3. ISYOX MAJAN KUYBꞌANILE: TZOTIꞌ TET EBꞌNAJ ISRAEL CHIMELTZO BꞌEY ISKONHOBꞌ HUNELXA
(56:1–66:24)
Ispaj selel chꞌaqꞌlax tet makta chiyijen istrato Komam Dios
56
Hak tiꞌ yalni Komam Jahawil hakaꞌ tiꞌ:«Bꞌeybꞌalnhewe iskꞌulal, chewatxꞌen istoholal,
yuto kawilxa yeti bꞌay chexinkolilojan yebꞌ bꞌay chinyelojan istoholal,» xhi Komam.
2 Saqꞌal yet naj winaj chiyijen chejbꞌanile tiꞌ yebꞌ iskꞌahol naj winaj hakaꞌto chislaqꞌayoj chejbꞌanile,
chiskꞌubꞌan tzꞌayik xewilal, ay yelapno tzꞌayik tuꞌ yul sat naj,
naj kaw chisyaꞌilnhe isqꞌabꞌ, hak tuꞌ xin machi istxꞌojal chiswatxꞌe.
3 Ebꞌnaj mach Israeloj chiꞌoktzujno wintajan, machojabꞌ chiyal hakaꞌ tiꞌ:
«Machim chinischabꞌakojan Komam xol iskonhobꞌ,» mach xhihojabꞌ ebꞌnaj.
Machojabꞌ chalpaxo naj eunuco hakaꞌ tiꞌ:
«Hanintiꞌan lahan hinan hakaꞌ hunu teꞌ tajin teꞌ,» mach xhihojabꞌpaxoj.
4 Hanin Heyahawil, intiꞌan chiwalan hakaꞌ tiꞌ:
«Haꞌ ebꞌnaj eunuco chikꞌubꞌan tzꞌayik xewilal,
kat issayni iswatxꞌen tzet chiwochehan, chisyijen ebꞌnaj intratohan.
5 Chiwaqꞌan bꞌay chiꞌeh ebꞌnaj yul Watutan ayikto yulikto kꞌubꞌ,
chiwaqꞌnihan huneꞌ bꞌihe tet ebꞌnaj ekꞌbꞌal yelapno yibꞌanh ebꞌnaj kꞌahole yebꞌ ebꞌix kutzꞌine;
haꞌ huneꞌ bꞌihe chiwaqꞌan tet ebꞌnaj tuꞌ, aynhetikꞌa yinh sunilbꞌal tiempo, machi bꞌaqꞌinhal chitanhi.
6 Haxa yuninal ebꞌnaj mach Israeloj,
chiꞌoktzujno wintajan yu isyije tzet chiwalan yebꞌ chitzala winhan,
yunhe yok inchejabꞌojan yebꞌ sunil ebꞌnaj chikꞌubꞌan tzꞌayik xewilal,
ay yelapno tzꞌayik tuꞌ yul sat, chisyijen intratohan;
7 chiwitojan ebꞌnaj bꞌey wonhan wetan yehi,
chiwaqꞌnihan tzalahilal tet ebꞌnaj yul watutan yet txah yehi;
chinchahnihan no noqꞌ chisnhus ebꞌnaj yinh xahanbꞌalil wetan yibꞌanh altar,
yuto haꞌ watutan chihal-lax nha yet txah yinh,
yuto haꞌ yul watuttuꞌan chihul anma ay yulaj konhobꞌ txahloj,» xhi Komam.
8 Chalnipaxo Komam Jahawil, Komam chikutxbꞌaniko ebꞌnaj Israel sajlemitoj:
«Ayto hunteqꞌanxa mak mach heyetbꞌihoj chinkutxbꞌakojan tekꞌatanh.
Ebꞌnaj chiꞌijbꞌan konhobꞌ mach isnabꞌal
9 »Tijabꞌ sunil no noqꞌ chichiwahi,
yebꞌ noꞌ howla noqꞌ xoltelajil yu iskꞌuxnaytoj.
10 Yuto ebꞌnaj chitanhen inkonhobꞌtiꞌan,
lahan ebꞌnaj hakaꞌ ebꞌnaj mach chu yilni,
yebꞌ xin sunil ebꞌnaj ayko yinh sukal, sunil ebꞌnaj tuꞌ lahan ebꞌnaj hakaꞌ metx txꞌiꞌ suk,
mach chichiwahi,
ebꞌnaj tuꞌ tonhetikꞌa chimutzꞌla sat ebꞌnaj yu naj wayanh hilannhetikꞌa ebꞌnaj wayo chiꞌekꞌ tzꞌayik,
yochebꞌal ebꞌnaj wayanhnhetikꞌa chuhi.
11 Haꞌ ebꞌnaj tuꞌ,
lahan ebꞌnaj hakaꞌ metx txꞌiꞌ kaw echo iswaꞌi,
maxhtikꞌa chinoh iskꞌul.
Haxa ebꞌnaj chitanhen inkonhobꞌtiꞌan,
machi isnabꞌal ebꞌnaj. Sunil ebꞌnaj tuꞌ,
lanhan isbꞌelwito ebꞌnaj yul bꞌeh bꞌay choche iskꞌul;
hanhe tzet choche, haꞌ chiswatxꞌe,
nanantaxanhe bꞌay chitokano hunun ebꞌnaj.
12 Chalni ebꞌnaj: “¡Katawej, jukꞌuwe vino,
kat jukꞌtzenkanh kobꞌa yu howla vino,
haktikꞌapax tuꞌ chijute yet hekal hakaꞌ tinanh,
maka xin ekꞌbꞌalto chonhtzalahi!” xhi ebꞌnaj,» xhi Komam.