53
¿Mak xayayto yul yanma yinh tzotiꞌ xajala?Yebꞌ xin ¿mak yibꞌanh isyelo Komam Jahawil yip isqꞌabꞌ?a
2 Hakaꞌ ischꞌibꞌ iswol hunu teꞌ xeteꞌ bꞌey txꞌotxꞌ tajin txꞌotxꞌ,
hak tuꞌ ischꞌibꞌ naj sata Komam Jahawil. Mach ochebꞌalo jilni naj,
mach kawla winajo yil-laxi, mach chitzala kokꞌul jilniko yinh.
3 Wal xin yahbꞌil naj, hinbꞌilkanilto xol ebꞌnaj winaj, chiyaqꞌle naj isyaꞌtajil,
chiyilni naj isyaꞌtajil, hakaꞌto chijebꞌato kosat yu mach chijoche jilaꞌko yinh naj, yahlax naj, mach xin xahano jil naj.
4 Yinh kaw yeli yibꞌanh naj tokano yabꞌil ayko jinh, yabꞌen naj isyaꞌil koseleloj.
Hanhonh tiꞌ konah tato haꞌ Komam Dios chimaqꞌni naj, yaniko islahwilal naj, yaqꞌlax ekꞌoyaꞌ yanma naj.
5 Yajaꞌ wal xin yu komanhkꞌomal yuxin alaxiko islahwilal naj, aqꞌlax ekꞌoyaꞌ isnimanil naj yu komul.
Yu ej isyaꞌtajil yaqꞌle naj yuxin chikochah aqꞌankꞌulal, haꞌ yu islahwilal naj oki, yuxin konhanhchakanoj.b
6 Sunilonh tiꞌ, xakohekꞌilo kobꞌa hakaꞌ noꞌ meꞌ chisajlemitoj, hununonh konhtokano yulaj bꞌeh bꞌay yoche kokꞌul,
yajaꞌ wal Komam Jahawil yato Komam komul kosunil yibꞌanh naj.
7 Ekꞌyaꞌ yanma naj, yilni isyaꞌtajil, matzet yalah.
Hakaꞌ yet chiꞌilaxto noꞌ meꞌ potxꞌlaxoj, hakaꞌpaxo noꞌ meꞌ yet chiꞌilaxilo xil, matzet yal naj, machi tzotiꞌ yaqꞌ ispajoj.
8 Ilaxto naj preso, mach xin taj istoholal watxꞌelax yinh, yilaxilo isqꞌinal.
Machi hunu mak tiꞌ naniti naj. Wal xin ilaxilo naj xol anma ay sat txꞌo txꞌotxꞌ tiꞌ,
alaxiko islahwilal yu ismanhkꞌomal wet konhobꞌan.
9 Hayet iskam naj ayko naj yinta ebꞌnaj txꞌoj,
yajaꞌ mujlax naj bꞌay chimujlax ebꞌnaj qꞌalom,
machi xin nichꞌano ismul, yebꞌ xin maxhtikꞌa tzet yala.
10 Hak tuꞌ el yinh iskꞌul Komam Jahawil, yuxin yako Komam naj yul isqꞌabꞌ isyaꞌtajil yebꞌ yunhe yekꞌyaꞌ yanma.
Lahwi tuꞌ, yaniko isbꞌa yinh kamikal, yinh xahanbꞌalil,
yu yaqꞌlax tanho mule, kat yitzitzbꞌikanh,
ay xin iskawil yinh txꞌiꞌal ej tzꞌayik chiyilni naj yuninal;
yu naj xin chiyij isbꞌa yinh kaw kꞌul yinh tzet choche Komam Dios.
11 Hayet chilahwi yekꞌyaꞌ yanma naj,
kaw chitzala iskꞌul yilni ta mach nabꞌnheho yaqꞌle isyaꞌtajil.
Hak tiꞌ xin yalni Komam Jahawil: «Haꞌ inchejabꞌ kaw toholkanoj kaw tzetkꞌa mak chako naj yinh istoholal,
haꞌ chal yelapnoj haꞌ ton ebꞌnaj chiꞌohtanheniloj,
yuto haꞌ naj chiꞌinilo istxꞌojal ebꞌnaj.
12 Yuxin haninan chiwaqꞌan ismajul naj xol ebꞌnaj nime winaj,
kat yok naj yitxqꞌanoto qꞌalomal yinta ebꞌnaj winaj ay yip,
yuto yako isbꞌa naj yinh xahanbꞌalil masanto kamikal.
Huneꞌnhe yu iskam naj yebꞌ ebꞌnaj mulum.
Hak tuꞌ yu yinilo naj ismul txꞌiꞌal anma, istxahli naj yinh ismul anma tuꞌ,» xhi Komam.