62
Yu kaw xahan ay hex ah Sión wuhan, yuxin mach chinok tuknojan;yu kaw xahan ay hex ah Jerusalén wuhan,
yuxin mach chinxewan masanto chisyelo isbꞌa istoholal teyinh,
hakaꞌ istzejla sajilqꞌinal, kat isyenipaxilo isbꞌa hekolbꞌanil, hakaꞌ istzejtzon xaj qꞌa qꞌaꞌ yinh hunu tzejtah.
2 Hak tuꞌ chu yilni anma istoholal teyinh, kat yilni sunil ebꞌnaj rey hemay,
kat yalaxiko huneꞌ akꞌ bꞌihe teyinh, haꞌ huneꞌ hebꞌi tuꞌ haꞌ Komam Jahawil chihalni.
3 Hex tiꞌ hakaꞌ hunu corona kaw aykano ismay cheyuko yul isqꞌabꞌ Komam Jahawil,
yebꞌ hakaꞌ hunu diadema kaw saqꞌal jilni cheyuko yul isqꞌabꞌ heDiosal.
4 Matxa bꞌaqꞌinh chihal-lax teyinh, konhobꞌ uchkꞌabꞌiltoj,
matxa chal-laxopaxo hetxꞌotxꞌ, txꞌotxꞌ bꞌejbꞌilkanoj, wal xin cheyij, Hefzi-bá.
Haxa hetxꞌotxꞌ chiyij Beula, yuto kaw xahan ay hex yu Komam Jahawil, chexok yahawo yinh hetxꞌotxꞌ.a
5 Hakaꞌ chu ismohyi hunu naj tzeh yebꞌ ix qꞌopo qꞌanbꞌilxa yu,
hak tuꞌ cheyu yebꞌ Komam Jahawil yu chexok yixaloj;
hakaꞌ chu istzala naj ichamile yebꞌ yixal, hak tuꞌ chu istzala heDiosal teyinh.
6 Hex ah Jerusalén chiwakojan ebꞌnaj chextanhen yibꞌanh iskꞌubꞌal hekonhobꞌ,
machi xin chisbꞌej ebꞌnaj yahwi tzꞌayikal yebꞌ yinh aqꞌbꞌalil.
Hex chenati Komam Jahawil mach chexxew heyawten Komam.
7 Mach chebꞌej yel heyaw yinh Komam masanto chiyij isbꞌa iswatxꞌenkanh Jerusalén,
kat yijni isbꞌa yalaxiko ismay yu sunil anma ay sat txꞌo txꞌotxꞌ tiꞌ.
8 Yaqꞌ bꞌinaho Komam Jahawil isbꞌi,
yanikanh iswatxꞌqꞌabꞌ kaw aykano yip, yalni hakaꞌ tiꞌ: «Matxa bꞌaqꞌinh chiwaqꞌan hetrigo iswabꞌ ebꞌnaj ayko ishowal teyibꞌanh,
matxa chukꞌpaxo ebꞌnaj nan konhobꞌal hevino; haꞌ ton sat hemunil hex kaw watxꞌenhe.
9 Wal xin hex kaw hex chehatxꞌ tzet chetzꞌunu kat hewahni,
cheyalni kꞌul-la tzotiꞌ winhan, hanin Yahawilintiꞌan; haxa hex ay hetzꞌunubꞌ uva,
cheyukꞌ yal heyuva tuꞌ yul yamaqꞌil watutan,» xhi Komam.
10 ¡Hex ah Jerusalén elanhwetoj, Elanhweto istiꞌ ispultahil konhobꞌ,
kat hetzꞌisnikanh qꞌalem yul bꞌeh bꞌay chitit heyet konhobꞌ,
akꞌalnhewe bꞌay wonhkixhtakanh txꞌotxꞌ yul bꞌeh, chenohtzenkanh ishopkixhtajil,
cheyinilo chꞌen chꞌen yul bꞌeh, cheyanikanh qꞌap bandera yunhe yilni ej konhobꞌ!
11 Haꞌ Komam halni yabꞌeꞌ sunil anma ay sat txꞌo txꞌotxꞌ tiꞌ, waxanhka kaw nahat aya, yalni hakaꞌ tiꞌ:
«Halwe tet anma ah Sión: “Chul heKolomal, iqꞌbꞌil ispaj ismunil yu;
haꞌ tzet iswatxꞌe heKolomal tuꞌ bꞌabꞌel sataj,” kexchi,» xhi Komam.b
12 Hex Israel chexhal-lax iskonhobꞌ Komam Dios, konhobꞌ kolbꞌililo yu Komam Jahawil,
chihal-laxpaxo teyinh, Konhobꞌ Ochebꞌil, matxa chal-lax teyinh Konhobꞌ hinbꞌilkanoj.