Iskꞌulchꞌanil iskꞌul Komam Jahawil yinh Israel
54
Chalni Komam Jahawil hakaꞌ tiꞌ:«¡Hach ix maxhtikꞌa hawunin; machi hunu unin xapitzkꞌa tawinh!
¡Wal tinanh tzalahanh, bꞌitnanh yinh kaw ip hach maxhtikꞌa hawohtajo isyaꞌtajil ispitzkꞌa nixhte unin! Yuto haꞌ ix ix bꞌejbꞌilkanoj kaw ekꞌbꞌalto yunin ix sata ix moyom.a
2 Aqꞌ chꞌibꞌolo hamantiado, haxinwal nimajal chiꞌeliko yul bꞌay ay hach, chahitzni sat hacortina,
hak tuꞌ xin mach witzꞌano chawukto bꞌay ayach. Ako yaqꞌbꞌil istxꞌanhal hamantiado,
kat hanhikꞌni, kat hakawxenayo yestakahil.
3 Yuto chachhitzto yinh hawatxꞌqꞌabꞌ, kat hahitzto yinh hamekqꞌabꞌ.
Haꞌ txꞌotxꞌ nimeta konhobꞌ chiꞌokkano ismajulo hawuninal,
kat yehoyo yulaj nimeta konhobꞌ bꞌejbꞌilkanoj.
4 Mach chaxhxiwi yuto mach chisomchakanh hanabꞌal,
mach chaxhtxꞌixwi yuto matxa chaxhbꞌalaxoj,
wal xin chanahulnheto txꞌixwilal hawil yet qꞌopo hach, matxa chanapaxti isyaꞌtajil hawil yet hunix hach.
5 Yuto hawichamil haꞌ ton Mak kaxhwatxꞌeni.
Yahawil kaw aykano yip, haꞌ xin isbꞌi.
Huneꞌ chachkolni. Komam machi istxꞌojal, isDiosal Israel.
Huneꞌ chiyij isbꞌi Isdiosal sunil anma ay yul sat yibꞌanhqꞌinal.
6 Yuto hakaꞌ hunu ix ix kaw bꞌiskꞌulal yehi,
bꞌejbꞌilkano yu yichamil, hak tuꞌ hawehi.
Wal tinanh xin kach yawte Komam Jahawil.
Lahan hach hakaꞌ hunu ix ix bꞌejbꞌilkano yinhtax isqꞌopohal yu yichamil,» xhi Komam Dios, haDiosal.
7 Yalni Komam Jahawil: «Yinh hanikꞌnhechꞌan tiempohal kach inbꞌejkanojan,
yajaꞌ chachinchahpaxojan yinh sunil iskꞌulchꞌanil inkꞌulan hunelxa.
8 Hunepnhechꞌan tit inhowalan, webꞌanto insatan tawet,
yajaꞌ chinyebꞌalojan iskꞌulal tawinh,
haꞌ iskꞌulal inkꞌulan tiꞌ xin matxa bꞌaqꞌinh chitanhi,» xhi Komam Jahawil, haKolomal.
9 Chalnipaxoj Komam: «Hakaꞌ yet waqꞌni bꞌinaho inbꞌihan
yet walnihan tet yaꞌ Noé tato matxa chiwayojan hunuxa niman yaxnhabꞌ yibꞌanh txꞌo txꞌotxꞌ,
hak tuꞌ chu waqꞌnipaxo bꞌinaho inbꞌihan,
chiwalnihan tato matxa chitit inhowalan tawinh, matxa chachinkachan.
10 Yuto chibꞌili ej witz, kat isbꞌilipaxo ej wonhan,
yajaꞌ wal iskꞌulchꞌanil inkꞌulan mach chispohilo isbꞌa tawinh.
Yebꞌpaxo trato yet aqꞌankꞌulal koxol, mach chitanhpaxoj,»
xhi Komam Jahawil, Komam chitzꞌay iskꞌul tawinh.
11 Chalnipaxo Komam: «Kꞌanchꞌan hach Jerusalén paxilo hawip yu ej nimeta isyaꞌtajil ekꞌto tawibꞌanh,
machi xin mak aqꞌni yaqꞌlobꞌal hakꞌul.
Wal tinanh xin chiwayojan chꞌen chꞌen hacimientohalo yibꞌanh chꞌen kaj jilni yelawil,
kat inwatxꞌenaytojan haxeꞌ yibꞌanh chꞌen zafiro.b
12 Haꞌ chꞌen chꞌen kꞌulchꞌan jilni chiwakojan yelawilo haventanah,
chiwanipaxikojan chꞌen kaj yelawilo hapulta,
haxa yinh chꞌen kꞌubꞌ xin, haꞌ chꞌen chꞌen kaw kꞌulchꞌan jilni chiwakojan.
13 Sunil hawuninal chikuylax yu Komam Jahawil.
Kaw xin niman aqꞌankꞌulal chiyil hawuninal.
14 Haꞌ xin istoholal, haꞌ chꞌok hawelawiloj,
nahat chawulo yinh mak chachetani yuxin matxa chaxhxiwi.
Haꞌ xiwkilal xin matxa chihitziko hakawilal.
15 Ta ayto mak chiyako howal tawinh,
matxa ayinikojan yetbꞌihoj,
yajaꞌ huneꞌ mak chiꞌaniko howal tawinh tuꞌ, chiꞌaykꞌay tasataj.
16 Hanintiꞌan inwatxꞌehan naj chakꞌom hierro,
naj chixuni tzaqꞌaqꞌ chiwatxꞌen chꞌen chꞌen yet howal,
haninpaxojan watxꞌenhe naj chꞌokniko chꞌen chꞌen yet howal yu, yu istanhtzeniloj.
17 Machi hunu chꞌen chꞌen yet howal chu kach istanhtzeniloj.
Haꞌ ebꞌnaj chiꞌok aqꞌokꞌule tawinh yinh tzet chachelikoj,
yibꞌanh ebꞌnaj, chitokano isyaꞌtajil hawu.
Haꞌ hunteqꞌan iskꞌulal tiꞌ chischah ebꞌnaj inchejabꞌan ismajuloj,
haꞌ iskolbꞌanil ebꞌnaj tuꞌ xin haninan chiwaqꞌan,» xhi Komam Jahawil.