Tzotiꞌ chꞌaqꞌlax yaqꞌlobꞌalo iskꞌul anma ah Sión
51
Chal Komam Jahawil hakaꞌ tiꞌ:«Hex tzujan hex yinta istoholal yebꞌ hex chesayikꞌo Komam Jahawil.
Ilwe chꞌen chꞌen bꞌay kexhoslaxiloj, yebꞌ isholanil iskꞌul chꞌen chꞌen bꞌay kexhokꞌlaxkanh.
2 Ilwe yaꞌ Abraham, heyichmam yebꞌ yaꞌ Sara bꞌay kexpitzkꞌatij.
Hayet wawtenan yaꞌ Abraham tuꞌ machi yuninal yaꞌ,
yajaꞌ wayojan isyaxil yibꞌanh yaꞌ, waqꞌni pohchahojan yuninal yaꞌ.
3 Yinh kaw yeli, hanin Yahawilintiꞌan chiwaqꞌan yaqꞌlobꞌal iskꞌul konhobꞌ Sión,a
chiwaqꞌnipaxojan yaqꞌlobꞌal iskꞌul sunil iskonhobꞌla uchkꞌabꞌiltoj,
chinmeltzokojan txꞌotxꞌ desierto hakaꞌ Edén,
kat inmeltzonpaxikojan txꞌotxꞌ matzet chichꞌibꞌ sat hakaꞌ inpeyabꞌan hanin Yahawilintiꞌan.
Haꞌ bꞌey tuꞌ hanhe tzalahilal aya, kat yal-lax kꞌul-la tzotiꞌ winhan, kat yalaxiko bꞌit.
4 Hex inkonhobꞌtiꞌan hajbꞌawe hetxikin wetan, abꞌewe tzet chiwalan hex konhobꞌ wetan heyehi, yuto haninan chiwaliltojan chejbꞌanile,
chiwaltojan istoholal chiꞌijbꞌanikꞌo ej konhobꞌ.
5 Kawilxa yeti istzꞌayikal bꞌay chinyelojan istoholal yebꞌ bꞌay chiwaqꞌan kolbꞌanile, chiwilnihan yinh tzet chiꞌeliko ej konhobꞌ.
Haꞌ anma ay yulajla konhobꞌ ay istiꞌla haꞌ mar, echmabꞌil hinan yu, haꞌ inqꞌabꞌan xin ayko yipo iskꞌul.
6 Tꞌanhxanhwekanh satkanh, tꞌanxanwepaxayo sat txꞌo txꞌotxꞌ yuto haꞌ satkanh, chikꞌayokanh hakaꞌ iskꞌaykanh nhubꞌ,
haxa txꞌo txꞌotxꞌ chiꞌichambꞌiloj, hakaꞌ isxilbꞌilo hunu xilqꞌape, kat istanhpaxilo sunil makta ay sat txꞌotxꞌ,
yajaꞌ wal kolbꞌanile chiwaqꞌan aynhetikꞌa yinh sunilbꞌal ej tiempo, haxa istoholal chinwatxꞌehan mach chitanhiloj.
7 Abꞌewe hex heyohta istoholal, yebꞌ hex konhobꞌ cheyako inchejbꞌanilan yul heyanma.
Mach chexxiwi yet chexbꞌalax yu ebꞌnaj winaj, machojabꞌ chipax heyip yet chexbꞌuchlaxi.
8 Yuto haꞌ ebꞌnaj tuꞌ chitanhilo ebꞌnaj hakaꞌ chu istanhilo hunu xilqꞌape yu noꞌ ih;
hakaꞌ chu istanhilo noꞌ lana yet chiꞌok isnoqꞌal noꞌ,
yajaꞌ wal istoholal chinwatxꞌehan aynhetikꞌa yinh sunilbꞌal tiempo, haxa kolbꞌanile chiwaqꞌan aynhetikꞌa yinh tohbꞌalqꞌinal,» xhi Komam.
9 ¡Ilo hawayanh, ilo hawayanh, Mam Jahawil!
¡Ahanhwano yinh sunil hawip, ilo hawayanh hakaꞌ yet payat tiempo!
¿Tom maxhtaj hach tiꞌ hakokꞌ tzokꞌnheto noꞌ Rahab, hawanipaxiko islahwilal noꞌ dragón tuꞌ?
10 ¿Tom maxhtaj hach hawaqꞌ tajokanh haꞌ mar, bꞌay ay ha haꞌ kaw nahat yehayto yich,
hak tuꞌ xin hameltzoko yich haꞌ tuꞌ bꞌehal yu yekꞌto anma hakoliloj?
11 Yinh kaw yeli chimeltzoho makta chiskol Komam Jahawil,
chibꞌitni yet chimeltzo bꞌey Sión, tzalahilalnhetikꞌa ye hunun tzꞌayik.
Matxa bꞌiskꞌulal, matxa isyaꞌtajil chila, wal xin tzalahilalxanhe yehi.
12 Hak tiꞌ yalni Komam hakaꞌ tiꞌ: «Hanintiꞌan, haninan chiwaqꞌan yaqꞌlobꞌal heyanma.
¿Tzet yinh xin chexxiw tet ebꞌnaj winaj kamikal yehi, yebꞌ tet iskꞌahol ebꞌnaj winaj lahan hakaꞌ teꞌ telaj?
13 Hex tiꞌ xahenahulnheto Komam Jahawil, Komam kexwatxꞌeni,
Komam watxꞌenhe satkanh yebꞌ txꞌo txꞌotxꞌ.
Yuxin sunilbꞌal tzꞌayik chexxiw tet ebꞌnaj chexaqꞌni ekꞌoyaꞌ yu kexistanhtzeniloj,
yajaꞌ wal tinanh ¿bꞌaytuꞌwal ay ishowal ebꞌnaj chꞌaqꞌni ekꞌoyaꞌ heyanma?
14 Haꞌ ebꞌnaj chiꞌekꞌyaꞌ yul teꞌ preso, toxa chibꞌejtzolax ebꞌnaj,
matxa chikam ebꞌnaj yul preso kaw yaꞌtaj, matxa chiyaqꞌle ebꞌnaj wahil.
15 Yuto hanin Yahawilintiꞌan, haninan heDiosal, haninan chiwaqꞌbꞌilojan haꞌ mar,
kat yekꞌ tixhla ishujuyal haꞌ yu ishowal wuhan,
hanintiꞌan, Yahawil kaw aykano yip, hak tuꞌ inbꞌihan.
16 Wakojan intzotiꞌan yinh hetiꞌ, waniko inqꞌabꞌan heyenheloj haninan lehnheto satkanh,
wanaytojan xeꞌ txꞌo txꞌotxꞌ, walnihan tet konhobꞌ Sión:
“Hach tiꞌ inkonhobꞌan hawehi,” kinchihan,» xhi Komam.
17 ¡Ilo hawayanh, ilo hawayanh, ahanhwano Jerusalén, xahawabꞌe isyaꞌil ishowal Komam Jahawil!
Hakaꞌ mak chiꞌukꞌni islahobꞌal istatil yich vino, masanta chiꞌukꞌikanokanh.
18 Haꞌ xol sunil hawuninal pitzkꞌahi, machi hunu mak tiꞌ chachijbꞌani,
machi hunu mak tiꞌ chachxekni xol hawuninal hawaqꞌ chꞌibꞌoj.
19 Haꞌ kabꞌebꞌ isyaꞌtajil tiꞌ hul tawibꞌanh; uchkꞌalaxto hakonhobꞌ,
yelqꞌalaxto tzetaj ay hach, iskam hawet konhobꞌ yu wahil, yebꞌ yu chꞌen espada.
¿Maktaxka chitzꞌay iskꞌul tawinh? ¿Mak chiꞌaqꞌni isnimanbꞌal hakꞌul?
20 Pax yip hawuninal, iskankano pakꞌno ebꞌnaj sunil bꞌayejtuꞌwal yinhla istxikin bꞌeh,
iskankano ebꞌnaj yul txꞌanh txꞌanh hakaꞌ noꞌ miꞌe sajche;
nohayo istatil ishowal Komam yibꞌanh ebꞌnaj, haꞌ ton ishowal Komam Dios, Komam ay hach yet.
21 Yuxin abꞌe hach lanhan hawaqꞌlen isyaꞌtajil tiꞌ,
hach tiꞌ hakaꞌ ukꞌum hawehi, yaj maxhtaj yu vino.
22 Hak tiꞌ yu yalni Komam Jahawil, Komam hawahawil yebꞌ haDiosal, Komam kolni iskonhobꞌ hakaꞌ tiꞌ:
«Chiwilojan vaso ayko yul haqꞌabꞌ bꞌay ayayto vino kaw tat,
aqꞌni kꞌayo hakꞌul yu isyaꞌtajil inhowalan wayojan tawibꞌanh, matxa xin chawukꞌ hunelxa.
23 Chiwakojan vaso tuꞌ yul isqꞌabꞌ ebꞌnaj kaxhaqꞌni ekꞌoyaꞌ, ebꞌnaj halni tawet hakaꞌ tiꞌ:
“Ayanhpajnoj sat txꞌotxꞌ, kat jekꞌtojanh tawibꞌanh,” xhi tawet.
Hak tuꞌ yu hawaniko hawichinh isbꞌeho ebꞌnaj hakaꞌ txꞌotxꞌ, yu isbꞌelwikꞌo ebꞌnaj yibꞌanh,» xhi Komam.