Iskꞌulchꞌanil iskꞌul Komam Dios matanil chꞌaqꞌlax tet sunil anma
55
¡Chalni Komam hakaꞌ tiꞌ:«Sunil hex chitaj hetiꞌ,
titanhwej kat heyukꞌni ha haꞌ, haxa hex machi hemelyu titanhwej kat hewaꞌ yinh matanil!
¡Cheyiqꞌni hevino yebꞌ helech matanil, mach cheyaqꞌ istohol!
2 ¿Tzet yinh xin chekꞌaytzelo hemelyu yinh tzet ye tuꞌ mach itahoj?
¿tzet yinh xin chekꞌaytzelo istohol hemunil yinh tzet ye tuꞌ mach chinoh hekꞌul yu?
¡Kam hajbꞌawe hetxikin yinh tzet chiwalan,
haxinwal cheloh itah kaw kꞌul yebꞌ itah kaw xuqꞌ chiꞌaqꞌni tzalaho heyanma!
3 Kam hajbꞌawe hetxikin heyabꞌen tzet chiwalan kat hetit inkꞌatanhan.
Abꞌewe tzet chiwalan, haxinwal ay hekawil,
kat inwatxꞌenan intratohan teyet yinh sunilbꞌal tiempo,
chinyijenan tzet xawaltehan yu iskꞌulchꞌanil inkꞌulalan yinh yaꞌ rey David.a
4 Haninan wakojan yaꞌ tuꞌ yaqꞌni isbꞌa isyenilo wipan tet ej konhobꞌ,
wanikojan yaꞌ iswiꞌehaloj yebꞌ iskuywawomo nimeta konhobꞌ.
5 Haꞌ tinanh xin cheyawte anma mach ohtabꞌilo heyu,
haxa anma mach ohtanhe hex, chiꞌapni yinh anhe tekꞌatanh,
huneꞌ tiꞌ chiyu yu Komam Jahawil, heDiosal,
Komam machi istxꞌojal, isDiosal Israel, haꞌ chiꞌaniko hemay, xhi Komam.
6 Saywelo Komam Jahawil yaqꞌ isbꞌa chito isje yilchalo heyu;
awtewe Komam teyinh, yaqꞌ isbꞌa kawilto yeko tekꞌatanh.
7 Isbꞌejabꞌkano naj txꞌoj isbꞌeybꞌalnhen istxꞌojal, kat isbꞌejnikano naj winaj isnahni istxꞌojal,
kat ismeltzoko yul isqꞌabꞌ Komam Jahawil, kat istzꞌay iskꞌul Komam yinh naj,
yuto kaw hantakano iskꞌulchꞌanil iskꞌul Komam chaqꞌni nimankꞌulal yinh ismul anma.»
8 Chalni Komam hakaꞌ tiꞌ: «Haꞌ tzet chiꞌekꞌ yinh innabꞌalan mach lahano hakaꞌ tzet chiꞌekꞌ yinh henabꞌal hex tiꞌ,
hak tuꞌ xin hebꞌeh mach lahano hakaꞌ inbꞌehan.
9 Hakaꞌ isnahatil yekanh satkanh yibꞌanh txꞌo txꞌotxꞌ,
hak tuꞌ xin inbꞌehan ekꞌbꞌal nahat yekanh sata hebꞌeh,
haxa tzet chiꞌekꞌ yinh innabꞌalan ekꞌbꞌal niman yelapno sata tzet chiꞌekꞌ yinh henabꞌal.
10 Hakaꞌ haꞌ nhabꞌ yebꞌ chꞌen chew chitit satkanh mach chimeltzo satkanh tuꞌ,
wal xin chiyaqꞌ chakꞌanbꞌo sat txꞌo txꞌotxꞌ, chaqꞌni txꞌotxꞌ sat tzꞌunubꞌ,
bꞌay chiꞌel hinhat chitzꞌunlaxi, yebꞌ tzet chislo anma.
11 Hak tuꞌ ye tzotiꞌ chiꞌelti yul intiꞌan,
mach chimeltzo inkꞌatanhan yinh nabꞌnhehal,
wal xin chiswatxꞌe tzet chiwochehan, chiyijni isbꞌa yinh tzet halbꞌil wuhan.
12 Yuto yinh tzalahilal chexel bꞌay ayexikoj, yinh aqꞌankꞌulal chexmeltzo bꞌey hekonhobꞌ hunelxa;
kat istzalapaxo ej witz yebꞌ ej wonhan teyintaj,
hakpax tuꞌ sunil teꞌ qꞌebꞌtaj chispoqꞌ isqꞌabꞌ teꞌ yu tzalahilal.
13 Haꞌ selelo teꞌ txꞌix haxa teꞌ tzꞌisis chichꞌibꞌi,
haxa teꞌ arrayán chichꞌibꞌ selelo teꞌ qꞌan txꞌix.
Haꞌ hunteqꞌan tiꞌ chiꞌaniko inmayan hanin Jahawil intiꞌan,
yechel chukaniko yinh sunilbꞌal ej tiempo,
machi bꞌaqꞌinhal chiꞌetaxi,» xhi Komam.