Komam Jahawil hanhechꞌan Dios
44
Yalnipaxo Komam:«Wal tinanh, abꞌe hach Jacob,
hach inchejabꞌan, hach Israel, hach sikꞌbꞌiliko wuhan,» xhi Komam.
2 Haꞌ Komam Jahawil kach watxꞌeni, Komam kach aqꞌni pitzkꞌahoti yinh hamiꞌ,
Komam chikolwa tawinh, chalni hakaꞌ tiꞌ: Mach chachxiw hach Jacob,
inchejabꞌan, yebꞌ hach Jesurún, hach sikꞌbꞌiliko wuhan.a
3 Yuto chiwayojan ha haꞌ yibꞌanh txꞌo txꞌotxꞌ bꞌay machi ha haꞌ,
chiwaqꞌnihan ha haꞌ chiꞌel yojomal bꞌey txꞌo txꞌotxꞌ tajin sat.
Chiwaqꞌan Wespírituhan yibꞌanh hawuninal chipoh tawinh,
chiwanayojan inkꞌulalan yibꞌanh hawuninal tuꞌ;
4 chichꞌibꞌkanh hakaꞌ teꞌ itah kaw yax, hakaꞌ teꞌ sauce chichꞌibꞌ istiꞌla ha haꞌ.
5 Ay mak tiꞌ chalni: «Hanintiꞌan yet Komam Jahawil wehan,» xhi.
Aypaxo mak tiꞌ chiyako isbꞌi yaꞌ Jacob yinh.
Aypaxo mak xin haꞌ kaw isqꞌabꞌ chitzꞌibꞌnheni: «Yet Komam Jahawil wehan,» xhi.
Hunxa mak xin chiyako isbꞌi: «Israel ismayoj.»
6 Hak tiꞌ chu yalni Komam Jahawil, Isreyal Israel yebꞌ Iskolomal,
Komam Yahawil yinh Sunil: «Hanintiꞌan bꞌabꞌel, hanintiꞌan islahobꞌal,
haninnhehan Dios hinan, machi hunuxa Dios wintajilojan.
7 ¿Mak hunu tiꞌ chalnilo tzet maxhto chuli? Ta ay maka, yalabꞌiloj,
chalni yinh istxolal yinh insatan, hakaꞌ chiwutehan yettax kaw payat,
yet inwatxꞌenkanojan konhobꞌ tiꞌ. Ta ay hex, halweloj tzet chiyu yet bꞌaqꞌinh, cheyalnipaxilo tzet toxa chuhi.
8 Mach chexxiw xin, matzet chal hekꞌul,
¿tom mach cheyabꞌe hunteqꞌan tiꞌ yettax kaw payat yet walnikanojan teyet?
Hex tiꞌ cheyaqꞌ hebꞌa yinh tzet chiwalan. Machi hunuxa Dios, wal xin haninnhehan.
¡Machi hunuxa Dios kaw aykano yip, machi hunuxa Dios tiꞌ wohtajan!» xhi Komam.
Haꞌ mak chiyiyo isbꞌa sata tioxh aytoko yinh sukal
9 Haꞌ ebꞌnaj chiwatxꞌen tioxh kaw matzet chal yelapnoj ebꞌnaj, kaw matzet chalilo hunteqꞌan tioxh kaw ay yelapno yul sat ebꞌnaj tuꞌ. Haꞌ ebꞌnaj chiwatxꞌen tioxh tuꞌ haꞌtikꞌa ebꞌnaj chaqꞌ isbꞌa yinh tato hunteqꞌan tioxh tuꞌ mach chila, machi txumcha yu, yuxin chikan ebꞌnaj yinh txꞌixwilal yu huneꞌ tuꞌ. 10 Haꞌ mak chiwatxꞌen hunu tioxh, chaniko isdiosaloj, nabꞌanhe chu, matzet chalilo tzet chiswatxꞌe tuꞌ. 11 Sunil mak chiyiyo isbꞌa sata tioxh chikankano yinh txꞌixwilal, yuto haꞌ ebꞌnaj chiwatxꞌen tioxh tuꞌ anma ebꞌnaj. Haꞌ sunil tuꞌ chiskutxbꞌako isbꞌa, kat yok sata Komam yu yil-lax tzet chiꞌelikoj; chitakkanh iskꞌul, kat yokkano yinh txꞌixobꞌal sunil.
12 Haꞌ naj chakꞌom hierro chiyikanh naj chꞌen tenaza, chisnhusni naj chꞌen hierro xol tzaqꞌaqꞌ, chischakꞌni naj chꞌen yu ismartillo, chiswatxꞌen naj tioxh yinh chꞌen, chimunla naj yu yip isqꞌabꞌ iswatxꞌen tioxh tuꞌ, chinhohchakanh naj kat issikꞌilo naj yinh ismunil tuꞌ; ta mach chukꞌ naj ha haꞌ xin, chipáxilo yip naj.
13 Naj hosom teꞌ, chayo naj teꞌ regla, chiyanayo naj yechel tioxh chiyoche iswatxꞌe yu lapiz yibꞌanh teꞌ, kat yokniko cepillo yebꞌ compás yu naj, hak tuꞌ chu yeliko yechel anma yinh teꞌ yu naj, haꞌ yechel tioxh chiswatxꞌe naj tuꞌ yechel hunu naj winaj kaw kꞌulchꞌan jilni, chanikto naj huneꞌ tioxh tuꞌ yul yatut. 14 Naj hosom teꞌ chisqꞌajayo naj teꞌ cedro, teꞌ tzꞌisis yebꞌ teꞌ hih, chichꞌibꞌ xolajla qꞌebꞌtaj, chiswatxꞌen naj tioxh yinh teꞌ. Chistzꞌunnipaxo naj teꞌ tah, kat ischꞌibꞌ teꞌ yu haꞌ nhabꞌ. 15 Haꞌ te teꞌ tuꞌ chiꞌokniko yu anma siꞌoj yu isqꞌaxhni yinh teꞌ, haꞌ teꞌ chiꞌoknipaxiko yul horno yet chiwatxꞌelax ixim pan, yinhtikꞌapaxo teꞌ chiswatxꞌe anma tioxh chiꞌok isdiosaloj, chiyinayo isbꞌa sataj, chiwatxꞌelax tioxh yinh teꞌ, kat yay jahno anma sata teꞌ tioxh tuꞌ.
16 Haxa hunteqꞌanxa teꞌ kankano yintajilo isteꞌal teꞌ ok tioxhal tuꞌ, chinhuslaxto teꞌ yul qꞌa, kat isqꞌantzelax chibꞌe yibꞌanh istzaqꞌaꞌil teꞌ, kat iswaꞌ ebꞌnaj, kaw xin chinoh iskꞌul ebꞌnaj; lahwi tuꞌ, kat isqꞌaxhni ebꞌnaj, chalni ebꞌnaj: «Kaw saqꞌal koqꞌaxhni yinh huneꞌ qꞌaꞌ tiꞌ,» xhi ebꞌnaj. 17 Haxa yinh te teꞌ mach chinhuslaxto yul qꞌaꞌ tuꞌ, chiswatxꞌe naj hosom teꞌ istioxh, kat yay jahno naj sata istioxh, chiyinayo isbꞌa naj tet. Chalni naj tet istioxh tuꞌ: «Kolinan, yuto hach tiꞌ, hach indiosalan,» xhi naj.
18 Haꞌ hunteqꞌan anma tuꞌ matzet yohtaj, mach chitxumcha yu, yuto hakaꞌta mutzꞌan sat, mach chila, mach chistxumpaxo isbꞌa iskꞌul. 19 Mach chistxum isbꞌa tzet yekoj, kaw machi isnabꞌal, yuxin machi nacha yu chiyalni hakaꞌ tiꞌ: «Haꞌ yaqꞌbꞌilxa te teꞌ bꞌay inwatxꞌehan huneꞌ tioxh tiꞌ, innhustojan teꞌ inqꞌantzenan inchibꞌehan yebꞌ inpanan yibꞌanh istzaqꞌaqꞌil teꞌ, inwaꞌan, ¿tom xin kꞌul inwatxꞌenan hunu intioxhan kaw yahbꞌeta yinh hunteqꞌanxa teꞌ tiꞌ? ¿Tom chinay jahnojan sata iskuchamil hunu teꞌ qꞌebꞌtaj?» Estam hak tuꞌ yalni ebꞌnaj, hajxa. 20 Haꞌ hunteqꞌan anma tuꞌ, hakaꞌto tanh chislo, haꞌ yanma chiꞌaqꞌni kꞌayotoj,
hak tuꞌ xin mach chikolcha yanma, mach xin chal hakaꞌ tiꞌ:
«Haꞌ tzet ayko yul inwatxꞌqꞌabꞌtiꞌan kaw leqꞌtiꞌalkanoj,» mach xhihoj.
Haꞌ Komam Jahawil haꞌ iskolomal Israel
21 Yalnipaxo Komam: «Nati hunteqꞌan tiꞌ, hach Jacob, yuto inchejabꞌan hawehi, hach Israel.
¡Haninan watxꞌenhe hach, inchejabꞌan hawehi, hach tiꞌ, Israel; mach chinhanahulnhetojan!
22 Haninan waqꞌ tanhojan hatxꞌojal hakaꞌ chu istanhkanh ej moyan,
waqꞌ tanhojan hamul hakaꞌ chu iskꞌaykanh nixhte moyan;
meltzanhiko yul inqꞌabꞌan yuto haninan kach waqꞌ bꞌejtzohojan,» xhi Komam.
23 Bꞌitnojabꞌ satkanh yu tzalahilal, yu tzet xaꞌiswatxꞌe Komam Jahawil,
elojabꞌpaxo yaw nimeta xabꞌ ay sat txꞌo txꞌotxꞌ yinh kaw ip.
Taqꞌwojabꞌpaxo ej witz, kat isbꞌitni yebꞌ qꞌebꞌtalaj yebꞌ sunil te teꞌ ay iswiꞌla witz tuꞌ,
yuto iskol Komam Jahawil yaꞌ Jacob, yuxin chꞌalaxiko ismay Komam bꞌey Israel.
24 Hak tuꞌ yalni Komam Jahawil, haKolomal,
Komam kach watxꞌeni yettax kach pitzkꞌati yinh hamiꞌ hakaꞌ tiꞌ:
«Hanin Yahawilintiꞌan watxꞌenhe sunil, haninan lehnito satkanh, haninan lehnito txꞌo txꞌotxꞌ tiꞌ.
25 Chiwetatojan tzetaj yechel chisye ebꞌnaj txumlum,
chiwetatojan isnabꞌal ebꞌnaj kunlum, chiwetatojan isnabꞌal ebꞌnaj ay ishelanil, chiwetantojan yitzꞌatil wiꞌe.
26 Yajaꞌ wal ebꞌnaj inchejabꞌan, haninan chiwaqꞌan yijaꞌ isbꞌa tzet chiyal ebꞌnaj;
haꞌ tzet chisnah ebꞌnaj chinchejtojan, kꞌul chiꞌelikoj; haninan chiwalan tet Jerusalén:
“Chiꞌehayo anma yul konhobꞌ tiꞌ,” kinchihan.
Haxa tet ej konhobꞌ ay yul ismajul Judá chiwalan tet:
“Haꞌ konhobꞌla tiꞌ chiwatxꞌelaxkanh hunelxa, haꞌ teꞌ nha uchkꞌabꞌilayo tiꞌ,
chiwatxꞌelaxkanh teꞌ hunelxa,” kinchihan.
27 Hanintiꞌan, chisje walnihan tet haꞌ nime haꞌ:
“Tajanhkanh, chachwaqꞌ tajokanhan,” kinchihan.
28 Haninan chiwalan tet naj Ciro: “Hach tiꞌ, ayachiko yilomalo wuhan, chayijen sunil tzet chiwochehan,” kinchihan.
Chiwalnihan tet Jerusalén: “Hach tiꞌ chachwatxꞌelaxkanh hunelxa,” kinchihan.
Chiwalpaxojan tet watutan: “Hach tiꞌ chaxhwatxꞌelaxkanh, chꞌayto haxeꞌ,” kinchihan,» xhi Komam.