Yalahti anma Israel ismul
59
Haꞌ isqꞌabꞌ Komam Jahawil mach chipax yip,yuxin chaqꞌ kolbꞌanile, mach majanopaxo istxikin, wal xin chabꞌe Komam.
2 Wal xin haꞌ hemul heyakoj, haꞌ pohni texol yebꞌ koDiosal;
yu hemul yuxin yebꞌato Komam sat teyet,
yuxin mach chabꞌe tzet cheqꞌana.
3 Yuto haꞌ yinh heqꞌabꞌ bꞌakbꞌiliko ischikꞌil anma xahepotxꞌkamoj,
bꞌakbꞌilpaxiko istxꞌojal yinh yiximal heqꞌabꞌ yu istxꞌojal xahewatxꞌe;
haꞌ hetiꞌ leqꞌtiꞌalnhe chala,
haxa heyaqꞌ istxꞌojalnhetikꞌa chala.
4 Machi hunu hex tiꞌ chewatxꞌe hunu tzet ye tuꞌ yinh istoholal,
machi hunu hex tiꞌ cheyil yinh tzet chiꞌeliko heyet anmahil yu isyelal.
Haꞌ yinh tzetaj matzet chal yelapnoj bꞌay chikawxi hekꞌul,
hanhe xin tzetaj ye tuꞌ matzet chalilo cheyala;
haꞌ istxꞌojal chiꞌekꞌ yinh henabꞌal, haꞌ istxꞌojal tuꞌ chewatxꞌe.
5 Haꞌ tzet chewatxꞌe tuꞌ, lahan hakaꞌ ishos noꞌ labꞌa chepaja,
yebꞌ hakaꞌta chechem istxꞌanhil noꞌ xim.
Haꞌ mak chiloni ishos noꞌ labꞌa tuꞌ chikami,
ta chispohto noꞌ hos tuꞌ xin, labꞌa noꞌ chiꞌahti yul.
6 Haꞌ istxꞌanhil noꞌ xim chechem tuꞌ, mach chu yok xilo koqꞌap.
Haꞌ tzet chewatxꞌe tuꞌ mach chu heyaniko hekꞌuxiloj.
Hanhkꞌanhe ismachiswalilal chewatxꞌe,
haꞌ islow heqꞌabꞌ teyinh hunun hex, haꞌ cheyu.
7 Haꞌ heyoj chexyito yinh anhe yinh istxꞌojal,
cheyako yinh hekꞌul hemalnito ischikꞌil anma machi ismul.
Hanhkꞌanhetikꞌa istxꞌojal chꞌekꞌ yinh henabꞌal,
cheyetanto tzetaj chiꞌilcha heyu bꞌay chilakexekꞌi,
chewatxꞌen isyaꞌtajil bꞌay chilakexekꞌ tuꞌ.
8 Mach heyohtajo isbꞌehal aqꞌankꞌulal, machi istoholal yinh tzet chewatxꞌe,
lahan hakaꞌ lanhan hebꞌelwi yul bꞌeh kotxkiltanhe yekꞌi.
Makxanhetikꞌa chiꞌoktzujno yinta tzet chewatxꞌe tuꞌ,
mach chohtanhelo aqꞌankꞌulal.
9 Yu tuꞌ, yuxin mach chonhiskolilo Komam Dios xol isyaꞌtajil,
yuxin mach chiswatxꞌe Komam istoholal jinh.
Echmabꞌiltikꞌa sajilqꞌinal ju, yajaꞌ wal tinanh ayonhiko xol qꞌejholo,
echmabꞌiltikꞌa ju jekꞌ xol issajilqꞌinal chitzejtzoni,
yajaꞌ wal tinanh, xol qꞌejholo chonhekꞌi.
10 Chonhekꞌ matxmon sat bꞌitzꞌabꞌ hakaꞌ ebꞌnaj mach chu yilni,
nanhkꞌulal chonhekꞌ tzabꞌtzoni, hakaꞌ mak mutzꞌan sat.
Chonhtxaqꞌmo yet chuman tzꞌayik,
hakaꞌta yet aqꞌbꞌalil ayonh, ayonhiko xol qꞌejholo hakaꞌ kamom.
11 Sunilonh tiꞌ el jaw hakaꞌ noꞌ oso, koqꞌajwipaxo hakaꞌ isqꞌajwi noꞌ palamuch,
jechma iswatxꞌen Komam istoholal jinh,
yajaꞌ mach hul istoholal tuꞌ; jechman konhiskolni Komam,
yajaꞌ nahat yehilo kokolbꞌanil tuꞌ jinh.
12 Mam Jahawilanh,
haꞌ komanhkꞌomalanh kaw nimankano yul hasat,
haꞌ komulanh jakojanh, haꞌ chꞌaqꞌwi kꞌule jinhanh tawet,
yuto haꞌ istxꞌojal kowatxꞌehanh ayko yinh konabꞌalanh,
johtajanh komulanh jakojanh.
13 Jokanh manhkꞌomal tawet mam Jahawilanh, jalnihanh ta mach kach johtajojanh,
kopohnilo kobꞌahanh tawinh Mamin, hach koDiosal tiꞌanh.
Kohobꞌkanhanh leqꞌtiꞌal yinh jet anmahilanh,
jokanh manhkꞌomal tet,
kokꞌubꞌanan leqꞌtiꞌal yinh janmahanh jalnihanh leqꞌtiꞌal tuꞌ.
14 Haꞌ istoholal hitzilo jinhanh, tzotiꞌ yeli matxa chiꞌaqꞌlax bꞌinaho yet chiꞌil-laxi tzet chiꞌeliko anma yul kapil,
yuto matxa isyelal chihal-lax yulaj txonhbꞌal,
matxa chiwatxꞌelax istoholal yu kololoꞌalanh.
15 Machi isyelal koxolanh,
haꞌ mak chispohilo isbꞌa xol istxꞌojal chiꞌalaxikto yul preso,
haꞌ hunteqꞌan istxꞌojal kowatxꞌe tuꞌanh haꞌ yil Komam Jahawil,
mach xin tzala Komam yilni hunteqꞌan tuꞌ,
yuto matxatikꞌa istoholal koxolanh.
16 Kaw kꞌayilo iskꞌul Komam Jahawil yilni,
yuto machi hunu naj winaj tiꞌ ok kolwal yinh ebꞌnaj chiꞌetalaxi.
Yuxin hul Komam iskoloꞌ ebꞌnaj yu yip isqꞌabꞌ,
iskolilo Komam yu istoholal chiswatxꞌe.
17 Iswatxꞌe isbꞌa Komam hakaꞌ hunu naj soldado chito yinh howal,
haꞌ istoholal chiswatxꞌe Komam, lahan hakaꞌ chꞌen coraza chiyako ebꞌnaj soldado yinh istxam iskꞌul,
haxa kolbꞌanile chaqꞌ Komam lahan hakaꞌ chꞌen casco chiyahto ebꞌnaj soldado yinh iswiꞌ.
Hakaꞌ yul hunu naj soldado ayko xil isqꞌap yet howal yinh,
hak tuꞌ yu yul Komam yu sunil ishowal ispajtzen tet anma txꞌoj.
18 Chispajtzen Komam yu sunil ishowal tet ebꞌnaj ayko ishowal yinh.
¡Chaqꞌnipaxo Komam yu ishowal ispaj tet anma chilawatxꞌen istxꞌojal,
anma ay yulajla konhobꞌ ay istiꞌla haꞌ mar!
19 Sunil anma ay yul sat yibꞌanhqꞌinal tiꞌ ay yinh yetkꞌulal bꞌay chito tzꞌayik,
masanta bꞌey bꞌay chiꞌahilo tzꞌayik chixiw tet Komam Jahawil
yebꞌ tet isqꞌaqꞌal iskꞌulchꞌanil ismay Komam.
Chul yinh sunil yip hakaꞌ chu istit hunu niman elomaꞌ yu kajtuxkum,
yu yip xobꞌ istiꞌ Komam Jahawil.
20 Yalni Komam: «Chul isKolomal ebꞌnaj ay bꞌey konhobꞌ Sión,
chiskolni ebꞌnaj chisnah isbꞌa, chiqꞌanni nimankꞌulal yu istxꞌojal chiswatxꞌe,
haꞌ ton ebꞌnaj yikꞌal yaꞌ Jacob,» xhi Komam Jahawil.
21 Chalni Komam Jahawil hakaꞌ tiꞌ: «Haꞌ huneꞌ trato tiꞌ,
chiwaqꞌan tet ebꞌnaj tuꞌ,» xhi. Yalnipaxo Komam: «Haꞌ Wespírituhan ayayo tawibꞌanh,
yebꞌ intzotiꞌan chiwakojan yul hatiꞌ, mach chispohilo isbꞌa intzotiꞌtiꞌan yinh hatiꞌ
yebꞌ yinh istiꞌ hawuninal yebꞌ yinh istiꞌ yuninal hawuninal,
wal xin aynhetikꞌako intzotiꞌan yinh hetiꞌ tinanh
yebꞌ yinh sunilbꞌal tiempo,» xhi Komam Jahawil.