46
¡Haꞌ tioxh Bel, chitit xulnahi, haxa tioxh Nebo, chiꞌaykꞌay sat txꞌotxꞌ!Hunteqꞌan tioxh tuꞌ, chiꞌalaxahto yibꞌanh noꞌ cheh yet ijatz, kat yijnito noꞌ,
hunteqꞌan cheyito tuꞌ, lahan hakaꞌ ijatz kaw al chiyabꞌe noꞌ cheh kaw sikomxa aya.
2 Hunteqꞌan tioxh tuꞌ, ilaxayoj, yaykꞌay sat txꞌotxꞌ,
machi xin yu iskolni isbꞌa; haꞌ hun xin chiꞌilaxpaxto preso nan konhobꞌal. Chiyalni Komam hakaꞌ tiꞌ:
3 «Hex yuninal yaꞌ Jacob, abꞌewe tzet chiwalan,
yebꞌ hex ayextokano yinh konhobꞌ Israel,
haninan kexwikꞌojan yet yalanhto maxhto chexpitzkꞌahi.
Haninan kexincheltojan.
4 Haktikꞌapax tuꞌ xin chiwutehan teyinh yet chexichambꞌikaniloj,
yebꞌ yet sajxa xil hewiꞌ, haninan chextzabꞌni.
Haninan watxꞌenhe hex, haninan xin chexwikꞌojan,
haninan tzabꞌnhe hex, kat kexinkꞌubꞌanan.
5 ¿Mak yebꞌ chu kinhelahbꞌanan, yebꞌ xin mak hakaꞌ hinan heyalni?
Wal xin machi mak chu kinhelahbꞌanan yebꞌi.
6 Ay ebꞌnaj tiꞌ chiyihti chꞌen oro yul istxꞌuy kat isloqꞌni chꞌen plata,
kat xin ismalen chꞌen yul malbꞌal;
lahwi tuꞌ kat istohlan ebꞌnaj hunu naj chiwatxꞌenayo chꞌen plata istioxhal,
lahwi tuꞌ kat yay jahno ebꞌnaj sataj, kat yaniko ebꞌnaj ismay.
7 Chahto ebꞌnaj yibꞌanh iswixikꞌ, kat yinito ebꞌnaj;
lahwi tuꞌ kat islinhbꞌankanh ebꞌnaj bꞌaytuꞌwal choche, haꞌ tuꞌ xin chikan linhnoj,
machi bꞌili bꞌay chákano ebꞌnaj tuꞌ, kat yahwi ebꞌnaj tet, machi xin chitaqꞌwi tet ebꞌnaj,
machi xin chikolwa yinh ebꞌnaj yinh isyaꞌtajil.
8 ¡Hex manhkꞌom, nahweti huneꞌ tiꞌ! Kat heyok yinh txꞌixwilal, kat hemeltzohi.
9 Nahweti hunteqꞌan tzet yu yet kaw payat tiempo,
yuto hanintiꞌan Dios hinan, machi hunuxa Dios,
machi hunuxa lahan hakaꞌ hinan.
10 Yet yalanhtokanoj walnikanojan tzetaj chihuli,
hatax yet payat qꞌinal walnikanojan yet maxhto chiyuhi,
yuxin walan hakaꞌ tiꞌ: “Haꞌ tzet chinnahan inwatxꞌeꞌan chiyij isbꞌa,
chinwatxꞌehan tzet chiwochehan.
11 Wawtehan huneꞌ naj ay bꞌey yetkꞌulal bꞌay chiꞌahilo tzꞌayik,
kaw nahat chitit naj hakaꞌ hunu noꞌ chꞌik.
Hanan walan, yuxin hul naj, chinwatxꞌenan tzet nabꞌilxa wuhan.a
12 Abꞌewe tzet chiwalan, hex kaw kaw heyanma,
hex kaw nahat heyehilo yinh istoholal.
13 Haꞌ istoholal chinwatxꞌehan chihitzti inkꞌatanhan,
matxa xin nahat yehiloj, haꞌ kolbꞌanile chiwaqꞌan, matxa chiꞌok linhnoj,
chiwaqꞌan kolbꞌanile tet Sión, chiwaqꞌnihan isqꞌaqꞌal inmayan tet Israel,” kinchihan,» xhi Komam.