Israel ischejabꞌ Komam Jahawil
49
Abꞌewe tzet chiwalan, hex konhobꞌ ayayo istiꞌla haꞌ mar, yebꞌ hex konhobꞌ nahat yehiloj, abꞌewepaxoj.Haꞌ Komam Jahawil kinawtenan, yet yalanhto maxhto chinpitzkꞌahan ayxako inbꞌihan yinh isnabꞌal Komam.
2 Isqꞌanni Komam intiꞌan hakaꞌ hunu chꞌen espada kaw xixiꞌ iswiꞌ, kinyebꞌantojan yalanh yenhel isqꞌabꞌ,
kinyanikojan hakaꞌ hunu flecha kaw xixiꞌ iswiꞌ, kinyanaytojan yul istxꞌuyal bꞌay chikꞌuhi isbꞌaqꞌ teꞌ litꞌ.
3 Yalni Komam wetan hakaꞌ tiꞌ: «Hach Israel inchejabꞌan hawehi,
yuto tawinh chiꞌilchalo inmayan,» xhi.
4 Yajaꞌ walan hakaꞌ tiꞌ: «Kaw nabꞌnhe kinmunlahan, kaw matzet wiqꞌan yinh wipan xalahwiloj.
Yajaꞌ wal xin haꞌ Komam Jahawil yohta tzet chinyutehan,
haꞌ ispaj chiꞌaqꞌlax wetan ayko yul isqꞌabꞌ Komam Dios, inDiosalan,» kinchihan.
5 Komam kinwatxꞌenan yinh inmiꞌan, yu wokan ischejabꞌo Komam,
yu inhitznikojan yaꞌ Jacob iskꞌatanh Komam,
yu inkutxbꞌanikojan konhobꞌ Israel iskꞌatanh Komam, (yuto kaw kꞌulchꞌan hinan yul sat Komam Jahawil,
haꞌ Komam Dios inDiosalan haꞌ chiꞌok wipojan.)
6 Haꞌ Komam tuꞌ chalni hakaꞌ tiꞌ: «Inchejabꞌan hawehi,
yajaꞌ maxhnhetaj yu haywanh ebꞌnaj titna yinh yaꞌ Jacob,
yebꞌ hawaqꞌni meltzoho haywanhxanhe ebꞌnaj Israel aytokanoj,
wal xin chachokpaxo sajilqꞌinal yinh ejla nimeta konhobꞌ,
yu hawinito kolbꞌanile chiwaqꞌan tet ej konhobꞌ ay bꞌey bꞌay chikachnakan apno txꞌo txꞌotxꞌ,» xhi Komam.
7 Komam Jahawil, Komam iskolomal Israel, Komam machi nino istxꞌojal yinh,
hak tiꞌ chiyute yalni tet konhobꞌ kaw yahbꞌilkano yu ej konhobꞌ,
yebꞌ ayko ishowal ej konhobꞌ yinh,
konhobꞌ oklena ischejabꞌo ebꞌnaj kaw txꞌojkanoj. Yalni Komam hakaꞌ tiꞌ:
«Hayet chachyilni ebꞌnaj rey yebꞌ ebꞌnaj principe, chiꞌahwano ebꞌnaj,
kat yay jahno ebꞌnaj tasataj, yuto hanin Yahawilintiꞌan, isDiosal Israel, machi nino istxꞌojal winhan,
haninan kach insayilojan, kat xin yijni isbꞌa sunil tzet chiwalan,» xhi Komam.
Chal Komam Dios ta chaqꞌ meltzoho konhobꞌ Sión yul isqꞌabꞌ
8 Hak tiꞌ yute yalni Komam Jahawil: «Hayet yinh istiempohal inyenilojan iskꞌulchꞌanil inkꞌulan,
wabꞌenan tzet hawala, haxa yinh istiempohal kolbꞌanile, inkolwahan tawinh.
Kach inkꞌubꞌanan, hawu yuxin inwatxꞌehan intratohan yebꞌ konhobꞌ yu inwatxꞌenkanhan konhobꞌ,
yu yehayo konhobꞌ sat txꞌo txꞌotxꞌ bꞌejbꞌilkanoj kat yok hamajuloj.
9 Yu hawalni tet ebꞌnaj ayko preso hakaꞌ tiꞌ: “¡Elanhwetij!”
kat hawalni tet ebꞌnaj ayko xol qꞌejholo: “¡Yewe hebꞌa!” kachi. Sunil yulaj bꞌeh kaw ay tzet cheloh,
haxa bꞌey ej witz matzet chichꞌibꞌi, tinanh ayxa tzet chislo henoqꞌ.
10 Mach cheyijle wahil, yebꞌ mach chitajpaxo hetiꞌ, mach cheyijlepaxo qꞌaꞌ,
mach chextzꞌato yu yoj tzꞌayik, yuto xahan ay hex wuhan, yebꞌ haninan chexwijbꞌahan,
kat kexwinitojan bꞌay kaw ay isnuqꞌ ha haꞌ.
11 Chinwatxꞌehan bꞌeh chiꞌekꞌ yinh iswiꞌla ej witz,
kat waqꞌno ixtanhwojan txꞌiꞌal ej nixhte bꞌeh,» xhi Komam.
12 Ilwekꞌanabꞌi, hunteqꞌan tiꞌ kaw nahat chitita, ay chitit yinh yetkꞌulal norte,
aypaxo chitit yinh yetkꞌulal bꞌay chito tzꞌayik,
aypaxo xin chitit yul ismajul txꞌotxꞌ Sinim.
13 ¡Bꞌitnojabꞌ satkanh, kat xin yaqꞌni tzalaho iskꞌul txꞌo txꞌotxꞌ,
kat yahwi ej nimeta witz yu tzalahilal;
yuto Komam Jahawil yaqꞌ yaqꞌlobꞌal iskꞌul iskonhobꞌ!
kat istzꞌay iskꞌul Komam yinh makta chiꞌekꞌyaꞌ yanma.
14 Yajaꞌ konhobꞌ Sión yal hakaꞌ tiꞌ:
«Bꞌejbꞌilinkanojan yu Komam Jahawil,
xakinisnahulnhetojan Komam,» xhi. Yalnipaxo Komam:
15 «¿Tom ay hunu ix miꞌe chisnahulnheto yunin yaqꞌ pitzkꞌahoj,
matxa xin xahano chil yunin? Waxanhka chisnahulnheto ix,
wal hinan mach chachinnahulnhetojan.
16 Wal xin ayko hawechel yinh ispaqꞌanil inqꞌabꞌan,
aynhetikꞌako iskꞌubꞌal hakonhobꞌ yinh insatan.
17 Haꞌ ebꞌnaj chiwatxꞌenkanh hakonhobꞌ yulxa ebꞌnaj yinh anhe,
wal ebꞌnaj uchkꞌanto hakonhobꞌ yebꞌ chiꞌinito sunil tzet ay hach yelxakanh ebꞌnaj yinh anhe.
18 Ikanh hasat, kat hawilni yinhla ishoyanil, ilkꞌanabꞌi,
sunil ebꞌnaj tiꞌ xaꞌiskutxbꞌako isbꞌa takꞌatanh.
Chalni Komam Jahawil hakaꞌ tiꞌ: Hanintiꞌan chiwaqꞌ bꞌinaho inkawilan,
chiwalnihan tato sunil ebꞌnaj tiꞌ, hakaꞌ xilqꞌape kaw niman yelapnoj,
hak tuꞌ chuko ebꞌnaj tawinh, hakaꞌ yelawil hunu ix ix chimohyi, hak tuꞌ ye ebꞌnaj.
19 Yuto haꞌ konhobꞌ uchkꞌabꞌilayoj,
etabꞌiltoj, matxa anma sat; wal tinanh xin chinohayo anma sat.
Wal ebꞌnaj etanto xin nahat chiꞌalaxkanto ebꞌnaj.
20 Wal ebꞌnaj hakꞌahol kꞌaynaxato hawu, chalikto ebꞌnaj yul hatxikin hakaꞌ tiꞌ:
“Huneꞌ txꞌotxꞌ konhobꞌ tiꞌ kaw nichꞌanchꞌan txꞌotxꞌ,
wal xin watxꞌe bꞌay chonhehanh,” xhi ebꞌnaj.
21 Chawalni yebꞌ hawanma hakaꞌ tiꞌ: “¿Mak aqꞌni hunteqꞌan tiꞌ wuninalojan?
Yuto hanintiꞌan maxhtikꞌa wuninalan,
machi yu wuninwihan yuto hanintiꞌan bꞌejbꞌilinkanojan,
nahat wekanilojan inchukilan, mak xin aqꞌni chꞌibꞌo ebꞌnaj
¿bꞌay xin aykano hunteqꞌan ebꞌnaj tiꞌ?” kachi,» xhi Komam.
22 Yalnipaxo Komam Jahawil: «Chiwaqꞌan chejbꞌanile tet ej nime konhobꞌ,
kat waqꞌnihan yechel tet nixhte konhobꞌ,
yunhe yiniti heyuninal; ebꞌnaj hekꞌahol chichel-laxti ebꞌnaj,
haxa ebꞌix hekutzꞌin yibꞌanh iswixikꞌ ebꞌnaj chꞌahtoj.
23 Haꞌ ebꞌnaj rey chexaqꞌni chꞌibꞌoj, haxa ebꞌix reina xin chexilni,
chiꞌay jahno ebꞌnaj sat txꞌotxꞌ tesataj, kat isleqꞌnikanh ebꞌnaj pojoj ayko iskawilal heyoj;
kat yohtanhenilo ebꞌnaj tato hanintiꞌan Yahawil hinan,
machi xin chikan yinh txꞌixobꞌal mak chikawxi iskꞌul winhan.
24 ¿Chimyu yilaxilo yul isqꞌabꞌ hunu naj kaw ay yip, tzet ye tuꞌ yiqꞌ naj yinh howal?
¿Chimyu iskol-laxilo hunu naj preso yul isqꞌabꞌ hunu naj yahaw kaw howkanoj?» xhi Komam.
25 Yajaꞌ Komam Jahawil chalni hakaꞌ tiꞌ:
«Yinh kaw yeli naj presowom chiꞌilaxilo naj yul isqꞌabꞌ naj kaw ay yip,
haxa tzet chiyito hunu naj yahaw kaw how iswiꞌ, chiꞌilaxilo tet naj;
haninan chiwaqꞌan howal heseleloj yebꞌ mak chiꞌaniko howal teyinh,
haninan chinkolilojan heyuninal.
26 Haxa ebꞌnaj elqꞌanto tzet ay hex,
chiskꞌuxuto ebꞌnaj ischibꞌehal wuhan,
kat yukꞌikanh ebꞌnaj yu ischikꞌil hakaꞌto vino;
hak tuꞌ chu yohtanhenilo sunil anma tato hanin Yahawilintiꞌan.
Hekolomal wehan, haninan chexinkolan,
kaw aykano wipan, isDiosal yaꞌ Jacob,» xhi Komam.