Isyaꞌtajil chiꞌaqꞌlax tet ebꞌnaj manhkꞌom
65
Yal Komam Dios hakaꞌ tiꞌ:«Haꞌ hunteqꞌan mak maxhtikꞌa chinqꞌanbꞌenan, haꞌ kinsaynilojan;
wilchapaxojan yu hunteqꞌan mak mach kinsaynihan.
Haꞌ tet hunteqꞌan anma maxhtikꞌa chiyiyo isbꞌa wetan haꞌ tet walan:
“Haꞌ bꞌey tiꞌ ay hinan, haꞌ bꞌey tiꞌ ay hinan,” kinchihan.
2 Sunilbꞌal tzꞌayik ayto inqꞌabꞌan tet huneꞌ konhobꞌ kaw manhkꞌom;
haꞌ isbꞌeybꞌal huneꞌ konhobꞌ tuꞌ mach kꞌuloj, haꞌ tzet chal isnabꞌal haꞌ chiswatxꞌe.
3 Huneꞌ konhobꞌ tuꞌ kaw yinh insatan chiswatxꞌe mule,
yiniti inhowalan; chisnhusni ispom yibꞌanh txꞌotxꞌ ladrillo watxꞌebꞌil mexhahil,
xolaj bꞌay ay tzꞌunubꞌ.a
4 Hunteqꞌan anma tuꞌ chikankano xol bꞌay mujan kamom,
chixin ekꞌto aqꞌbꞌal yibꞌanh bꞌay ewanyehi; chiskꞌuxni ebꞌnaj ischibꞌehal noꞌ txitam,
haxa yul isxi ebꞌnaj xin ayayto yal chibꞌe mach sajoj.
5 Chalni ebꞌnaj hakaꞌ tiꞌ: “Wal haweh bꞌey tuꞌ, mach chachhitzti inkꞌatanhan,
yuto machi istxꞌojal winhan hakaꞌ hach,” xhi ebꞌnaj.
Ebꞌnaj tuꞌ lahan ebꞌnaj hakaꞌ nhubꞌ chꞌapni yinh intxaman, hakaꞌ xaj qꞌaꞌ aynhetikꞌa yinh sunilbꞌal tzꞌayik.b
6 Tzꞌibꞌnhebꞌilkanayo istxꞌojal ebꞌnaj tuꞌ insatajan, mach tonhe chiwilan hunteqꞌan tiꞌ,
wal xin chiwaqꞌan ispaj selel tet ebꞌnaj,
7 yu istxꞌojal chiswatxꞌe ebꞌnaj yebꞌ yu istxꞌojal iswatxꞌe ismam icham ebꞌnaj.
Ebꞌnaj tuꞌ isnhus ebꞌnaj pom yinh iswiꞌla witz, yaqꞌni chíwaho ebꞌnaj inkꞌulan yet yahto ebꞌnaj yinh iswiꞌ wonhan.
Haninan xin chiwilan tzet chiꞌeliko ebꞌnaj, kat waqꞌnihan ispaj tet ebꞌnaj,»c xhi Komam.
8 Hak tiꞌ yalni Komam Jahawil: «Hayet chilni anma tato kaw ay yal hunu chayan teꞌ uva,
mach tonheho chetato anma yal teꞌ, yuto niman vino chu iswatxꞌen anma yinh teꞌ;
hak tuꞌ xin chiwutehan, yu xahan ay ebꞌnaj inchejabꞌan wuhan, mach chintanhtzelojan sunil konhobꞌ tiꞌ.
9 Chiwaqꞌpohchahojan yuninal yaꞌ Jacob,
ebꞌnaj Judá chiꞌeh ebꞌnaj bꞌey chewal txꞌotxꞌ bꞌey witz wetan yehi;
haxa ebꞌnaj sikꞌbꞌililo wuhan, chiwaqꞌan txꞌo txꞌotxꞌ tet ebꞌnaj, kat yeh ebꞌnaj sat txꞌotxꞌ,
haxa ebꞌnaj inchejabꞌan chiꞌehayo bꞌey tuꞌ.
10 Bꞌey akꞌal Sarón chinohayo noꞌ meꞌ bꞌey tuꞌ, haxa bꞌey akꞌal Acor,
haꞌ tuꞌ chꞌekꞌ noꞌ wakax lowoj, noꞌ tuꞌ yet inkonhobꞌan ye noꞌ, ebꞌnaj kinsaynikꞌojan.
11 Yajaꞌ wal hex kinhebꞌejkanojan, heYahawilintiꞌan,
henahulnhento wonhan wetan yehi; cheyalten itah yet cheqꞌambꞌen heyinhbꞌal tet tioxh Gad,
chejobꞌnipaxayo vino yet cheqꞌambꞌen tzet heyekoj tet tioxh Mení.d
12 Wal xin haꞌ heyinhbꞌal to chexpotxꞌlaxkamo yu chꞌen espada,
chexay jahnoj kat hepotxꞌlaxi, yuto kinawihan teyet, mach xin kextaqꞌwi wetan,
kintzotelan, mach xin heyabꞌe tzet walan, wal xin kexok hewatxꞌe istxꞌojal yinh insatan,
hesaynilo hewatxꞌen tzet ye tuꞌ mach chiwochehan,» xhi Komam.
13 Yuxin yal Komam Jahawil hakaꞌ tiꞌ:
«Tinanh xin ebꞌnaj inchejabꞌan kaw chiwaꞌo ebꞌnaj, wal hex xin chexnhohchahi;
chukꞌ ebꞌnaj tzet chukꞌu, wal hex xin kaw chitaj hetiꞌ, kaw chaqꞌ tzalaho iskꞌul ebꞌnaj, wal hex xin chextxꞌixwokanh.
14 Ebꞌnaj inchejabꞌ tuꞌan kaw chibꞌitni ebꞌnaj yu tzalahilal ay yul yanma ebꞌnaj,
wal hex xin kaw chexawi yu isyaꞌil cheyabꞌe yinh heyanma,
kat yel heyaw yu bꞌiskꞌulal cheyabꞌe.
15 Ebꞌnaj sikꞌbꞌililo wuhan chaqꞌ bꞌinaho ebꞌnaj hebꞌi yet chitzꞌaktiꞌli;
hanin Yahawilintiꞌan xin chexinpotxꞌkamojan, kat inhelnihan isbꞌi ebꞌnaj inchejabꞌ tuꞌan.
16 Haꞌ mak chiqꞌanni isyaxil yibꞌanh sat txꞌo txꞌotxꞌ, haꞌ wetan chisqꞌana hanin kaw yel chiwalan;
haxa hunu mak choche yalaꞌ isyelal yinh hunu tzet ye tuꞌ,
haꞌ inbꞌihan hanin kaw yel chiwalan chaqꞌ bꞌinahoj.
Yuto haꞌ hunteqꞌan isyaꞌtajil yet yalanhtokanoj, nahulnhebꞌilxato wuhan, matxa ixtanho yul insatan.
Huneꞌ akꞌ satkanh yebꞌ huneꞌ txꞌo txꞌotxꞌ akꞌ
17 »Wal tinanh xin chinwatxꞌehan akꞌ satkanh yebꞌ txꞌo txꞌotxꞌ akꞌto;
haꞌ tzet watxꞌebꞌil yet yalanhto chinahulnhelaxtoj,
matxa chinahlaxtij, matxa chisyeti isbꞌa yinh nabꞌale.
18 Tzalahanhwej kat heyaqꞌni tzalaho hekꞌul yinh sunilbꞌal tiempo yinh tzet watxꞌebꞌil wuhan,
yuto chiwitijan tzalahilal yul Jerusalén, haxa iskonhobꞌ chitzala iskꞌul wuhan.
19 Chiwaqꞌ tzalaho inkꞌulan yinta Jerusalén,
chintzalapaxojan yinta inkonhobꞌan. Matxa chiꞌabꞌelax yoqꞌ anma yul konhobꞌ tuꞌ,
matxa chiꞌabꞌelax yel yaw anma yu isyaꞌtajil.
20 Hayet tuꞌ, haꞌ nixhte unin mach peto chikami,
haxa icham anma, masan chiꞌapni yinh kaw ichamil.
Haꞌ mak chikam yinh 100 (hokꞌal) habꞌil, kaw nichꞌan tzehto.
Haxa mak mulum yet chꞌapni yinh 100 (hokꞌal) habꞌil kat istzꞌaktiꞌnhelaxi, hayebꞌchꞌan tiempo chulikꞌoj.
21 Chiswatxꞌekanh anma yatut, kat ye anma yul yatut tuꞌ;
chistzꞌun anma teꞌ uva, kat xin islohni anma sat teꞌ.
22 Mach chiswatxꞌekanh anma yatut yunhe yehayo hunuxa mak yul,
mach chistzꞌun anma teꞌ uva yunhe nan hunuxa mak chiloni sat teꞌ;
yuto hakaꞌ istiempohal hunu te teꞌ, hak tuꞌ istiempohal inkonhobꞌan;
haxa mak sikꞌbꞌililo wuhan, chiyaqꞌ tzalaho iskꞌul, chochen tzet chiswatxꞌe.
23 Mach nabꞌnheho chimunlahi;
haꞌ yuninal chipitzkꞌahi machi tzꞌaktiꞌnhelaxi,
yuto haꞌ mak bꞌay titnaj haꞌ bꞌay aqꞌbꞌil isyaxil Komam Jahawil.
24 Yet yalanhto maxhto chisqꞌan ebꞌnaj wetan,
kat waqꞌnihan tet ebꞌnaj; yet maxhto chilawi istzotel ebꞌnaj wetan xawabꞌenahan tzet chal ebꞌnaj.
25 Noꞌ oj yebꞌ noꞌ yunin meꞌ, hun chiꞌekꞌ noꞌ lowoj;
haxa noꞌ bꞌalam, telaj chislo noꞌ hakaꞌ noꞌ icham wakax;
haxa noꞌ labꞌa pojoj chislo noꞌ. Hunteqꞌan noꞌ tiꞌ,
machi isyaꞌtajil yebꞌ istxꞌojal chiswatxꞌe bꞌey wonhan wetan yehi,»
hak tuꞌ yalnikano Komam Jahawil.