—Haꞌ tinanh, halwe tet naj rey Ezequías: Hak tiꞌ chiyute yalni naj rey Asiria, naj rey kaw nimankano yelapnoj: “¿Mak yinh chikawxi hakꞌul? 5 Ham hawalni tato ay hahelanil yebꞌ hawip hawaqꞌni howal, yajaꞌ matzet chal yelapno tzet chawala. ¿Mak xin chawako yipo hakꞌul tinanh, yuxin chachok manhkꞌomal wetan? 6 Wal xin haꞌ Egipto ayko yipo hakꞌul, yajaꞌ haꞌ Egipto tuꞌ, lahan hakaꞌ hunu teꞌ qꞌojoch pohnaxatoj, ta ay hunu mak chꞌok tzabꞌno yinh, chilahwi yul isqꞌabꞌ yu teꞌ, hak tuꞌ ye naj faraón, isreyal Egipto yinh sunil mak chikawxi iskꞌul yinh naj. 7 Ta cheyal wetan hakaꞌ tiꞌ xin: ‘Haꞌ Komam Jahawil koDiosalanh, haꞌ yinh chikawxi kokꞌulanh,’ ta quexchi. ¿Tom xin mach ischej naj rey Ezequías ilaxoyo sunil bꞌay cheyiyo hebꞌa tet heDiosal bꞌay nahat yekanh, yinipaxayo naj altar, ischejni naj anma Judá yebꞌ anma Jerusalén tato huneꞌnhe altar bꞌay cheyiyo hebꞌa?” xhi naj rey Asiria.

8 »Yalnipaxo naj yahawil issoldado naj rey Asiria: “Wal tinanh xin chinqꞌanan tawet, watxꞌe hatrato yebꞌ wahawilan, naj isreyal Asiria. Hanintiꞌan chiwaqꞌan kabꞌ mil noꞌ cheh tawet, tanhe tzꞌajan hasoldado chꞌahto yibꞌanh noꞌ. 9 ¿Tom xin chaxhqꞌoji hawaqꞌni howal yinh hunu naj capitán machi yelapno xol ebꞌnaj ischejabꞌ naj rey Asiria? Waxanhka chikawxi hakꞌul yinh Egipto yebꞌ yinh iscarruaje yet howal yebꞌ yinh ebꞌnaj soldado chꞌekꞌ yibꞌanh cheh. 10 Hanintiꞌan makintitan waqꞌaꞌan howal teyinh, yuto ayko Komam Jahawil wetbꞌihojan. Haꞌ Komam Jahawil halnhe wetan tato chintanhtzelojan huneꞌ konhobꞌ tiꞌ,” xhi naj yahawil soldado tuꞌ.

11 Yalni naj Eliaquim, yebꞌ naj Sebna yebꞌ naj Joa tet naj yahawil soldado Asiria hakaꞌ tiꞌ:

—Chikoqꞌananh tawet tato chachtzotel jetanh yinh arameo, yuto chikotxumanh. Mach chachtzotel yinh yabꞌxubꞌal Judá yuto lanhan yabꞌen anma ayahto yibꞌanh iskꞌubꞌal huneꞌ konhobꞌ tiꞌ, xhi ebꞌnaj.

12 Istaqꞌwi naj yahawil soldado tuꞌ:

—Machnhetaj teyet yebꞌ tet hereyal makinischejtijan wahawilan walaꞌan hunteqꞌan tzotiꞌ tiꞌ; wal xin hahunpaxo anma ayahto yibꞌanh chꞌen kꞌubꞌ tiꞌ, yilal yabꞌeni, yuto chislobꞌ istzaꞌ, chiyukꞌnipaxto yatxul yebꞌ hex, xhi naj.

13 Lahwi tuꞌ yah linhno naj yahawil soldado Asiria, yahwi naj yinh kaw ip yinh yabꞌxubꞌal ebꞌnaj Judá, yalni naj:

—Abꞌewe tzet chiyal naj rey kaw nimankano yelapnoj, haꞌ ton naj rey yet Asiria, 14 yuto chiyal naj heyabꞌeꞌ hakaꞌ tiꞌ: “Machojabꞌ cheyaqꞌ subꞌchaho hebꞌa tet naj Ezequías, yuto mach chu kexiskolni. 15 Mach cheyako yinh hekꞌul yet chalni naj rey Ezequías ta heDios chikolwa teyinh yet chiyalni naj hakaꞌ tiꞌ: ‘Yinh kaw yeli haꞌ Komam Jahawil chonhkolni yebꞌ kokonhobꞌ tiꞌ, mach chonhalaxiko yul isqꞌabꞌ naj rey Asiria,’ waxanhka xhi naj Ezequías teyet, 16 ¡mach cheyabꞌeto tzet chal naj! yuto haꞌ naj rey Asiria chalni hakaꞌ tiꞌ: ‘Aweko hebꞌa yinh aqꞌankꞌulal yul inqꞌabꞌan, haxinwal cheloh sat heyuva yebꞌ hehigo, cheyukꞌni hunun hex heyaꞌ ayayto yul hekꞌuh. 17 Masanto chinhulan kat kexwinitojan bꞌey huneꞌ txꞌo txꞌotxꞌ hakaꞌ hetxꞌotxꞌ tiꞌ. Haꞌ sat huneꞌ txꞌo txꞌotxꞌ tuꞌ chiꞌel ixim trigo yebꞌ teꞌ uva, haꞌ bꞌey tuꞌ ay pan, ay vino,’ xhi naj rey Asiria. 18 Mach cheyaqꞌ subꞌchaho hebꞌa tet naj rey Ezequías yet chiyalni naj teyet tato chexiskolilo heDios, heYahawil. ¿Tom ay hunu isdiosal hunu nime konhobꞌ tiꞌ yu iskolnilo istxꞌotxꞌ yul inqꞌabꞌan, hanin isreyal Asiria tiꞌ? 19 ¿Bꞌaytuꞌwal ay yip isdiosal konhobꞌ Hamat yebꞌ yip isdiosal konhobꞌ Arfad? ¿Bꞌaytuꞌwal aypaxo yip isdiosal konhobꞌ Sefarvaim? ¿Tom yu iskolnilo hunteqꞌan dios tuꞌ konhobꞌ Samaria yul inqꞌabꞌan? 20 ¿Tzet diosal xol isdiosal hunteqꞌan konhobꞌ tuꞌ xayu iskolnilo istxꞌotxꞌ yul inqꞌabꞌan? Yuxin ¿tom chu iskolnilo heDios, heYahawil konhobꞌ Jerusalén yul inqꞌabꞌan?” xhi naj yahawil ebꞌnaj soldado Asiria.

21 Yajaꞌ tonhe yabꞌe ebꞌnaj tzet yal naj, machi hunu tzotiꞌ ispajtze, yuto yal yaꞌ rey Ezequías tato mach chispajtze ebꞌnaj tzet chiyal ebꞌnaj Asiria. 22 Lahwi tuꞌ ismeltzo naj Eliaquim, naj chꞌilni munil bꞌey yatut yaꞌ rey Ezequías, iskꞌahol yaꞌ Hilcías, yebꞌ naj Sebna, naj chꞌabꞌen chejbꞌanile yu naj rey, yebꞌ naj Joa, istzꞌibꞌlom naj rey, iskꞌahol yaꞌ Asaf, iskꞌatanh yaꞌ rey Ezequías, istzilnilo ebꞌnaj xil isqꞌap, yalni ebꞌnaj tet yaꞌ Ezequías sunil tzet yal naj yahaw ebꞌnaj soldado Asiria.