Isyaꞌtajil chihul yibꞌanh konhobꞌ Babilonia
47
Yalni Komam:«Ayanhtij, kat haway tzꞌonhno xol pojoj, hach ix qꞌopo, yuninal Babilonia.
Ayanh tzꞌonhno sat txꞌotxꞌ, matxa hatzꞌonhobꞌal hach ix qꞌopo, iskutzꞌin ebꞌnaj caldeo;a
matxa chihal-laxi ta kaw saqꞌal hachkano, yebꞌ ta kaw kꞌulchꞌan kach jilni.
2 Iti chꞌen molino kat hakokꞌtzen ixim trigo. Ilo yenhel xil hawiꞌ,
nahat chawikanh hanuybꞌil yinh habꞌul, kat hawekꞌto xol ha haꞌ.
3 Chikankano tꞌilno hanimanil, chachil-laxoj, kat yelkano hapixan.
Chiwaqꞌan ispaj selel, machi hunu mak xin chiꞌelkanh yul inqꞌabꞌan,» xhi Komam.
4 Komam chonhkolniloj, Komam Yahawil kaw aykano yip, hak tuꞌ isbꞌi Komam.
Komam machi nino istxꞌojal yinh, isDiosal Israel.
5 Yalni Komam: «Hach iskutzꞌin ebꞌnaj caldeo, tzꞌonhanh, kach hatiꞌ,
kat hawok xol qꞌejholoj, yuto matxa bꞌaqꞌinh chachhal-lax, yahawilo ej konhobꞌ,» xhi Komam.
6 Yalnipaxo Komam: «Hayet istit inhowalan yinh inkonhobꞌan,
wutekojan ebꞌnaj hakaꞌ mach inkonhobꞌojan,
wanikojan ebꞌnaj yul haqꞌabꞌ, yajaꞌ xin machi nino tzꞌay hakꞌul yinh,
hawaqꞌni munil kaw yaꞌta tet ebꞌnaj ichamtaxa hakaꞌ te teꞌ chiꞌok yibꞌanh isnuqꞌ noꞌ wakax.
7 Hawalni: “Yahaw hinan yinh sunilbꞌal tiempo,” kachi.
Yajaꞌ machi xin ekꞌ hunteqꞌan tiꞌ yinh hanabꞌal,
machi xin hatxum yinh tzet chu hatanhkano yinh tzujanilxa.
8 Tinanh xin, abꞌe huneꞌ tiꞌ, hach ix kaw ochebꞌil loloꞌal hawu,
kaw matzet chal hakꞌul, tzꞌonhan hach yul hatzꞌonhobꞌal, chawalni yebꞌ hawanma hakaꞌ tiꞌ:
“Haninnhechꞌanan, machi hunuxa mak tzujan wintajilojan.
Mach chinkanan hunixal, mach chinkanan manh uninal,” kachi.
9 Yinhnhe huneꞌ tzꞌayik chihul kabꞌebꞌ isyaꞌtajil tiꞌ tawibꞌanh,
chachkan hunixal, yebꞌ xin chachkan manh uninale.
Kaw yinh sunil yip isyaꞌtajil chihul tawibꞌanh;
waxanhka xin kaw ayko yinh hawanma yinh ebꞌnaj kunlum yebꞌ ebꞌnaj ahbꞌelom.
10 Kaw kawxi hakꞌul yinh istxꞌojal chawatxꞌe, hawalni:
“Machi mak tꞌanhanti winhan,” kachi. Haꞌ ishelanil hanabꞌal yebꞌ tzet hawohtaj, haꞌ kach aqꞌni subꞌchahoj,
hawalni yinh hawanma: “Haninnhehan, machi hunuxa maka,” kachi.
11 Chihul istxꞌojal tawibꞌanh, machi xin hawohtajo bꞌay chitita,
chiꞌaykꞌay isyaꞌtajil tawibꞌanh, matxa xin tzet tzꞌaj hawuteꞌ,
chulpaxo huchanil mach nabꞌilo hawu, chihul lemna tawibꞌanh.
12 Wal hawehiko yinh hawuten nawalil, yebꞌ yinh sunil ahbꞌelomal,
hakaꞌtikꞌa tzet chawatxꞌe yet qꞌopo hach.
¡Kꞌuxan tato chito kach watxꞌiloj! maka ¡Kꞌuxan tato chawiqꞌkanh hawip!
13 Kaw niman ebꞌnaj aqꞌni istzꞌajanil hakꞌul, kach sikilo hawabꞌen tzet chal ebꞌnaj.
Hulujabꞌ ebꞌnaj chiꞌah tꞌanhno satkanh, ebꞌnaj chitxumni tzet chal yelapno ej txꞌumel,
ebꞌnaj chibꞌisni hunun ixahaw, kat yalni ebꞌnaj tawet tzetaj chihul tawibꞌanh.
14 Yajaꞌ ebꞌnaj tuꞌ, lahan ebꞌnaj hakaꞌ matzꞌik chinhuslaxto ebꞌnaj yu qꞌa qꞌaꞌ,
matxa chu iskolni isbꞌa ebꞌnaj xol xaj qꞌaꞌ, yuto mach lahano hakaꞌ tzaqꞌaqꞌ chonhay tzꞌonhno sataj kat koqꞌaxhni.
15 Hak tuꞌ chiꞌutelax ebꞌnaj ahbꞌelom, ebꞌnaj hawatxꞌe hatrato yebꞌi yettaxtikꞌa qꞌopo hach.
Nananta chu istokano ebꞌnaj yul isbꞌeh, machi hunu ebꞌnaj xin chachkolni,» xhi Komam.