Iskꞌulchꞌanil tzet chito hul yibꞌanh Sión
60
Chalni Komam Jahawil hakaꞌ tiꞌ:«Hex ah Sión ahanhwewanoj,
kat hetzejlahi, yuto chihul sajilqꞌinal texol,
chiꞌapnipaxo isqꞌaqꞌal inmayan teyibꞌanh.a
2 Wal hunteqꞌan konhobꞌ ayayo sat txꞌo txꞌotxꞌ tiꞌ ayayo qꞌejholo yibꞌanh,
hakpax tuꞌ hunteqꞌan nime konhobꞌ hoyaniko qꞌejholo yinh; wal texol hex tiꞌ xin,
chiwayojan sajilqꞌinal, kat yil-lax isqꞌaqꞌal inmayan texol.
3 Chibꞌelwi nimeta konhobꞌ yinh issajilqꞌinal ay texol,
kat isbꞌelwipaxo ebꞌnaj rey yinh issajilqꞌinal chitzejla teyinh.
4 Tꞌanhxanhwekanh yinhla hehoyanil, kat heyilni sunil mak maskutxbꞌako isbꞌa istit tekꞌatanh,
haꞌ ebꞌnaj hekꞌahol chitit ebꞌnaj nahat, haxa ebꞌix hekutzꞌin chichel-laxti ebꞌix.b
5 Cheyilaꞌ huneꞌ tuꞌ, kat istzejla sajilqꞌinal teyinh, kat iskꞌayilo hekꞌul, kat istzala heyanma,
yuto chitit sunil anma ay istiꞌla haꞌ mar tekꞌatanh,
kat yiniti nimeta konhobꞌ isqꞌalomal teyet.
6 Chinohilo sunil sat hetxꞌotxꞌ yu noꞌ camello, noꞌ camello chitit bꞌey Madián yebꞌ bꞌey Efa.
Chititpaxo sunil anma ay bꞌey Sabá tekꞌatanh chiyiniti chꞌen oro yebꞌ incienso teyet,
chispujbꞌanikꞌo kꞌul-la tzotiꞌ winhan,
hanin Yahawilintiꞌan.
7 Sunil noꞌ meꞌ ay bꞌey txꞌotxꞌ Cedar chikutxbꞌalaxiko noꞌ teyet,
kat yilaxpaxti noꞌ meꞌ ay bꞌey Nebaiot teyet,
yu heyaqꞌni noꞌ xahanbꞌalil yinh tzalahilal wetan yibꞌanh ismexhahil yet xahanbꞌal,
chiwanikojan ismay watutan bꞌay ayayo isqꞌaqꞌal iskꞌulal inmayan.
8 ¿Tzet ye tuꞌ hunteqꞌan hakaꞌ moyan chꞌekꞌ satkanh tiꞌ,
yebꞌ hakaꞌ yapni purla noꞌ palamuch yul isventanahil yatut?
9 Haꞌ hunteqꞌan chitit tuꞌ, haꞌ ton teꞌ barco ay isqꞌaxepal haꞌ mar,
bꞌabꞌel teꞌ chitit bꞌey Tarsis.
Chiyiniti heyuninal pujanto nahat yul teꞌ barco tuꞌ,
yebꞌ chꞌen oro yebꞌ chꞌen plata wetan, hanin Yahawilintiꞌan heDiosal,
hanin machi intxꞌojalan isDiosal Israel, haninan chiwakojan hemay.
10 Haꞌ anma nan konhobꞌal haꞌ chiwatxꞌenkanh ismurohal hekonhobꞌ,
kat yok ebꞌnaj isreyal konhobꞌla hechejabꞌoj,
yuto hayet tit inhowalan wanayojan isyaꞌtajil teyibꞌanh,
wal tinanh xin chitzꞌay inkꞌulan teyinh yu iskꞌulal inkꞌulan.
11 Haꞌ ispultahil hekonhobꞌ hajannhetikꞌa,
machi pebꞌalax tzꞌayikal, machi pebꞌalaxpaxo aqꞌbꞌalil,
yunhe yilaxti isqꞌalomal nimeta konhobꞌ teyet,
kat yilaxpaxti isreyal nime konhobꞌ tuꞌ teyet.
12 Yuto haꞌ nimeta konhobꞌ yebꞌ txꞌotxꞌ konhobꞌ ayikto yalanh yip ebꞌnaj rey mach chiyijen tzet cheyala,
chiꞌay isyaꞌtajil yibꞌanh kat istanhiloj.
13 Haꞌ issaqꞌalil txꞌotxꞌ Líbano chiꞌilaxti teyet, haꞌ ton teꞌ tzꞌisis,
teꞌ tah yebꞌ teꞌ bojes yu yok teꞌ yelawilo watutan,
chiwanikojan ismay watutan bꞌay chiwayo wojan.
14 Chul iskꞌahol ebꞌnaj kexaqꞌni ekꞌoyaꞌ yiqꞌayo isbꞌa teyet, yebꞌ ebꞌnaj kexbꞌuchni,
kat yay jahno ebꞌnaj yich heyoj, kat yay nhohnoj,
kat heyal-laxo hex ah Sión hex tiꞌ “inkonhobꞌojan hanin Yahawil intiꞌan,”
hanin machi intxꞌojalan isDiosal Israel.
15 Matxa chexbꞌejlaxkanoj yebꞌ xin matxa chexyahlaxi;
hayet hebꞌejlaxkanoj machi hunu mak tiꞌ ekꞌ yul hekonhobꞌ, yajaꞌ chiwaqꞌaꞌkojan hemay,
haꞌ huneꞌ hemay tuꞌ matxa bꞌaqꞌinh chitanhi kat hetzala yinh sunilbꞌal tiempo.
16 Chiyiti nimeta konhobꞌ tzet chislo helobꞌoꞌ,
hakaꞌta lech chaqꞌ hetzꞌubꞌu,
chiyinipaxti ebꞌnaj rey isqꞌalomal teyet;
kat heyohtanheniloj tato hanintiꞌan Yahawil hinan, haninan heKolomal,
yebꞌ xin haninan chexinbꞌejtzolojan; hanintiꞌan kaw yipomal yaꞌ Jacob.
17 Haꞌ chꞌen oro chiwaqꞌan teyet selelo chꞌen bronce,
haxa chꞌen plata chiwaqꞌan selelo chꞌen hierro,
haxa chꞌen bronce chiwaqꞌan selelo te teꞌ,
haxa chꞌen hierro chiwaqꞌan selelo chꞌen komon chꞌen.
Matxa cheyaqꞌ hetohlabꞌal yuto chiwaqꞌan aqꞌankꞌulal texol,
matxa chexetalaxi, wal xin haꞌ istoholal chiwatxꞌelax teyinh.
18 Matxa bꞌaqꞌinh chibꞌina howal sat hetxꞌotxꞌ,
matxa chiꞌalaxayo isyaꞌtajil texol, yebꞌ matxa chiꞌuchkꞌalaxto hekonhobꞌ.
Haꞌ hekolbꞌanil chiwaqꞌan, haꞌ chiꞌok ismurohal hekonhobꞌ;
haxa heyalni “kꞌul-la tzotiꞌ winhan,” haꞌ chiꞌok ispultahilo hekonhobꞌ.
19 Hayet tuꞌ, matxa chiꞌoknoko yoj tzꞌayik heyu yu ismujli teyinh yet tzꞌayikal,
matxa chiꞌoknopaxiko yoj ixahaw heyu,
wal xin hanin Yahawilintiꞌan chinokan sajilqꞌinalo texol yinh sunilbꞌal tiempo;
hanin heDiosal intiꞌan chinokan hemayoj.
20 Matxa chilahwo hesajilqꞌinal hakaꞌ isto tzꞌayik,
matxa chipaxo yip sajilqꞌinal hakaꞌ istanh yip yoj ixahaw, yuto hanin Yahawilintiꞌan,
haꞌ hesajilqꞌinal yinh sunilbꞌal ej tiempo;
haꞌ bꞌiskꞌulal cheyil tinanh chitanhokanoj.
21 Sunil anma ay yul hekonhobꞌ tiꞌ tohol chꞌelkanikoj,
chischanikano txꞌo txꞌotxꞌ ismajuloj yinh sunilbꞌal tiempo.
Lahan chexelkaniko hakaꞌ iswol hunu te teꞌ haninan tzꞌunnhe,
haꞌ inqꞌabꞌan kexwatxꞌeni, yunhe heyaniko inmayan.
22 Haꞌ hunmajan anma kaw haywanhnhe texol,
chipohkanh kat yapni isbꞌisil yinh mil;
haxa yinh mak islahobꞌal yekanoj, chiꞌel huneꞌ konhobꞌ kaw aykano yip.
Hanin Yahawilintiꞌan haninan chiwaqꞌan yijaꞌ isbꞌa hunteqꞌan tiꞌ yinh istiempohal yinh kaw toxa.