanhelojan, jilaꞌ tzet chꞌelkaniko tinanh.
¡Tzotelanh, kat jilni tato machi hamul!
27 Haꞌ naj bꞌabꞌel hawichmam yako naj ismul,
haxa ebꞌnaj chaxhkuyni, yapaxiko ebꞌnaj ismul wetan.
28 Yuxin etaxto ebꞌnaj yahawil yinh yilni watutan,
wanayojan tzꞌaktiꞌ yibꞌanh yaꞌ Jacob,
yu isbꞌuchlax Israel yu ebꞌnaj ayko ishowal yinh,» xhi Komam.