Isyaꞌtajil chiꞌay yibꞌanh Israel yu chiyiyo isbꞌa sata tioxh
57
Hayet chikam ebꞌnaj tohol isbꞌeybꞌal machi mak chiꞌekꞌ isnabꞌal yinh ebꞌnaj.Hayet chikampaxo ebꞌnaj kꞌul iskꞌul,
machi mak tiꞌ chitxumni tato yu iskol-laxilo ebꞌnaj yul isqꞌabꞌ isyaꞌtajil sat yibꞌanhqꞌinal tiꞌ.
2 Haꞌ sunil mak chibꞌeybꞌalnhe istoholal sata Komam Dios,
chixew yu kamikal kat ye yinh aqꞌankꞌulal.
3 Chalni Komam Jahawil hakaꞌ tiꞌ: «¡Yajaꞌ wal hex tiꞌ katawe bꞌey tiꞌ,
yu wilnihan tzet chexelikoj.
Hex tiꞌ yuninal anma mulum heyehi,
yuninal ebꞌnaj winaj ixlom yebꞌ ebꞌix ix winajlom heyehi!a
4 ¿Mak yinh kexbꞌuchwahi?
¿Mak yinh kextzoteli hehasbꞌanilti heyaqꞌ yinh sat?
Hex tiꞌ uninale kaw manhkꞌom hexkanoj,
yebꞌ uninale kaw leqꞌtiꞌ heyehi.
5 Chewatxꞌen mule yichla teꞌ nime qꞌebꞌtaj kaw ay xaj,
cheyalten heyuninal yinh xahanbꞌalil satla akꞌal yebꞌ yichla chꞌen nime chꞌen.
6 Hex tiꞌ cheyiyo hebꞌa sata chꞌen chꞌen ahnati xol ha haꞌ,
haꞌ hunteqꞌan tuꞌ hesayiko hetioxhoj, haꞌ tuꞌ hejobꞌayo vino yinh xahanbꞌalil,
heyaltenpaxo sat hetzꞌunubꞌ heyebꞌalqꞌabꞌoj.
¿Tom xin mach chiwayojan isyaꞌtajil teyibꞌanh yu hunteqꞌan hewatxꞌe tuꞌ?
7 Haꞌ bꞌey iswiꞌla witz kaw nahat yekanh, haꞌ tuꞌ hewatxꞌe hewaybꞌal,
haꞌ tuꞌ xin kexahpaxto heyaqꞌaꞌ hexahanbꞌal.
8 Haꞌ yinta hepulta yebꞌ yibꞌanh iswiꞌ hepulta heyakano hetioxh.
Kinhenahulnhetojan, hetꞌilbꞌan hebꞌa bꞌey tuꞌ, heyay hilno sat hetxꞌat kaw nimajal sat,
hetꞌinhbꞌankano hewatxꞌen tzet cheyoche yebꞌ ebꞌnaj heyet winajil yinh mule.
Bꞌayxanhetuꞌwal cheyil hewaybꞌal tuꞌ, kaw xahan cheyila.
9 Heto heyilno naj rey, haꞌ tioxh Melec, heyinito aceite kaw xuqꞌ sam yebꞌ txꞌiꞌal perfume.
Hechejnito hechejabꞌ kaw nahat yu issayni hunuxa hetioxh masanto kexayapno xol ej kamom yu hesayni hunuxa hetioxh tuꞌ.
10 Kexsikilo heyekꞌ yinh hebꞌel nahat,
yajaꞌ xin mach hetxumu ta nabꞌanhe tzet heyu tuꞌ;
yajaꞌ ilcha heyu yinh tzet chiyu heyiqꞌnikanh heyip hunelxa,
yuxin mach chitanhkanilo heyip yinh hunelnhe.
11 ¿Mak anmahil hunteqꞌan heyal hetioxho tuꞌ,
yuxin kexxiw tet, heyinipaxayo habꞌa sataj, heyinilo heyanma winhan,
kinhenahulnhenkantojan, matxa xin kinekꞌan yinh henabꞌal?
¿tom yu txꞌiꞌalxa tiempo machi kintzotelan teyet, yuxin matxa kexxiw wetan?
12 Wal tinanh chiwalikꞌojan tzetaj hebꞌeybꞌalnhe,
yebꞌ tzetaj hewatxꞌe, hunteqꞌan heyala ta kaw haꞌ istoholal cheyu,
yajaꞌ haꞌ tzet hewatxꞌe matzet chaqꞌ teyet.
13 ¡Hantam saqꞌal ta chikolwa hunteqꞌan hetioxh tuꞌ teyinh yet chꞌeliko heyaw yinh!
Haꞌ sunil hunteqꞌan hetioxh tuꞌ chiyijto jaqꞌeqꞌ,
nichꞌanchꞌannhe jaqꞌeqꞌ hakaꞌ xobꞌ kotiꞌ chiꞌijnitoj,
kat istanhiloj. Wal mak chikawxi iskꞌul winhan xin, haꞌ txꞌo txꞌotxꞌ haltebꞌil wuhan haꞌ chꞌok ismajuloj,
kat yokpaxo wonhan wetan yetoj.
14 Chixin hal-lax hakaꞌ tiꞌ: “Nohtzewe bꞌeh, nohtzewe bꞌeh,
kat hetzꞌisni yul bꞌeh, kat heyinilo sunil tzet bꞌay chilekta inkonhobꞌan yekꞌtoj,” xhi,» xhi Komam.
15 Yuto hak tiꞌ yu yalni Komam ay bꞌey satkanh bꞌay kaw nimankano yelapnoj yebꞌ kaw aykano ismay,
Komam aynhetikꞌa yinh sunilbꞌal tiempo; haꞌ xin isbꞌi Komam machi istxꞌojal yinh.
Haꞌ Komam chalni hakaꞌ tiꞌ: «Hanintiꞌan ayinan yul satkanh bꞌay kaw machi istxꞌojal,
yajaꞌ ayinpaxikꞌojan iskꞌatanh makta chiꞌekꞌyaꞌ yanma, yebꞌ makta chewchotanhe chute yanma,
yunhe yiqꞌnikanh yip yanma ebꞌnaj chewchotanhe chute isbꞌa,
kat yiqꞌnipaxokanh yip yanma makta chiꞌekꞌyaꞌ yanma yu isyaꞌtajil.
16 Yuto mach yinh sunilbꞌal tiempo lemanti inhowalan yinh inkonhobꞌtiꞌan
yebꞌ xin mach yinh sunilbꞌal tiempo chichiwa inkꞌulan yinh,
yuto ta mach chiꞌekꞌayo inhowalan, chipáxilo yip yanma anma watxꞌebꞌil wuhan.
17 Wal xin yu istxꞌojal inkonhobꞌtiꞌan, yet yocheniko tzetaj ye tuꞌ,
yuxin chíwakanh inkꞌulan yinh, wanayojan isyaꞌtajil yibꞌanh,
webꞌanto insatan tet, istit inhowalan yinh.
Yok tzujno yinta bꞌay yoche yanma, yokkano manhkꞌomal wetan.
18 Xawilan tzetaj xaꞌisbꞌeybꞌalnhe, yajaꞌ xin chiwanhtehan, kat intanhenan,
chiwaqꞌnihan yaqꞌlobꞌal iskꞌul yet ayko yinh bꞌiskꞌulal.
19 Chiwaqꞌan yalaꞌ anma kꞌul-la tzotiꞌ winhan, chiwalnihan:
“Ayojabꞌ aqꞌankꞌulal, ayojabꞌ aqꞌankꞌulal tet anma ay kawil yebꞌ tet anma ay nahat.
Haninan chiwanhtehan inkonhobꞌtiꞌan,” kinchihan.
20 Yajaꞌ wal anma txꞌoj, lahan hakaꞌ haꞌ mar yet chiꞌekꞌ jobꞌla yu ishowal yu jaqꞌeqꞌ,
maxhtikꞌa aqꞌankꞌulal yehi, chismaqꞌilo haꞌ,
haꞌ tzꞌil-la haꞌ xol yebꞌ tzꞌotzꞌew.
21 Haꞌ anma txꞌoj machi aqꞌankꞌulal tet,» xhi inDiosalan.