Istzꞌayikal bꞌay chiyaqꞌ Komam Jahawil ispaj tet ebꞌnaj ayko ishowal yinh
63
—¿Mak anmahil huneꞌ mak kaj xil isqꞌap, chitit bꞌey niman konhobꞌ Bosra,ay yul ismajul Edom? ¿Mak anmahil huneꞌ mak kaw saqꞌal yeko xil isqꞌap,
kaw ay ismay istit yebꞌ sunil yip? xhi.
Istaqꞌwi hakaꞌ tiꞌ: —Haninan, hanintiꞌan haꞌ istoholal chiwalan, ay wipan waqꞌnihan kolbꞌanile, xhi.a
2 Isqꞌambꞌen hakaꞌ tiꞌ: —¿Tzet yinh xin kaj xil haqꞌap aykoj,
hakaꞌto haxanhilti yal teꞌ uva bꞌay chixanhlaxilti yal teꞌ? xhi.
3 Istaqꞌwi hakaꞌ tiꞌ: —Inxanhobꞌtanhehan yal teꞌ uva inchukilan bꞌay chixanhlaxilti yal teꞌ,
machi xin hunu mak ay yulajla konhobꞌ kolwa winhan.
Iskechꞌchato anma ayko ishowal winhan yu sunil inhowalan.
Inxanhobꞌtanhenan yu sunil inhowalan, yah chꞌitna ischikꞌil yinh xil inqꞌapan, isbꞌakchatoj.
4 Yuto maꞌapni istzꞌayikal bꞌay chiwaqꞌan ispaj selel istxꞌojal ebꞌnaj ayko ishowal winhan hakaꞌ innanihan;
yebꞌ xin maꞌapni istiempohal bꞌay chinkolilojan inkonhobꞌan.
5 Ekꞌ insatan, yajaꞌ machi hunu mak tiꞌ kolwa winhan,
kaw kꞌayilo inkꞌulan yuto machi hunu mak tiꞌ kiniptzenan. Wal xin haꞌ inqꞌabꞌan kaw aykano yip,
haꞌ kinkolnilojan, haxa inhowalan kiniptzenan.
6 Yinh sunil inhowalan inxanhobꞌtanhehan ej konhobꞌ,
intanhtzenilojan, ismalto ischikꞌil sat txꞌo txꞌotxꞌ, xhi.
Iskꞌulal iskꞌul Komam Jahawil yinh anma Israel
7 Chinnatijan hanta iskꞌulal iskꞌul Komam Jahawil,
chiwalnihan kꞌul-la tzotiꞌ yinh sunil tzet iswatxꞌe Komam,
yebꞌ sunil nimeta iskꞌulal yaqꞌ Komam tet ebꞌnaj jichmam, yuninal yaꞌ Israel.
Sunil tiꞌ iswatxꞌe Komam yu tzꞌay iskꞌul Komam yinh ebꞌnaj, yebꞌ xin yu hanta iskꞌulal yinh ebꞌnaj.
8 Yuto yal Komam hakaꞌ tiꞌ: «Yinh kaw yeli hunteqꞌan anma tiꞌ inkonhobꞌan yehi,
wuninalan, mach chako ebꞌnaj leqꞌtiꞌal,» xhi Komam.
Yok Komam iskolomalo ebꞌnaj.
9 Haꞌ sunil isyaꞌtajil yabꞌe ebꞌnaj, haꞌ hun Komam abꞌenpaxoj,
yuxin haꞌ kaw Komam isye isbꞌa hakaꞌ hunu ángel iskolni ebꞌnaj.
Yu xahan ay ebꞌnaj yu, yebꞌ yu kaw kꞌulchꞌan iskꞌul Komam yinh ebꞌnaj, yuxin kolwa Komam yinh ebꞌnaj,
yiniti Komam ebꞌnaj; yinikanh Komam ebꞌnaj sunilbꞌal ej tzꞌayik yet payat tiempo tuꞌ.
10 Yajaꞌ ok ebꞌnaj manhkꞌomal tet Komam,
yaqꞌnitij ebꞌnaj ishowal Komam Espíritu. Yuxin meltzo Komam,
ischiwa iskꞌul yinh ebꞌnaj, haꞌ kaw Komam aqꞌlen howal yebꞌ ebꞌnaj.
11 Lahwi tuꞌ isnahniti ebꞌnaj hunteqꞌan tzet yu yettax kaw payat yinh istiempohal yaꞌ Moisés,
yuxin isqꞌambꞌele ebꞌnaj tet hunun hakaꞌ tiꞌ:
«¿Bꞌaytuꞌwal ay Komam konhkolnilo xol haꞌ mar yebꞌ yaꞌ konhijbꞌani?
¿Bꞌaytuꞌwal ay Komam Dios, Komam aniko Yespíritu kolwal yinh yaꞌ ijbꞌalom?
12 ¿Bꞌaytuꞌwal ay Komam yenilo yip yinh yaꞌ Moisés yet yijbꞌanikꞌo yaꞌ iskonhobꞌ,
isyenilo Komam isqꞌaqꞌal ismay, ispohni ha haꞌ bꞌay ekꞌto iskonhobꞌ,
yu isbꞌinakano isbꞌi yinh sunilbꞌal ej tiempo?
13 ¿Bꞌaytuꞌwal ay Komam inikꞌto iskonhobꞌ yiktabꞌal ha haꞌ kaw nahat yehayto yich,
hakaꞌ yekꞌto noꞌ cheh sat txꞌotxꞌ desierto machi xin chitxaqꞌmohi?» xhi ebꞌnaj.
14 Haꞌ Yespíritu Komam Jahawil tanhen ebꞌnaj jichmam tuꞌ,
hakaꞌ chu yilaxayti hunu wakax satla akꞌal, hak tuꞌ yu istanhen Komam iskonhobꞌ,
yu isbꞌinakano isbꞌi kaw aykano isqꞌaqꞌal ismay.
Txah bꞌay chiqꞌanlax istzꞌay iskꞌul Komam Dios yinh iskonhobꞌ yebꞌ iskolwa yinh
15 Yal ebꞌnaj Israel: «Mam Jahawil, tꞌanhxanhayti yul satkanh bꞌay ay hawehobꞌal bꞌay machi istxꞌojal,
yebꞌ kaw aykano isqꞌaqꞌal ismay, chonhhawilnaytijanh. Mamin,
¿bꞌaytuꞌwal ay isqꞌaqꞌal hakꞌul jinhanh, bꞌaytuꞌwal chitzꞌaypaxo hakꞌul jinhanh?
¿Bꞌaytuꞌwal ay hawip yebꞌpaxo hanimankꞌulal jinhanh? ¿Tzet yinh yuxin txanxanhe iskꞌulal hakꞌul jinhanh?
16 ¡Yajaꞌ hach tiꞌ hach Komamanh! Waxanhka mach ohtabꞌilo honhanh yu yaꞌ Abraham,
yebꞌ waxanhka mach ohtabꞌilo honhanh yu yaꞌ Israel.
Mam Jahawil, hach tiꞌ hach Komamanh, hach koKolomalanh, aynhetikꞌa habꞌi yinh sunilbꞌal ej tiempo.
17 ¿Tzet yinh xin chonhhachah kꞌayotojanh yinh habꞌeh, mamin?
¿Tzet yinh xin hawaqꞌ kawbꞌolo janmahanh yu matxa chonhxiwanh tawet?
¡Mamin, meltzohanh yebꞌ iskꞌulal hakꞌul yinh ebꞌnaj hachejabꞌ,
yebꞌ yu iskꞌulal hakꞌul yinh hunun majan ebꞌnaj Israel, hakonhobꞌ ayko hamajuloj!
18 Hayebꞌnhechꞌan tiempohal yako isbꞌa ebꞌnaj hakonhobꞌoj, yebꞌ yahawilo hatxꞌotxꞌ,
yaj tinanh xin lanhan isxanhobꞌtanhelax hawatut yu ebꞌnaj ayko ishowal jinhanh.
19 Lahan honhanh hakaꞌ ebꞌnaj maxhtikꞌa kach ok yahawilo yinh,
hakaꞌ ebꞌnaj maxhtikꞌa bꞌinako habꞌi yinh.