Iskꞌulchꞌanil chiꞌeliko Sión yet bꞌaqꞌinh
35
Chitzala txꞌotxꞌ desierto, txꞌotxꞌ kaw tzꞌinan,chitzalahopaxo txꞌotxꞌ tajin txꞌotxꞌ; chixumaklo txꞌotxꞌ hakaꞌ teꞌ rosa.a
2 Chixumakli txꞌotxꞌ yinh kaw niman, kat istzala txꞌotxꞌ,
kat isbꞌitni txꞌotxꞌ yu tzalahilal. Kaw kꞌulchꞌan chꞌelkaniko txꞌotxꞌ hakaꞌ txꞌotxꞌ Líbano,
yebꞌ kaw kꞌul chꞌelkaniko sat txꞌotxꞌ hakaꞌ txꞌotxꞌ Carmelo yebꞌ txꞌotxꞌ Sarón.
Sunil anma xin chiꞌilni isqꞌaqꞌal ismay Komam Jahawil yebꞌ iskꞌulchꞌanil Komam Dios, koDiosal.
3 Aqꞌwe yip yanma makta sikinaxa isqꞌabꞌ,
aqꞌwepaxo yip yanma makta matxa yip iswitxꞌiꞌ.
4 Halwe tet makta machi yip yanma hakaꞌ tiꞌ: «¡Aweko yip heyanma,
mach chexxiwi! Chihul Komam Dios koDiosal,
haꞌ kaw Komam chul konhiskoloꞌ.
Haxa ebꞌnaj ayko ishowal jinh chihul Komam
kat ispajtzen Komam yinh tzet iswatxꞌe ebꞌnaj jinh,» kexchi.
5 Hayet tuꞌ chihajlo isbꞌaqꞌ sat ebꞌnaj mach chu yilni,
kat ishajlo istxikin ebꞌnaj mach chabꞌe.
6 Haꞌ ebꞌnaj txꞌoj ye yoj, chiwatxꞌilo yoj,
kat yekꞌ tꞌujla ebꞌnaj hakaꞌ yekꞌ tꞌujla noꞌ sajche,
haxa ebꞌnaj suk chiwatxꞌilo yaqꞌ ebꞌnaj, kat isbꞌitni ebꞌnaj,
kat yilcha ha haꞌ yul kꞌuh chihol-lax sat txꞌotxꞌ desierto,
kat yel yojomal ha haꞌ sat txꞌotxꞌ tajin txꞌotxꞌ.
7 Haꞌ txꞌotxꞌ tajin txꞌotxꞌ, chimeltzoko txꞌotxꞌ hakaꞌ txꞌotxꞌ bꞌay ay ha haꞌ panhan, hakaꞌ tanque;
haꞌ bꞌey txꞌotxꞌ tajin txꞌotxꞌ tuꞌ chinohilo sat txꞌotxꞌ yu isnuqꞌ ha haꞌ.
Haꞌ bꞌay ay iswaybꞌal noꞌ oj tinanh, haꞌ tuꞌ chichꞌibꞌ teꞌ ah yebꞌ teꞌ junco.
8 Haꞌ bꞌey tuꞌ chiwatxꞌo huneꞌ niman bꞌeh, haꞌ huneꞌ bꞌeh tuꞌ,
Bꞌeh yet anma yetxa Komam Dios, chꞌok isbꞌihoj.
Haꞌ yul huneꞌ bꞌeh tuꞌ, mach chꞌekꞌ anma mach sajo yehi, hakaꞌ yalni chejbꞌanile.
Haꞌ mak chꞌekꞌ yul huneꞌ bꞌeh tuꞌ, waxanhka kaw suk, yaj mach chikꞌaytoj.
9 Haꞌ bꞌey tuꞌ machi noꞌ bꞌalam,
machipaxo hunuxa noꞌ howla noqꞌ chꞌekꞌi;
haꞌ yul bꞌeh tuꞌ chꞌekꞌ anma kolbꞌilxa.
10 Haꞌ mak chiskolilo Komam Jahawil, chimeltzohi,
kat yul bꞌey Sión yinh tzalahilal, haꞌ huneꞌ tzalahilal tuꞌ xin aynhetikꞌa yinh yanma yinh sunilbꞌal tiempo.
Kaw tzalahilalnhetikꞌa yehi, matxa chiyabꞌe bꞌiskꞌulal, matxapaxo mak chꞌoqꞌi.