Ispaj istxꞌojal chaqꞌ Komam Dios yebꞌ iskꞌulal chaqꞌ tet Sión
66
Haꞌ Komam Jahawil halni hakaꞌ tiꞌ:«Haꞌ satkanh intzꞌonhobꞌalan yehi,
haxa txꞌo txꞌotxꞌ isbꞌatxobꞌal wojan ye txꞌotxꞌ.
¿Bꞌaytet hunu nha chewatxꞌekanh wetan bꞌay chinehikꞌojan?
¿Bꞌaytuꞌwalil chewatxꞌe hunu xewbꞌal bꞌay wal inxewan?
2 Haꞌ inqꞌabꞌan watxꞌenhe sunil tiꞌ, wuhan yuxin ay sunil.
Hanin Yahawilintiꞌan chiwalan huneꞌ tiꞌ,» xhi Komam. Yalnipaxo Komam:
«Wal xin chinok tꞌanhnojan yinh anma mebꞌaꞌ matzet ayko yipo yanma,
hunteqꞌan ay yelapno intzotiꞌan yul sat.
3 Haꞌ mak chihalten hunu noꞌ icham wakax yinh xahanbꞌalil,
lahan hakaꞌ chispotxꞌkamo hunu naj winaj; haxa mak chihalten hunu noꞌ meꞌ yinh xahanbꞌalil,
lahan hakaꞌto chistzokilto iswiꞌ hunu metx txꞌiꞌ; haxa mak chihalten sat istzꞌunubꞌ isyebꞌalqꞌabꞌ,
lahan hakaꞌto chalte ischikꞌil noꞌ txitam.
Haxa mak chinhusni pom, lahan hakaꞌto lanhan yalni kꞌul-la tzotiꞌ yinh hunu tioxh.
Yajaꞌ yu kaw haꞌ ebꞌnaj watxꞌen isbꞌeybꞌal hakaꞌ kaw choche, yochen yanma ebꞌnaj tzet ye tuꞌ yahbꞌetaj.
4 Hakintuꞌan chiwatijan isyaꞌtajil yibꞌanh ebꞌnaj, yebꞌ xin haꞌ hunteqꞌan tet bꞌay kaw chixiw ebꞌnaj,
haꞌ chiwatijan yibꞌanh ebꞌnaj; yuto hayet kinawihan mach taqꞌwi ebꞌnaj,
haxa yet kintzotelan mach ispajtze ebꞌnaj; wal xin iswatxꞌe ebꞌnaj istxꞌojal yinh insatan,
issaynilo ebꞌnaj iswatxꞌen tzet mach chiwochehan,» xhi Komam.
5 Hex ay yelapno istzotiꞌ Komam yul hesat, abꞌewe yinh tzet chal Komam:
«Haꞌ hunteqꞌan ebꞌnaj heyet konhobꞌ, mach choche kexyilaꞌ,
yebꞌ chextzumbꞌeniloj yuto tzujan hex wintajan, ebꞌnaj tuꞌ halni hakaꞌ tiꞌ:
“¡Alaxojabꞌiko ismay Komam; yu chijil hetzalahi!” xhi ebꞌnaj.
Yajaꞌ wal ebꞌnaj tuꞌ xin chisomchahokanh isnabꞌal ebꞌnaj.
6 ¡Huneꞌ chinhirnhon istit bꞌey konhobꞌ, huneꞌ toxanhe chibꞌili chitit bꞌey Yatut Komam;
haꞌ ton yul isnuqꞌ Komam Jahawil yu chispajtze tet ebꞌnaj ayko ishowal yinh!
7 Konhobꞌ Sión, lahan hakaꞌ hunu ix ix watxꞌina iskꞌul yinh anhe,
yet yalanhto maxhto chitit isyaꞌil iskꞌul, ispitzkꞌana nichꞌan yunin.a
8 ¿Mak abꞌen hunteqꞌan kaw nan yoki hakaꞌ tuꞌ?
¿Mak ilni huneꞌ tuꞌ? ¿Tom chipitzkꞌana huneꞌ konhobꞌ yinh huneꞌ tzꞌayik?
¿Tom yinhnhe hunep chipitzkꞌa huneꞌ niman konhobꞌ?
¿Yajaꞌ Sión hayet istit isyaꞌil iskꞌul, ispitzkꞌa yunin?
9 Hanintiꞌan chiwaqꞌan watxꞌo iskꞌul;
¿tzet xin chu inkachnihan iswatxꞌi iskꞌul?» xhi Komam Jahawil.
«¿Chiminlinhbꞌahan ispitzkꞌahi?» xhi haDiosal.
10 «Aqꞌwe tzalaho hekꞌul yebꞌ Jerusalén,
sunil hex xahan ay heyu, tzalahanhwe yinh.
Sunil hex chitikꞌa heyiqꞌ bꞌiskꞌulal yinh,
nohojabꞌiko tzalahilal teyinh tinanh yebꞌi.
11 Yuxin lahan hakaꞌ hunu hemiꞌ xahan ay hex yu, yuxin chexyaqꞌ txutxwoj,
kat isnoh hekꞌul, kat yaqꞌlokanh hekꞌul, kaw niman iskꞌulal chaqꞌa,» xhi Komam.
12 Yuto yal Komam Jahawil hakaꞌ tiꞌ:
«Chiwaqꞌan aqꞌankꞌulal tet konhobꞌ tuꞌ,
hakaꞌ hunu ha haꞌ chꞌel yojomal,
hakaꞌ hunu ha haꞌ chimalilo istiꞌ;
haꞌ ej nime konhobꞌ tzetkꞌa isqꞌalomal chako tet Jerusalén,
haꞌ xin chꞌaqꞌni tzet cheloh, kat kexischelniti yul isqꞌabꞌ,
kat kexismonten yibꞌanh isbꞌul.
13 Hakaꞌ chu yaqꞌni hunu ix miꞌe yaqꞌlobꞌal iskꞌul yunin,
hak tuꞌ chu waqꞌnihan yaqꞌlobꞌal hekꞌul,
kat yilchapaxo aqꞌankꞌulal heyu yul konhobꞌ Jerusalén,» xhi Komam.
14 Hayet cheyilni hunteqꞌan tiꞌ, kaw chitzalaho heyanma;
isbꞌajil henimanil chiꞌakꞌbꞌiloj, hakaꞌ isyaxbꞌikanh teꞌ telaj.
Chaqꞌ Komam Jahawil yip yohtanhelo ebꞌnaj ischejabꞌ,
yajaꞌ haꞌ mak ayko ishowal yinh Komam xin, chitit ishowal Komam yinh.
15 Yuto wal Komam, chul xol xaj qꞌa qꞌaꞌ, haxa iscarruaje Komam yet howal,
lahan hakaꞌ kajtuxkum yuto chayo Komam sunil ishowal, kat iskachwa Komam yu xaj qꞌa qꞌaꞌ.
16 Yuto hayet chilni Komam Jahawil yinh tzet chꞌeliko sunil anma,
haꞌ qꞌa qꞌaꞌ yebꞌ chꞌen espada chaqꞌbꞌalnhe Komam, kaw xin niman anma chikamilo yu.
17 Haꞌ Komam chalni hakaꞌ tiꞌ:
«Ebꞌnaj chispohilo isbꞌa yebꞌ chissajnhe isbꞌa yunhe yinayo isbꞌa bꞌey bꞌay ay tzꞌunubꞌ,
hununtajil yok tzujno ebꞌnaj yinta hunun;
ebꞌnaj chikꞌuxni ischibꞌehal noꞌ txitam yebꞌ noꞌ txꞌow yebꞌ hunteqꞌanxa no noqꞌ mach sajoj,
hunteqꞌan ebꞌnaj tuꞌ chitanhtzelaxkanilo ebꞌnaj yinh hunelnhe,» xhi Komam Jahawil.
18 Yalnipaxo Komam: «Yuto hanintiꞌan wohtajan tzet chiswatxꞌe ebꞌnaj yebꞌ tzet chiꞌekꞌ yinh isnabꞌal ebꞌnaj; chul huneꞌ tiempo bꞌay chikutxiko sunil ej nime konhobꞌ yebꞌ ebꞌnaj tzijxanhe abꞌxubꞌalehal chala, chitit sunil kat yilni isqꞌaqꞌal inmayan.
19 »Chiwaqꞌan huneꞌ yechel tet ebꞌnaj, ay hunteqꞌan ebꞌnaj tuꞌ chiꞌelkanh, ebꞌnaj tuꞌ chiwatojan ebꞌnaj bꞌey konhobꞌ Tarsis, bꞌey konhobꞌ Fut, yebꞌ bꞌey konhobꞌ Lud, huneꞌ konhobꞌ bꞌay kaw helan ebꞌnaj yinh teꞌ litꞌ; chitopaxo ebꞌnaj bꞌey konhobꞌ Tubal yebꞌ bꞌey konhobꞌ Javán yebꞌ bꞌey konhobꞌ bꞌay kaw nahat ayayo istiꞌ haꞌ mar, hunteqꞌan konhobꞌ maxhto hunelo bꞌay xayabꞌe winhan yebꞌ maxhto chil isqꞌaqꞌal inmayan. Haꞌ ebꞌnaj tuꞌ chihalnikꞌo inkꞌulchꞌanilan xol hunteqꞌan konhobꞌ tuꞌ.
20 »Chiniti ebꞌnaj, ebꞌnaj heyuxhtaj pujanto xol ejla konhobꞌ hakaꞌ yebꞌalqꞌabꞌe tet Komam Jahawil; chitit ebꞌnaj tuꞌ yibꞌanh noꞌ cheh, yibꞌanh carruaje, yebꞌ yibꞌanh teꞌ litera, yebꞌ yibꞌanh noꞌ mula, yebꞌ yibꞌanh noꞌ camello, chul bꞌey witz wetan yehi bꞌey Jerusalén; hakaꞌ chu yiniti ebꞌnaj Israel yebꞌalqꞌabꞌe yul xi kaw saj yehi bꞌey yul watutan. 21 Xol ebꞌnaj tuꞌ, ay ebꞌnaj tiꞌ chinsikꞌilojan yok insacerdotehojan yebꞌ levitahil,» xhi Komam Jahawil.
22 Yalnipaxo Komam: «Hakaꞌ akꞌ satkanh yebꞌ txꞌo txꞌotxꞌ akꞌ chinwatxꞌehan,
aynhetikꞌa yinh sunilbꞌal tiempo insatajan, hak tuꞌ yuninal heyuninal chipohchahoj,
yebꞌ xin hebꞌi, aynhetikꞌa yinh sunilbꞌal tiempo.b
23 Haxa yinh hunun ixahaw, yet unin ixahaw,
yebꞌ yinh hunun sábado, chul ebꞌnaj sunil insatajan, yu yinayo isbꞌa wetan,» xhi Komam Jahawil.
24 Yalnipaxo Komam: «Haxa yet chꞌelto ebꞌnaj yul bꞌeh, chilni ebꞌnaj isnimanil ebꞌnaj winaj ok manhkꞌomal wetan,
haꞌ noꞌ ha haꞌ chilonito isnimanil ebꞌnaj; machi bꞌaqꞌinh chikam noꞌ,
haxa qꞌa qꞌaꞌ chinhusnito ebꞌnaj, machi tanh qꞌaꞌ. Kaw yahbꞌeta chꞌelkaniko ebꞌnaj yul sat anma,» xhi Komam.