Kachwa Komam Dios yinh anma Israel yu ismanhkꞌomal
48
Abꞌewe huneꞌ tiꞌ, hex yuninal yaꞌ Jacob, hex ayko isbꞌi Israel teyinh,hex titna yinh yuninal yaꞌ Judá; hex cheyaqꞌ bꞌinaho isbꞌi Komam Jahawil yinh hunu tzet ye tuꞌ cheyala,
hex cheyawte inbꞌihan teyinh, hanin isDiosal Israel,
waxanhka mach yinho istoholal yebꞌ yinh isyelal.
2 Cheyalni ta haꞌ yul konhobꞌ yet Komam Dios haꞌ tuꞌ ay hex, kat xin iskawxi hekꞌul yinh Komam,
isDiosal Israel; Komam Yahawil kaw aykano yip, hak tuꞌ isbꞌi Komam.a
3 Yalni Komam xin: «Haꞌ tzet chiyuhi halbꞌilxatikꞌakano wuhan yet yalanhtokanoj,
yul intiꞌan eltij, walnikꞌojan. Inwatxꞌehan yinh anhe hakaꞌ yu walnihan, hak tuꞌ yu yijni isbꞌa.
4 Kaw wohtajan tato mach yijemo hex, kaw lutꞌ hexkanoj,
hakaꞌ iskawil chꞌen hierro hak tuꞌ henuqꞌ, yebꞌ hakaꞌ chꞌen bronce hak tuꞌ iskawil hepalanh.
5 Yuxin yet yalanhto walnikanojan teyet; yet maxhto chiyuhi walnihan teyet,
yuxin mach chu heyalni hakaꞌ tiꞌ: “Haꞌ kotioxh watxꞌenhe hunteqꞌan tiꞌ;
haꞌ hunteqꞌan echele watxꞌebꞌilayo kodiosalojanh,
haꞌ aqꞌni yijaꞌ isbꞌa hunteqꞌan tiꞌ,” mach kexchihoj.
6 Xaheyabꞌe hunteqꞌan tiꞌ, heyilnipaxo sunil, ¿machom xin cheyala tato yel sunil tiꞌ?
Tinanh xin, chiwaqꞌan hunteqꞌan tzet akꞌto heyabꞌeꞌ yebꞌ tzet ye tuꞌ ewanyehi, mach ohtabꞌil heyu.
7 Hunteqꞌan chiwatxꞌelax tinanh, matzet yet yalanhtokanoj,
hunteqꞌan maxhto abꞌebꞌil heyu hato tinanh cheyabꞌe isqꞌumal,
yunhe mach cheyal hakaꞌ tiꞌ: “Hunteqꞌan tiꞌ abꞌebꞌilxatikꞌa juhanh,” kexchi.
8 Maxhto bꞌay xaheyabꞌe yal-lax hunteqꞌan tuꞌ, mach ohtabꞌilopaxo heyu,
yuto maxhto hajano hetxikin, kaw wohtajan tato mach yijemo hex,
yuxin yet maxhto chexpitzkꞌahi walnihan tato manhkꞌom hex.
9 Yu xahan ay inbꞌihan wuhan, yuxin niman chiwute inkꞌulan teyinh,
yu yok inmayan yuxin matxa chexintanhtzelojan.
10 Wal tinanh xakexwaqꞌ sajbꞌojan, yaj mach hakaꞌo chu issajnhelax chꞌen plata;
wal xin kexinsikꞌiltijan xol isyaꞌtajil, hakaꞌ yul horno.
11 Wuhan, yu xahan chiwil hinbꞌahan yuxin chinwatxꞌehan,
hak tuꞌ xin mach chiꞌel ispixan inbꞌihan. Haꞌ inmayan machi waqꞌan tet hunuxa maka.
12 Abꞌe tzet chiwalan hach Jacob, yebꞌ hach Israel, hach awtebꞌil wuhan.
Haninnhehan Dios, haninan bꞌabꞌel yebꞌ islahobꞌal.
13 Haꞌ inqꞌabꞌan watxꞌenhe txꞌo txꞌotxꞌ, haꞌ inwatxꞌqꞌabꞌan malen satkanh yu ispaqꞌanil inqꞌabꞌan,
hakaꞌto inqꞌuchubꞌnhehan; haxa yet wawtenan isyenikanh isbꞌa.
14 Kutxbꞌaweko hebꞌa hesunil kat heyabꞌeni.
¿Mak hunujex tiꞌ, halnikano hunteqꞌan tzet yu tiꞌ?
Haꞌ naj sikꞌbꞌililo wuhan, hanin Yahawintiꞌan,
haꞌ naj chiwatxꞌen tzet nabꞌilxa wuhan yinh konhobꞌ Babilonia, kat yanayo isqꞌabꞌ yibꞌanh ebꞌnaj caldeo.
15 Haninan kintzotelan, haninan wawtetijan naj, winitijan naj,
yuxin bꞌajxanhetuꞌwal chito naj chiwayojan isyaxil yibꞌanh naj.
16 Hitzanhweti inkꞌatanhan, abꞌewe xin. Hayet yichebꞌanil,
mach hunelo kintzotelan yinh ewantajil, hayet yijni isbꞌa hunteqꞌan tuꞌ xin ayinikꞌojan bꞌey tuꞌ,» xhi Komam.
Haꞌ tinanh xin, makinischejtijan Komam Dios Jahawil yebꞌ yespíritu.
17 Hak tiꞌ chiyu yalni Komam, Komam heKolomal,
Komam machi nino istxꞌojal, isDiosal Israel:
«Hanintiꞌan Jahawil hinan, heDiosal wehan.
Haninan kexinkuyan yinh tzet ye tuꞌ kꞌul teyinh, chexwinitojan yul bꞌeh bꞌay wal hetohi.
18 Tato heyabꞌeto yinh chejbꞌanile wetan yehi, hakaꞌmi hunu ha haꞌ chiꞌel yojomal,
hakmi tuꞌ aqꞌankꞌulal ay teyet, haxa istoholal chewatxꞌe lahanmi hakaꞌ ismaqꞌni isbꞌa haꞌ mar.
19 Haꞌ heyuninal chipitzkꞌa teyinh, kaw nimankanoj hakaꞌ isbꞌisil arena,
machim chiꞌilaxilo, yebꞌ mach chiholaxkanh hebꞌi yinh insatan.
20 ¡Elanhwe bꞌey Babilonia tuꞌ! ¡Elanhwekanh xol ebꞌnaj caldeo!
¡Halwe huneꞌ tiꞌ yinh kaw tzalahilal, kat heyalnikꞌo huneꞌ tzotiꞌ tiꞌ tet sunil anma bꞌay kachankan apno txꞌo txꞌotxꞌ! Cheyal hakaꞌ tiꞌ:
“¡Maskol Komam Jahawil yaꞌ Jacob, yaꞌ ischejabꞌ Komam!” kexchi,» xhi Komam.
21 Hayet yekꞌ ebꞌnaj Israel bꞌey txꞌotxꞌ desierto yu Komam Jahawil,
machi tajintiꞌal yaqꞌle ebꞌnaj.
Yaqꞌ eloti Komam ha haꞌ yul iskꞌul chꞌen chꞌen, ishajni isbꞌa chꞌen nime chꞌen, isbꞌelwi haꞌ. Yalnipaxo Komam Jahawil:
22 «Machi aqꞌankꞌulal tet ebꞌnaj txꞌoj,» xhi.