Komam Jahawil chikolwa yinh mak chikawxi iskꞌul yinh Komam
50
Hak tiꞌ yu yalni Komam Jahawil:«Tato xaꞌinpoh hinbꞌahan yebꞌ hemiꞌ,
¿bꞌaytuꞌwal ay hunu hum yet pohlebꞌahil tinanh? Tato haninan kexintxonhan chejabꞌoj, ¿mak tet ay inkꞌasan, yuxin kexintxonhilojan?
Wal xin yu hetxꞌojal yuxin kextxonhlaxtoj yebꞌ xin yu hemul yuxin bꞌejlaxkano hemiꞌ.
2 ¿Tzet yinh yuxin hayet wulan machi hunu mak tiꞌ ilcha wuhan, yet wawihan machi hunu mak tiꞌ taqꞌwi?
¿Tom xapaxilo yip inqꞌabꞌan yuxin mach chu kexinkolnilojan? ¿tom machi wipan kexinbꞌejtzonilojan?
Hayet chinkachwahan yinh ha mar, kat istajilo haꞌ, haxa ha haꞌ chiꞌekꞌ yojomal, chiwaqꞌ tajokanhan haꞌ,
kat isqꞌato noꞌ kay ay xol haꞌ yu manhhaꞌil, kat iskamilo noꞌ yu tajintiꞌal.
3 Chiwaqꞌ qꞌejholohojan satkanh, hakaꞌto chiwakojan txꞌanh saco yenheloj, txꞌanh yet bꞌiskꞌulal,» xhi Komam.
4 Haꞌ Komam Jahawil chiꞌaqꞌni inhelanilan intzotelan yunhe kꞌul chu waqꞌnihan yip yanma makta sikina aya,
hunun sahabꞌ sakꞌayal chiyaqꞌ hajlo intxikinan yu wabꞌenan tzet chala,
chiwabꞌehan hakaꞌ yabꞌen ebꞌnaj winaj ay ishelanil.
5 Haꞌ Komam Jahawil haꞌ hajni intxikinan,
mach xin manhkꞌomo wute hinbꞌahan,
mach kinmeltzopaxojan wintajan.
6 Waqꞌ maqꞌaꞌ innimanilan tet ebꞌnaj kinmaqꞌnihan, matzet walan yet yinilo ebꞌnaj xil intiꞌan,
mach webꞌato insatan yet kinisbꞌuchnihan ebꞌnaj yebꞌ yet istzubꞌliko ebꞌnaj winhan.a
7 Yuto haꞌ Komam Jahawil kolwa winhan yuxin mach kintxꞌixwihan.
Yu huneꞌ tuꞌ yuxin inlinhbꞌa hinbꞌahan hakaꞌ hunu chꞌen nime chꞌen, kaw xin wohtajan tato mach chinkanan yinh txꞌixwilal.
8 Kawil yeko inkꞌatanhan huneꞌ mak chinkolnihan, ¿mak chu yaqꞌni howal winhan?
Ta ay maka tijabꞌi, ¡chiwilwe hinbꞌahan yebꞌi!
¿Mak chu yok aqꞌokꞌule winhan? Ta ay maka ¡hitzojabꞌiko inkꞌatanhan!
9 Haꞌ Komam Jahawil chikolwa winhan, ¿mak chu isqꞌanniti isyaꞌtajil wibꞌanhan?
Sunil ebꞌnaj ayko ishowal winhan chiꞌichambꞌilo ebꞌnaj hakaꞌ isxilbꞌilo xilqꞌape, chikꞌuxlaxto ebꞌnaj yu noꞌ ih.
10 ¿Aymi hunu mak texol tiꞌ chixiw tet Komam Jahawil, kat yabꞌen tzet chiyal ischejabꞌ Komam?
Haꞌ makta chiꞌekꞌ xol qꞌejholo, machi sajilqꞌinal tet,
yilal iskawxi iskꞌul yinh isbꞌi Komam Jahawil, kat yiqꞌni yip yanma yinh isDiosal.
11 Sunil hex tiꞌ cheyako qꞌaꞌ, hoybꞌil hexxayo yu hetzejtah,
yuxin ekꞌanhwe yinh issajilqꞌinal heqꞌaꞌ tuꞌ yebꞌ hetzejtah hetzujbꞌa.
Haꞌ Komam chiꞌaqꞌni ispaj teyet, chexmujlaxto xol isyaꞌtajil.