64
¡Mamin, ayxikꞌa chitzilmoto satkanh hawu,kat hawayiloj, kat isbꞌilikanh ej witz yinh hasat.
2 Hakaꞌ qꞌa qꞌaꞌ kaw kaj txaltxonhe, yebꞌ hakaꞌ chu yuji ha haꞌ yu qꞌaꞌ!
Mamin, ayanhiloj, kat hawaqꞌni ohtanhelo habꞌi tet ebꞌnaj ayko ishowal tawinh, kat isbꞌilikanh ej nimeta konhobꞌ tasataj.
3 Hach tiꞌ hawatxꞌe tzetaj ye tuꞌ kꞌaybꞌalkꞌule jilni,
huneꞌ mach echmabꞌilo yu ebꞌnaj jichmamanh, hayet hawayiloj isbꞌilikanh ej witz tasataj.
4 Haxa tzet hawatxꞌe tuꞌ maxhto hunelo xaꞌabꞌelaxi, maxhto mak tiꞌ xaꞌilni huneꞌ Dios hakaꞌ hach tiꞌ.
Hawatxꞌe sunil tuꞌ, yuto tawinh kawxi iskꞌul ebꞌnaj jichmam tuꞌanh.
5 Hach tiꞌ hachah makta watxꞌen istoholal yinh tzalahilal,
makta kach nanitij isbꞌeybꞌalnhen habꞌeh; wal hanhonhtiꞌanh jako komulanh tawet yuxin tit hahowal jinhanh,
txꞌiꞌalxa tiempo ichi kowatxꞌenanh istxꞌojal, ¿chitom isje kokolchahanh hakaꞌ tuꞌ?
6 Sunil honhtiꞌanh lahan hakaꞌ tzꞌil yul hasat; haꞌ iskꞌulal chikowatxꞌehanh yul jetanh,
lahan hakaꞌ qꞌap qꞌap tzꞌil yul hasat. Konhaykꞌayanh kosunilanh hakaꞌ yaykꞌay xaj te teꞌ,
konhijlaxtojanh yu ej komulanh jakojanh, hakaꞌ yijlaxto xaj teꞌ tajin teꞌ yu jaqꞌeqꞌ.
7 ¡Machi hunujonh tiꞌanh jawtehanh habꞌi, machi hunujonh tiꞌanh jako yinh kokꞌulanh iskawxi kokꞌulanh tawinh!
Yuxin hawebꞌato hasat jetanh, konhhabꞌejtzonikojanh yul isqꞌabꞌ isyaꞌtajil,
kotajayojanh yu isyaꞌtajil tzet kowatxꞌehanh.
8 Wal tinanh xin Mam Jahawil hach tiꞌ hach koDiosalanh,
hanhonhtiꞌanh lahan honhanh hakaꞌ txꞌotxꞌ qꞌantxꞌotxꞌ,
hach konhhawatxꞌehanh, yuxin haꞌ haqꞌabꞌ watxꞌenhehonhanh kosunilanh.
9 Mam Jahawilanh, machojabꞌ kaw chititlemna hahowal jinhanh,
mach chanahti kotxꞌojalanh yinh sunilbꞌal ej tiempo. ¡Wal tinanh ilonhaytijanh,
yuto hakonhobꞌ jehanh kosunilanh hanhonhtiꞌanh!
10 Haꞌ yulaj hunteqꞌan konhobꞌ hawet yehi, matxa anma, kaw chitzꞌinhtzꞌoni;
haxa konhobꞌ Sión, lahan elkaniko hakaꞌ txꞌotxꞌ desierto, haxa konhobꞌ Jerusalén uchkꞌabꞌilkantoj.
11 Wal hawatut, huneꞌ nha kaw ochebꞌal jilni bꞌay alaxiko hamay yu ebꞌnaj jichmamanh,
tzꞌakantoj yu qꞌa qꞌaꞌ. ¡Yetalaxpaxkanto sunil tzetaj ye tuꞌ kaw ochebꞌil juhanh, hunteqꞌan jetanh yehi!
12 Mam Jahawilanh, ¿tom tonhe chawil yuni hunteqꞌan tiꞌ?
¿Tzet yinh xin tonhe chachok tuknoj hawilni, kat konhhawaqꞌni ekꞌoyaꞌanh?» xhi ebꞌnaj.