Komam Dios chiskolilo konhobꞌ Sión bꞌay ayko chejabꞌoj
52
¡Ilo hawayanh, ilo hawayanh konhobꞌ Sión, iqꞌ hawip, hakaꞌ xil haqꞌap chukoj!¡Konhobꞌ Jerusalén, ako xil haqꞌabꞌ kaw kꞌulchꞌan jilni, hach iskonhobꞌ Komam Dios,
yuto matxa bꞌaqꞌinh chulu ebꞌnaj mach ayoko circuncisión yinh yul hakonhobꞌ,
yebꞌ ebꞌnaj mach sajo yehi matxa chul ebꞌnaj yu kach yinito ischejabꞌoj!
2 Tzikilo pojoj tawinh, ahanhwanoj, kat hawok tzꞌonhnoj konhobꞌ Jerusalén.
Hach tiꞌ ayachiko preso, puhilo txꞌanh txꞌanh ayko yinh hanuqꞌ, hach iskutzꞌin Konhobꞌ Sión.
3 Yuto hak tiꞌ chiyu yalni Komam Jahawil hakaꞌ tiꞌ:
«Machi melyu aqꞌlax tawinh yet kach ilaxto chejabꞌoj,
yuxin machi melyu chiꞌaqꞌlaxpaxo yet chachmeltzoti hunelxa,» xhi Komam.
4 Yuto hak tiꞌ yu yalni Komam Dios Jahawil hakaꞌ tiꞌ: «Haꞌ inkonhobꞌtiꞌan tokano chejabꞌo bꞌey Egipto yet payat tiempo,
iskankano bꞌey tuꞌ, haxa yet tzujanxa yilaxto chejabꞌo yu ebꞌnaj asirio, yajaꞌ mach ismul inkonhobꞌan,» xhi Komam.
5 Wal tinanh xin chal Komam: «¿Tzet xin wal wutenan tinanh?
Haꞌ inkonhobꞌtiꞌan machi ismul tet ebꞌnaj, yajaꞌ ilaxto chejabꞌo yu ebꞌnaj.
Haꞌ xin ebꞌnaj ok yahawo inkonhobꞌ tuꞌan kaw aqꞌlax ekꞌoyaꞌ yanma inkonhobꞌan yu ebꞌnaj,
chilannhetikꞌa xin isbꞌuchlax inbꞌihan sunilbꞌal tzꞌayik,» xhi Komam.
6 Yalnipaxo Komam: «Yu huneꞌ tuꞌ yuxin ay huneꞌ tzꞌayik tiꞌ bꞌay chiyohtanhelo inkonhobꞌtiꞌan inbꞌihan,
yuto hankawinan chintzoteltiꞌan, ayinikojan yetbꞌiho yinh huneꞌ tzꞌayik tuꞌ,» xhi Komam.
7 ¡Kaw saqꞌal yet mak chꞌekꞌ yalaꞌkꞌo tzotiꞌ tzalahilal yoki yinhla istzalanil wonhan!
Mak chihalnikꞌo aqꞌankꞌulal, yebꞌ chalni tzotiꞌ kꞌul, mak chipujbꞌanikꞌo kolbꞌanile chaqꞌ Komam,
mak chihalni tet konhobꞌ Sión hakaꞌ tiꞌ: «¡HaDiosal ayko Yahawil!» xhi huneꞌ anma tuꞌ.
8 «¡Abꞌewej! Chiꞌel yaw ebꞌnaj chitanhen konhobꞌ yinh kaw ip, chiꞌawi ebꞌnaj yinh kaw tzalahilal,» xhi.
Yuto haꞌ kaw isbꞌaqꞌ sat ebꞌnaj chiꞌilni yul Komam Jahawil iqꞌwal yinh anma ah Sión.
9 ¡Bꞌitnhewe bꞌit, kat istzalapaxo Jerusalén uchkꞌabꞌiltoj,
yuto mayaqꞌ Komam Jahawil yaqꞌlobꞌal iskꞌul iskonhobꞌ, maskolnilo Komam Jerusalén!
10 Istꞌilbꞌa Komam Jahawil isqꞌabꞌ kaw ay yip sata sunil nimeta konhobꞌ, haꞌ ton isqꞌabꞌ machi istxꞌojal,
chiyilni sunil ej konhobꞌ ay sat yibꞌanhqꞌinal tiꞌ kolbꞌanile chiyaqꞌ koDiosal.
11 ¡Pohwelo hebꞌa, pohwelo hebꞌa, elanhwe bꞌey tuꞌ!
¡Mach chetzabꞌ tzetaj ye tuꞌ mach sajoj, elanhwe xol anma tuꞌ,
hex cheyikꞌo ismunlabꞌal Komam Jahawil sajnhewe hebꞌa!
12 Mach yilalo chexel yinh anhe yet chexel tuꞌ, mach chexel hakaꞌta lanhan heyelkanh,
yuto haꞌ Komam Jahawil chibꞌabꞌi tesataj, yebꞌ xin tzujanpaxo teyintaj, isDiosal Israel.
Isyaꞌtajil chiyaqꞌle ischejabꞌ Komam Jahawil
13 Chalni Komam Jahawil hakaꞌ tiꞌ: «Haꞌ inchejabꞌan kaw chiqꞌoji, kaw niman yelapnoj,
kaw chiꞌilaxkanh, kat yalaxiko yul yehobꞌal kaw niman yelapnoj.a
14 Kaw txꞌiꞌal anma chikꞌay iskꞌul yilni, kaw matxatikꞌa anmaho yilot yinh,
kaw matxatikꞌa nichꞌano iskꞌulchꞌanil yul sat anma yu tzet chiꞌutelaxi.b
15 Yajaꞌ kaw txꞌiꞌal ej nime konhobꞌ chikꞌaypaxo iskꞌul yu, matxa tzet tzꞌaj yalaꞌ ebꞌnaj rey yinh sat,
yuto chiyil ebꞌnaj tzetaj ye tuꞌ maxhtotikꞌa abꞌebꞌilo yu,
kat istxumni ebꞌnaj tzetaj maxhtotikꞌa xayabꞌe,» xhi Komam.