Iskol Komam Dios ebꞌnaj Judá yul isqꞌabꞌ naj Senaquerib
37
Hayet yabꞌen yaꞌ rey Ezequías hunteqꞌan tzotiꞌ tuꞌ, istzilnilo yaꞌ xil isqꞌap, yaniko yaꞌ xilqꞌape yet bꞌiskꞌulal yinh, isto yaꞌ yul Yatut Komam Jahawil. 2 Ischejnito yaꞌ rey Ezequías tuꞌ naj Eliaquim, naj chiꞌilni yatut, yebꞌ naj Sebna, naj chꞌabꞌen chejbꞌanile yu yaꞌ rey, yebꞌ ebꞌyaꞌ sacerdote ichamtaxa. Hayet isto ebꞌnaj tzotelo tet yaꞌ Isaías, ischejabꞌ Komam Dios, iskꞌahol yaꞌ Amoz, ayko xil isqꞌap ebꞌnaj yet bꞌiskꞌulal yinh. 3 Yalni ebꞌnaj tet yaꞌ Isaías:—Hak tiꞌ chiyute yalni yaꞌ rey Ezequías hakaꞌ tiꞌ: “Haꞌ tinanh ayonhiko yinh bꞌiskꞌulal yebꞌ yinh isyaꞌtajil yebꞌ yinh istiempohal bꞌay chibꞌuchwa ebꞌnaj winaj yinh Komam Dios. Lahan jeko hakaꞌ hunu ix ix lanhanxa iswatxꞌi iskꞌul, yajaꞌ machi yip ix, hak tuꞌ jehi. 4 Kꞌuxanta mayabꞌe Komam Jahawil, haDiosal bꞌuchwal tzotiꞌ mayal naj yahawil issoldado naj rey Asiria yinh Komam Dios itzitz. Tzettam saqꞌal tato chiyayo Komam Dios isyaꞌtajil yibꞌanh ebꞌnaj yu bꞌuchwal tzotiꞌ mayal naj yinh Komam. Yuxin wal tinanh txahlanh jinh, hanhonh haywanhon ayonhtokꞌo tiꞌ,” xhi yaꞌ, xhi ebꞌnaj.
5 Hayet lahwi istzotel ebꞌnaj ischejabꞌ yaꞌ rey Ezequías tet yaꞌ Isaías, 6 istaqꞌwi yaꞌ Isaías tet ebꞌnaj:
—Hak tiꞌ cheyute heyalni tet yaꞌ rey Ezequías hakaꞌ tiꞌ, haꞌ Komam Jahawil mahalni: “Mach chachxiw yu tzet maxawabꞌe tuꞌ, yet makinisbꞌanihan ebꞌnaj ischejabꞌ naj rey Asiria. 7 Haninan chiwakojan huneꞌ espíritu yet xiwkilal yinh naj rey Asiria, yuxin hayet chiyabꞌen naj isqꞌumal hunu tzet ye tuꞌ, kat ispaxto naj sat istxꞌotxꞌ, hayet chꞌapni naj bꞌey iskonhobꞌ, chinchejnihan potxꞌlaxokamo naj yu chꞌen espada,” xhi Komam, xhi yaꞌ Isaías tet ebꞌnaj.
8 Hayet ismeltzo naj yahawil issoldado Asiria, yabꞌen naj tato matxa naj rey Asiria bꞌey konhobꞌ Laquis, yuxin to naj ilwal yinh naj bꞌey konhobꞌ Libna, yajaꞌ hayet yapni naj bꞌey tuꞌ, lanhan naj rey Asiria yaqꞌlen howal yebꞌ konhobꞌ Libna.
9 Yajaꞌ haꞌ bꞌey tuꞌ yabꞌe naj rey Asiria tzotiꞌ yal naj rey Tirhaca, isreyal Etiopía hakaꞌ tiꞌ: «Tinanh xin intoxahan wanokojan howal tawinh,» xhi naj. Yet yabꞌen naj rey Asiria huneꞌ tuꞌ, ischejnito naj ischejabꞌ yalno tet ischejabꞌ yaꞌ rey Ezequías hakaꞌ tiꞌ: 10 «Hak tiꞌ cheyute heyalni tet naj Ezequías, isreyal Judá: “haDiosal bꞌay chikawxi hakꞌul, tonhe chꞌetli tawinh yu chala tato mach chꞌaykꞌay konhobꞌ Jerusalén yul inqꞌabꞌan. 11 Hach tiꞌ, xahawabꞌe tzet utelax ej konhobꞌ yu ebꞌnaj isreyal Asiria yet yuchkꞌanto ebꞌnaj ej konhobꞌ. ¿Haꞌ tom hach xin, chu hakolnilo habꞌa? 12 ¿Tom iskolilo isdiosal hunteqꞌan konhobꞌ tuꞌ iskonhobꞌ yul isqꞌabꞌ ebꞌnaj wichmaman; hakaꞌ konhobꞌ Gozán, konhobꞌ Harán, konhobꞌ Resef, yebꞌ ebꞌnaj iskꞌahol naj Edén ekꞌlena bꞌey Telasar? 13 ¿Tzet tanhkano naj isreyal Hamat, naj isreyal Arfad, naj isreyal Sefarvaim, yebꞌ naj isreyal konhobꞌ Hena, yebꞌ konhobꞌ Iva?” xhi naj isreyal Asiria,» xhi ebꞌnaj chejabꞌ tuꞌ.
14 Ischahnilo yaꞌ rey Ezequías teꞌ carta tet ebꞌnaj ischejabꞌ naj rey Asiria. Lahwi tuꞌ, yahto yaꞌ Yatut Komam Jahawil, islehbꞌanto yaꞌ teꞌ carta tuꞌ sata Komam. 15 Yok yaꞌ txahlo tet Komam Jahawil, yalni yaꞌ yinh istxah hakaꞌ tiꞌ: 16 «Mam Jahawil, Yahaw yinh Sunil, isDiosal Israel, ayach xolbꞌal ebꞌnaj querubín. Hachnhechꞌan hach tiꞌ Dios yinh sunil ej konhobꞌ ay sat txꞌo txꞌotxꞌ tiꞌ. 17 Mam Jahawil, txalbꞌa hatxikin hawabꞌeni, haj isbꞌaqꞌ hasat hawilni, abꞌe sunil bꞌuchwal tzotiꞌ ischej naj Senaquerib yalaꞌ tawinh, hach Dios itzitz hach tiꞌ.
18 »Yinh kaw yeli Mam Jahawil, haꞌ ebꞌnaj isreyal Asiria xayuchkꞌato ebꞌnaj sunil ej nimeta konhobꞌ yebꞌ istxꞌotxꞌ. 19 Isnhusnito ebꞌnaj isdios hunteqꞌan konhobꞌ tuꞌ, yuto mach Dioso yinh kaw yeli, wal xin haꞌ isqꞌabꞌ ebꞌnaj winaj watxꞌenhe, iswatxꞌen ebꞌnaj te teꞌ yebꞌ chꞌen chꞌen isdiosaloj, yuxin yuchkꞌato ebꞌnaj Asiria tuꞌ. 20 Wal tinanh xin Mam Wahawil, koDiosalanh, kólonhilojanh yul isqꞌabꞌ naj rey Asiria, yu yohtanhenilo sunil ej konhobꞌ ay sat txꞌo txꞌotxꞌ tiꞌ tato hachnhechꞌan tiꞌ Dios hach,» xhi yaꞌ rey Ezequías.
21 Lahwi tuꞌ xin, ischejni yaꞌ Isaías, iskꞌahol yaꞌ Amoz yalno tet yaꞌ rey Ezequías hakaꞌ tiꞌ:
—Hak tiꞌ chiyute yalni Komam Jahawil, isDiosal Israel: “Mawabꞌehan hatxah yinh naj Senaquerib, isreyal Asiria,” xhi Komam. 22 Haꞌ hunteqꞌan tzotiꞌ tiꞌ yal Komam Jahawil yinh naj rey Asiria:
“Haꞌ konhobꞌ Sión, hakaꞌ huneꞌ ix qꞌopo maxhto winaj chiqꞌle,
machi hawelapno yul sat ix, hach rey Senaquerib, chitzebꞌi ix tawinh.
Haꞌ ix kutzꞌin ah Jerusaléna chisyum iswiꞌ tawintaj.
23 ¿Mak maxapitikoj, yebꞌ xin mak makaxhbꞌuchwa yinh?
¿Mak yinh maxawikanh yip yul hanuqꞌ?
¿Mak maꞌelto hasat yibꞌanh yu ayachkanh chawabꞌe?
Wal xin, haꞌ winhan, hanin isDiosal Israel, hanin machi istxꞌojal winhan.
24 Hachejiko hachejabꞌ bꞌahwal winhan, hawalni hakaꞌ tiꞌ:
‘Chinahtojan iswiꞌla witz yebꞌ sunil incarruajehan yet howal, kaw nimankano isbꞌisil;
chinahtojan yinh istzalanil txꞌotxꞌ Líbano,
chinqꞌajnayojan teꞌ cedro nimej istel yebꞌ teꞌ tzꞌisis kaw saqꞌal jilni ay bꞌey tuꞌ.
Chitakinahapnojan iswiꞌla witz bꞌay kaw nahat yekanokanh bꞌay ay teꞌ qꞌebꞌtaj kaw saqꞌal jilni.
25 Hanintiꞌan, chinholan kꞌuh, chiwukꞌnihan ha haꞌ chiꞌilcha wuhan,
chiwaqꞌnitajoyojan ha haꞌ ay bꞌey Egipto yu wojan,’ kachi.
26 ¿Tom mach hawohtajo xin tato hanin Yahawil hintiꞌan kaw payat nabꞌilxa hunteqꞌan tiꞌ wuhan,
yettax kaw payat tuꞌ xaꞌekꞌ yinh innabꞌalan?
Haꞌ tinanh xin lanhan yijni isbꞌa,
yuxin hach tiꞌ chisje hawu hatanhtzenilo ej konhobꞌ kaw kꞌul yeko iskꞌubꞌal,
chawuchkꞌantoj, qꞌalemxanhe chꞌelkanikoj.
27 Haxa anma ay yul hunteqꞌan konhobꞌ tuꞌ pax yip tasataj, isxiwkanh,
issomchakanh isnabꞌal, lahan elkaniko hakaꞌ teꞌ telaj chitajiloj, yebꞌ hakaꞌ istajilo teꞌ itah kaw yax,
yebꞌ hakaꞌ istajilo teꞌ chichꞌibꞌ yibꞌanh txꞌotxꞌ texa iswiꞌ nha, hayet yalanhto maxhto chiyihbꞌiloj, kat istajiloj.
28 Wohtaxahan tzet hawekoj, wohtajan yet chachelto yul hawatut,
yebꞌ yet chachokto yul hawatut, wohtajan tato ayko hahowal winhan.
29 Yuto winhan tit lemna hahowal, hawinikanh habꞌa yinh insatan,
yuxin chiwaltojan wargollahan yul hatxam, chiwaniktojan infrenohan yul hatiꞌ,
chachwaqꞌni meltzohojan yul bꞌeh bꞌay titna hach,” xhi Komam, xhi yaꞌ Isaías.
30 Lahwi tuꞌ xin yalni yaꞌ Isaías tet yaꞌ rey Ezequías hakaꞌ tiꞌ:
“Haꞌ huneꞌ tiꞌ chiꞌok yechelo teyet yinh tzet chiyuhi.
Haꞌ huneꞌ habꞌil tiꞌ yebꞌ yet hunabꞌ chewah ixim trigo tonhe chiyalnhe isbꞌa,
yajaꞌ wal yinh yox habꞌil, hexxa chetxih hetrigo, kat hekꞌupnikanh ixim yet xaqꞌanbꞌilo ixim,
chetzꞌunni teꞌ uva cheloni sat teꞌ.b
31 Haxa anma chitokankano bꞌey Judá, anma chito kolchakanoj,
lahan chꞌeliko hakaꞌ te teꞌ kaw kꞌul chu istokano isxeꞌ yul txꞌotxꞌ, chiyaqꞌni sat yinhla iswiꞌ.c
32 Yuto ay haywanh anma tiꞌ chitokankano bꞌey Jerusalén;
haꞌ ton anma chito kolchakano bꞌey wonhan Sión.
Haꞌ huneꞌ tiꞌ chiyij isbꞌa yu iskꞌulchꞌanil iskꞌul Komam Yahawil kaw aykano yip.
33 Walpaxo yinh naj rey Asiria, hak tiꞌ chiyu yalni Komam Jahawil:
Haꞌ naj rey Asiria mach chiꞌokti naj yul konhobꞌ tiꞌ,
machi litꞌ chisqꞌojpaxti naj yinh, mach chihul naj yebꞌ yescudo yaqꞌaꞌ howal yinh,
mach chiswatxꞌepaxo naj bꞌay chiskol isbꞌa yinhla ishoyanil konhobꞌ tiꞌ.
34 Haꞌtikꞌa yul bꞌeh bꞌay tit naj, haꞌ tuꞌ chimeltzopaxo naj,
mach chiꞌokti naj yul konhobꞌ tiꞌ,” xhi Komam Jahawil.
35 Yalnipaxo Komam: “Hanintiꞌan chintanhehan konhobꞌ tiꞌ,
chinkolnihan yu xahan ay inbꞌihan wuhan,
yebꞌ yu iskꞌulchꞌanil inkꞌulan yinh yaꞌ David inchejabꞌan,” xhi Komam, xhi yaꞌ Isaías.
36 Hak tuꞌ yu isto yángel Komam Jahawil bꞌey iscampamento ebꞌnaj Asiria, ismaqꞌnikamo naj 185 mil ebꞌnaj soldado Asiria bꞌey campamento tuꞌ, haxa yet sahabꞌ sakꞌayal yet hunxa tzꞌayik, yil-laxtij pakꞌbꞌonbꞌayo isnimanil ebꞌnaj soldado Asiria tuꞌ sat txꞌotxꞌ. 37 Hak tuꞌ yu ispaxto naj Senaquerib isreyal Asiria, yehayo naj bꞌey Nínive. 38 Haxa yet hunxa tzꞌayik yet ayikto naj Senaquerib yul yatut tioxh Nisroc, isdiosal naj; yapni naj Adramelec yebꞌ naj Sarezer, ebꞌnaj iskꞌahol naj istejno kamo yu chꞌen espada. Lahwi tuꞌ yelkanh ebꞌnaj, isto ebꞌnaj bꞌey txꞌotxꞌ Ararat. Yokkano naj Esar-hadón, hunxa iskꞌahol naj Senaquerib tuꞌ, reyalo seleloj.