Isaías 58

Huneꞌ kaw isyelal jaqꞌlen wahil yet chonhtxahli

Yalni Komam Jahawil wetan hakaꞌ tiꞌ:

«¡Awanh yinh kaw ip, mach chabꞌej yel hawaw,

ako yip yul hanuqꞌ hakaꞌ chꞌen trompeta!

¡Chawalni ismanhkꞌomal inkonhobꞌan tet, kat hawalni ismul yikꞌal yaꞌ Jacob tet!

2 Haꞌ hunteqꞌan anma tiꞌ hunun tzꞌayik kinissaynihan,

chiyochen yohtanhelo inbꞌeybꞌalan hakaꞌ chute anma tohol isbꞌeybꞌal

yebꞌ hakaꞌta mach isbꞌejkano chejbꞌanile waqꞌan,

haninan isDiosal ebꞌnaj,

chisqꞌanni wetan tato chinwatxꞌehan istoholal yinh,

chiyochen ishitzako isbꞌa inkꞌatanhan, hanin Dios intiꞌan.

3 Chiyalni wetan hakaꞌ tiꞌ: “Mach chonhwaꞌanh yu kotxahlihanh tawet,

yajaꞌ mach chikam hakꞌul jinhanh, chijiyo kobꞌahanh tasataj, yajaꞌ mach chawila,” xhi anma.

Yel cheyala, yajaꞌ hayet cheyijlen wahil yu hetxahli,

haꞌ tzet choche hekꞌul haꞌ chewatxꞌe,

cheyetanpaxo heyet anmahil chimunla teyintaj.^a

4 Hayet mach chexwaꞌ yu hetxahli, chebꞌuchlen hebꞌa kat heyaqꞌni howal,

kat yelto heqꞌabꞌ teyinh hunun hex,

chemaqꞌlen hebꞌa yu hetxꞌojal.

Wal xin matxa cheyute hebꞌa hakaꞌ yet cheyijlen wahil,

hak tuꞌ xin chiwabꞌehan yul satkanh tzet cheqꞌan wetan.

5 ¿Hayet ayexiko heyijlen wahil tuꞌ hextikꞌa cheyeta hekꞌul,

chexay xulno hakaꞌ yay xulno iswiꞌ teꞌ ah,

kat heway xol tanh yebꞌ xil heqꞌap yet bꞌiskꞌulal?

¿Tom haꞌ tuꞌ cheyal heyijlen wahil yu hetxahli?

¿Tom chintzalahan yinh hunteqꞌan tuꞌ heyalni?

6 Haꞌ huneꞌ heyijlen wahil yu hetxahli wetan,

huneꞌ sikꞌlebꞌil wuhan, haꞌ ton hepuhnilo istxꞌojal kꞌalnhehexayoj,

kat heyinilo isyaꞌtajil ayko yibꞌanh anma heyu hakaꞌ ijatz kat hebꞌejtzon anma yalanh isyaꞌtajil,

yebꞌ munil yaꞌta ayko yibꞌanh heyu.

7 Chepohnikanh tzet cheloh tet anma chiyaqꞌle wahil,

chechahni anma mebꞌaꞌ yul heyatut,

anma machi bꞌay chikani, cheyaqꞌni xil isqꞌap makta machi xil isqꞌap,

mach xin chemanhkꞌo hekolwa yinh heyuxhtaj.

8 Hak tuꞌ xin chipitzkꞌahoti huneꞌ sajilqꞌinal teyinh hakaꞌ sajilqꞌinal yet chisajbꞌiloj,

chisyenilo isbꞌa hekolbꞌanil yinh anhe, haꞌ xin istoholal chewatxꞌe chibꞌabꞌi tesataj,

kat yok tzujno isqꞌaqꞌal inmayan, hanin Yahawilintiꞌan teyintaj.

9 Hak tuꞌ xin yet cheyawten Komam Jahawil teyinh chabꞌe tzet cheyala,

yet chexawi tet, chalni teyet hakaꞌ tiꞌ:

“¡Ayinan lah! Chebꞌej heyetan heyet anmahil,

kat hebꞌejni heyalni hemaqꞌnikamo heyet anmahil,

chebꞌejni heyalni tzotiꞌ matzet chaliloj.

10 Yebꞌ heyaqꞌni tzet chislo makta chinhochahi,

kat hekolwa yinh makta chiꞌekꞌyaꞌ yanma yu manhtzetal,

wal tuꞌ chitzejlaho sajilqꞌinal teyinh xol qꞌejholo,

kat ismeltzoko qꞌejholo hoyaniko teyinh yinh sajilqꞌinal,

hakaꞌ sajilqꞌinal yet chuman tzꞌayik,” xhi.

11 Haꞌ Komam Jahawil chextanheni yinh sunilbꞌal tiempo.

Yet chitaj hetiꞌ chaqꞌni Komam ha haꞌ heyukꞌuꞌ chaqꞌpaxo Komam yip hebꞌajil,

lahanxa xin chexeliko hakaꞌ tzꞌunubꞌ chihayelaxi yebꞌ hakaꞌ isnuqꞌ ha haꞌ maxhtikꞌa chitanhayoj.

12 Chiswatxꞌenkanh yuninal heyuninal hekonhobꞌ uchkꞌabꞌilxatoj yettax payat,

chewatxꞌenkanh yibꞌanh isxeꞌ watxꞌebꞌilxa yettax payat tuꞌ,

kat yal-lax teyinh: naj watxꞌemkanh kꞌubꞌ, yebꞌ naj watxꞌemkanh nha yibꞌanh yekꞌlenal yet payat, xhi.

Chejbꞌanil yinh istzꞌayikal xewilal

13 »Tato ay yelapno tzꞌayik xewilal yul hesat, machi xin chewatxꞌe hakaꞌ tzet cheyoche yinh tzꞌayik wetan yehi;

kat hetzala yinh tzꞌayik tuꞌ, cheyalni ta kaw niman yelapnoj yul hesat.

Mach xin chewatxꞌe tzet choche hekꞌul yinh huneꞌ tzꞌayik tuꞌ,

nitam heyalni tzotiꞌ mach yelapno yinh istzꞌayikal xewilal.

14 Wal tuꞌ cheyaqꞌ tzalaho heyanma winhan, hanin Yahawilintiꞌan,

yebꞌ xin ay yelapno chexeliko wuhan yul sat yibꞌanhqꞌinal tiꞌ.

Chiwaqꞌni tzalahojan hekꞌul sat txꞌotxꞌ ismajul heyichmam Jacob.

Haꞌ hunteqꞌan tzotiꞌ tiꞌ elti yul intiꞌan, hanin Yahawilintiꞌan,» xhi Komam.