Isaías 61

Chihal-lax kꞌul-la tzotiꞌ yet kolbꞌanile tet konhobꞌ Sión

»Haꞌ Yespíritu Komam Jahawil, ayko winhan, yuto kinissikꞌilojan Komam;

kinischejnihan Komam walnihan Tzotiꞌ Kꞌul yet Kolbꞌanile tet anma mebꞌaꞌ matzet ayko yipo yanma,

yebꞌ yu wanhtenan anma chꞌekꞌyaꞌ yanma.

Yebꞌ yu walnihan kolbꞌanile tet mak ilaxto chejabꞌoj,

haxa mak ayikto yul preso chibꞌejtzolaxi.

2 Kinyatijan walaꞌan ta maꞌayilo istiempohal bꞌay chisyelo Komam iskꞌulal iskꞌul,

iskolnilo iskonhobꞌ, yebꞌ istzꞌayikal bꞌay chaqꞌ koDiosal ispaj tet anma txꞌoj,

kat yaqꞌni yaqꞌlobꞌal iskꞌul sunil makta bꞌiskꞌulal yehi.^a

3 Kinyatijan yu inchejnihan ta chꞌaqꞌlax iskꞌulal tet anma ah Sión selelo yanahto tanh yinh iswiꞌ;

chiꞌaqꞌlax tzalahilal selelo oqꞌil, haxa bꞌit yet tzalahilal chꞌokkano selelo bꞌiskꞌulal,

kat yal-lax anma tuꞌ “isqꞌebꞌtala Komam Jahawil,” “haꞌ kaw Komam tzꞌunnhe,”

chiswatxꞌen ebꞌnaj istoholal yu yaniko ismay Komam.^b

4 Chiswatxꞌenkanh ebꞌnaj konhobꞌ uchkꞌabꞌilkanto yettax payat,

chiswatxꞌenpaxokanh ebꞌnaj teꞌ nha uchkꞌabꞌilto yet yalanhtokanoj yettax payat.

5 Hex ah Sión, haxa ebꞌnaj nan konhobꞌal chitanheno hemeꞌ,

haxa ebꞌnaj nan konhobꞌal chiwatxꞌen hemunil,

kat ismunla ebꞌnaj xol hetzꞌunubꞌ uva.

6 Hex tiꞌ chexhal-laxo issacerdotehal Komam Jahawil,

kat heyal-laxpaxo ischejabꞌo koDiosal, chelono isqꞌalomal nimeta konhobꞌ;

kaw niman yelapno chexelkaniko yu issaqꞌalil nimeta konhobꞌ.

7 Chihal-laxo kꞌul-la tzotiꞌ teyinh yet ay hex sat hemajul selelo issomchakanh henabꞌal yebꞌ yilaxilo hepixan,

yuxin ekꞌbꞌalto kayel kaw ay yelapno chexelikoj yet ay hex sat hetxꞌotxꞌ,

kat hetzala yinh sunilbꞌal ej tiempo.

8 Hanintiꞌan Yahawil hinan, chintzalahan yinh makta chiwatxꞌen istoholal,

wal yinh makta chiꞌelqꞌawi, yebꞌ yinh makta chiꞌetan yet anmahil chinyahan.

Kaw kꞌul chu inpajtzenan tet mak istoholal chiswatxꞌe yinh tzet chiyu,

kat waqꞌnihan istꞌinhanil intratohan tet yinh hunelnhe.

9 Haꞌ yuninal ebꞌnaj chipohchakaniltoj chiꞌohtanhelaxilo xolaj nimeta konhobꞌ,

kat yohtanhelaxpaxo yuninal ebꞌnaj xolajla konhobꞌ,

sunil makta chiꞌilni ebꞌnaj chiꞌohtanhelaxiloj tato yuninal Komam ye ebꞌnaj;

ayayo isyaxil Komam Jahawil yibꞌanh ebꞌnaj.

10 Kaw hantakano chintzalahan yinh Komam Jahawil,

kaw chitzalakano wanmahan yinh inDiosalan,

yuto kaw kꞌul mayu yaqꞌni Komam kolbꞌanile yebꞌ istoholal wetan,

hakaꞌ yeko xil isqꞌap hunu naj tzeh chimohyi,

maka hakaꞌ istzejtzon yelawil ix qꞌopo yet chimohyi.

11 Yuto hakaꞌ chu ischꞌibꞌkanh tzꞌunubꞌ sat txꞌo txꞌotxꞌ

yebꞌ hakaꞌ chu yaqꞌni txꞌo txꞌotxꞌ sat tzꞌunubꞌ chiꞌokniko hinhatil,

hak tuꞌ chu yaqꞌni Komam Jahawil istoholal,

kat yal-lax kꞌul-la tzotiꞌ yinh Komam sata sunil nimeta konhobꞌ,» xhi Komam.