Istaqꞌekano Komam Dios huneꞌ munil tet naj Ciro
45
Haꞌ Komam Jahawil saynhelo naj Ciro, yaniko Komam naj reyal.Haꞌ Komam xekniti naj yinh iswatxꞌqꞌabꞌ yu yokkanto ej nime konhobꞌ yalanh yip naj,
kat yinilo naj tzet ay ebꞌnaj rey, yebꞌ yunhe ishajni Komam pulta sata naj;
haꞌ pulta chihajlax tuꞌ machi hunu mak chu ispebꞌani. Chalni Komam tet naj hakaꞌ tiꞌ:a
2 «Haninan chinbꞌabꞌihan tasataj,
kat intoholbꞌanhenikojan txꞌo txꞌotxꞌ kotxkiltanhe yekꞌi.
Chinmaqꞌ pohojan pulta nabꞌa bronce, haxa isqꞌanh nabꞌa hierro chinqꞌahkantojan.
3 Kat waqꞌnihan hunteqꞌan qꞌalomal tawet, hunteqꞌan ewanyehi,
yebꞌ hunteqꞌan tzet mach ohtabꞌiloj kaw kꞌubꞌabꞌil, yunhe hawohtanheniloj tato hanintiꞌan,
Yahawil hinan, isDiosal Israel, haninan chiwakojan habꞌi.
4 Yu iskꞌulchꞌanil inkꞌulan yinh yaꞌ Jacob, yebꞌ yinh konhobꞌ Israel sikꞌbꞌililo wuhan;
kach wawtehan, walnihan habꞌi, wanikojan huneꞌ habꞌi kaw niman yelapnoj,
waxanhka xin mach ohtabꞌilo hinan hawu.
5 Hanintiꞌan Yahawil hinan, machi hunuxa Yahaw, machi hunuxa Dios wintajilojan.
Haninan chiwakojan hatxꞌambꞌal yinh hawiktaj, hak tuꞌ xin watxꞌebꞌilxa habꞌa yinh howal,
waxanhka xin mach ohtabꞌilo hinan hawu.
6 Yunhe yohtanhenilo anma ay bꞌey bꞌay chiꞌahilo tzꞌayik masanto bꞌay chito tzꞌayik,
tato machi hunuxa mak Dios wintajilojan.
Hanintiꞌan Yahawil hinan, machi hunuxa mak hakaꞌ intiꞌan.
7 Hanintiꞌan watxꞌenhe sajilqꞌinal, haninan xin inwatxꞌepaxojan qꞌejholo;
haninan chiwakojan aqꞌankꞌulal, haninan xin chiwapaxikojan howal.
Hanin Yahawilintiꞌan, haninan chinwatxꞌehan sunil.
Komam Jahawil haꞌ watxꞌenhe sunil
8 »Bꞌay kaw nahat yekanh bꞌey yul satkanh chiwatijan istoholal wipan hakaꞌ yay yal chew
yebꞌ hakaꞌ haꞌ nhabꞌ chꞌay yu moyan, kat xin ischahni txꞌo txꞌotxꞌ;
haxa issat txꞌotxꞌ xin chaqꞌ kolbꞌanile, hun xin chu yaqꞌnipaxo istoholal.
Hanin Yahawilintiꞌan, watxꞌenhe hakaꞌ tuꞌ.
9 ¡Kꞌanchꞌan mak chꞌaniko howal yinh mak watxꞌenhe!
Hakaꞌ hunu txꞌotxꞌ xhalu, maka hunuxa txꞌotxꞌ lahan yebꞌi,
machi ok txꞌotxꞌ howal yinh naj watxꞌeni.
Mach chal txꞌotxꞌ qꞌantxꞌotxꞌ tet naj lanhan issomni hakaꞌ tiꞌ: “¿Tzet chawatxꞌe?” xhi.
Maka xin hunu txꞌotxꞌ xi watxꞌebꞌilxa mach chal hakaꞌ tiꞌ:
“Haꞌ tzet chawatxꞌe, ¿tzet yinh mach isqꞌabꞌ?” mach xhiho txꞌotxꞌ tet mak watxꞌenhe.
10 ¡Kꞌanchꞌan mak chalni tet ismam hakaꞌ tiꞌ:
“¿Tzet yinh xin hak tiꞌ wehan hawu?” xhi. Maka chal tet ismiꞌ:
“¿Tzet yinh xin kinhawaqꞌ pitzkꞌahojan?” xhi!» xhi Komam.
11 Komam Jahawil, Komam machi nino istxꞌojal, isDiosal Israel, Komam watxꞌenheni, chalni hakaꞌ tiꞌ:
«Qꞌambꞌewe wetan yinh tzet chitohuli. Qꞌambꞌewelo wetan yinh tzet chiꞌeliko ebꞌnaj wuninalan,
kat heqꞌambꞌenpaxo yinh tzet watxꞌebꞌil wuhan yu inqꞌabꞌan.
12 Hanintiꞌan watxꞌenhe txꞌo txꞌotxꞌ, inwatxꞌenan anma sat txꞌotxꞌ;
inlenitojan satkanh yu inqꞌabꞌan, inwatxꞌenkanojan ej txꞌumel satkanh yinh istxolal hakaꞌ huneꞌ ejército.
13 Haninan wilojan iswayanh naj Ciro, intoholbꞌanhenikojan sunil isbꞌeh naj.
Haꞌ naj chiwatxꞌenkanh inkonhobꞌan kat isbꞌejtzonilo makta tzabꞌilayoj;
yajaꞌ xin mach chisqꞌan istohol, maka chiꞌaqꞌlax ispaj,» xhi Komam Yahawil yinh sunil.b
14 Chalni Komam Jahawil tet Israel hakaꞌ tiꞌ:
«Haꞌ ebꞌnaj munlawom ay bꞌey Egipto,
yebꞌ ebꞌnaj txonhom ay bꞌey Etiopía, yebꞌ ebꞌnaj ah Sabá, ebꞌnaj kaw nimej istel,
chaqꞌaꞌko isbꞌa ebꞌnaj yul haqꞌabꞌ, kat yokkano ebꞌnaj hawu; chiꞌoktzujno ebꞌnaj tawintaj,
ayko xin chꞌen cadena yinh ebꞌnaj.
Chꞌay jahno ebꞌnaj tasataj, chisqꞌambꞌen ebꞌnaj, chalni ebꞌnaj:
“Yinh kaw yeli tekꞌatanh ayko Komam Dios, machi hunuxa mak Dios yintajilo Komam,” xhi ebꞌnaj.
15 Yinh kaw isyelal, hach tiꞌ Dios mach chijiliko yinh, isDiosal Israel,
Komam chꞌaqꞌni kolbꞌanile.
16 Sunil ebꞌnaj chiwatxꞌen yechel tioxh, chisomchakanh isnabꞌal ebꞌnaj,
kat istxꞌixwikanh ebꞌnaj, kat xin istakkanilo iskꞌul ebꞌnaj.
17 Wal konhobꞌ Israel, haꞌ Komam Jahawil chikolni,
chiskol Komam yinh hunelnhe. Matxa bꞌaqꞌinh xin chꞌel ispixan yebꞌ chiꞌilaxayoj,» xhi Komam.
18 Yuto Komam Jahawil, Komam watxꞌenhe satkanh,
haꞌ Komam kaw Dios, Komam watxꞌenhe txꞌo txꞌotxꞌ,
mach isnabꞌnhehal iswatxꞌe Komam txꞌotxꞌ,
wal xin yakano Komam yu yehiko anma sat txꞌotxꞌ.
Haꞌ Komam tuꞌ chihalni hakaꞌ tiꞌ:
«Hanintiꞌan Yahawil hinan, mach hunuxa mak wintajilojan.
19 Machi kintzotelan yinh ewantajil bꞌay hunu qꞌejholo sat txꞌo txꞌotxꞌ tiꞌ,
mach walan tet yuninal yaꞌ Jacob hakaꞌ tiꞌ:
“Nabꞌnhe chinhesayikꞌojan,” mach kinchihan.
Hanintiꞌan Yahawil hinan, haꞌ isyelal chilawalan,
kat walnikꞌojan istoholal.
Komam Jahawil yebꞌ hunteqꞌan tioxh yet Babilonia
20 »Kutxbꞌaweko hebꞌa, titanhwej, hunbꞌawe hebꞌa hesunil hex itzitz hexto ay yul sunil ej konhobꞌ.
Kaw machi isnabꞌal hunteqꞌan anma chiwatxꞌenkanh istioxh, watxꞌebꞌil yinh te teꞌ,
yebꞌ hunteqꞌan mak chitxahli tet isdios mach chu yaqꞌni kolbꞌanile.
21 Awtewej kat hekutxbꞌanikoj kat heqꞌambꞌen texol hesunil:
¿Mak aqꞌni abꞌelaxo hunteqꞌan tiꞌ yettax kaw yichebꞌanil, yok yalnokꞌoj?
¿Tom maxhtaj hinan, hanin Yahawilintiꞌan xin?
Machi hunuxa Dios hakaꞌ hinan, Dios kaw toholkanoj yebꞌ chꞌaqꞌni kolbꞌanile,
machi hunuxa Dios wintajilojan.
22 Okanhwe tꞌanhno winhan, kat waqꞌnihan hekolbꞌanil hesunil hex ay sat txꞌo txꞌotxꞌ tiꞌ,
yuto hanintiꞌan Dios hinan, machi hunuxa maka.
23 Hankawhinan waqꞌ bꞌinaho inbꞌihan winhan,
haꞌ Tzotiꞌ elti yul intiꞌan kaw toholkanoj, machi xin chꞌekꞌto yet yijni isbꞌa.
Yuxin insatajan chꞌay jahno sunil anma yu iswitxꞌiꞌ,
kat istaqꞌweniko inbꞌihan yibꞌanh, anma nananta yabꞌxubꞌal,
24 kat yalni hakaꞌ tiꞌ: “Yinh kaw yeli,
yinhnhe Komam ay istoholal, yebꞌ kaw haꞌnhe aykano yip,” xhi.
Inkꞌatanhan chihul sunil, sunil mak yiti ishowal winhan chitxꞌixwikanh.
25 Haꞌ yuninal Israel, chitoholbꞌanhekojan,
kat yaqꞌni tzalaho yanma winhan, hanin Yahawil hintiꞌan,» xhi Komam.