Isyaꞌtajil chayo Komam Jahawil yibꞌanh ej nime konhobꞌ
34
Hex nime konhobꞌ kutxbꞌaweko hebꞌa, hitzanhwekoj,cheyabꞌen tzet chiwalan, kat heyabꞌenpaxo hex konhobꞌlaj.
Yabꞌehabꞌpaxo txꞌo txꞌotxꞌ yebꞌ sunil tzet ay sat txꞌotxꞌ,
yabꞌehabꞌpaxo sunil yul sat yibꞌanhqꞌinal tiꞌ yebꞌ sunil tzet chichꞌibꞌ sat.
2 Yuto haꞌ Komam Jahawil kaw lemanti ishowal yinh sunil ej nimeta konhobꞌ
yebꞌ yinh sunil ebꞌnaj soldado ay yulajla konhobꞌ tuꞌ;
chistanhtzenkanilo Komam chiyaniko Komam ebꞌnaj soldado yul isqꞌabꞌ kamikal.
3 Haꞌ isnimanil ebꞌnaj chikam yulajla konhobꞌ tuꞌ,
tonhe chikankano pakꞌno sat txꞌotxꞌ, kat yekꞌ sam isnimanil tuꞌ,
toxanhe chꞌekꞌ yojomal chikꞌ iswiꞌla witz.
4 Haꞌ sunil tzet chitzejla yul satkanh chitanhiloj,
haꞌ satkanh chischulayo isbꞌa hakaꞌ ischul-laxayo hunu hum.
Sunil txꞌumel ay yul satkanh chiꞌaykꞌayi,
hakaꞌ yaykꞌay xaj teꞌ uva, maka hakaꞌ yaykꞌay xaj teꞌ higuera.a
5 Kꞌulxa ye yespada Komam Jahawil yul satkanh,
haꞌ yespada tuꞌ chiꞌaykꞌay yibꞌanh Edom,
chiꞌay isyaꞌtajil yibꞌanh huneꞌ konhobꞌ tuꞌ,
yuto tzꞌaktiꞌnhebꞌilxa yu Komam.
6 Haꞌ yespada Komam Jahawil chinohiko chikꞌ yebꞌ xhepu yinh,
hakaꞌ yet chipotxꞌlax noꞌ meꞌ yebꞌ noꞌ chiw xahanbꞌalil,
kat isnohiko ischikꞌil noꞌ yebꞌ ismantecahil isqꞌejtxꞌotxꞌ yinh chꞌen espada.
Haꞌ isxahanbꞌal Komam Jahawil, haꞌ bꞌey Bosra chiyuhi,
kat yok niman kamikal yu Komam sat txꞌotxꞌ Edom.b
7 Haꞌ yinta anma chikam tuꞌ chiꞌaykꞌaypaxo noꞌ búfalo,
yebꞌ noꞌ nixhte winaj yunin wakax, yebꞌ noꞌ tzehla wakax.
Haꞌ istxꞌotxꞌ anma tuꞌ chiyukꞌ txꞌotxꞌ chikꞌ, kat yulikanh ispojojal txꞌotxꞌ yu noꞌ xhepu.
8 Yuto haꞌ yinh huneꞌ tzꞌayik tuꞌ chispajtze Komam Jahawil yinh tzet istxꞌojal chu anma,
haꞌ ton istiempohal bꞌay chisyelo Komam ishowal yinh tzet utelax konhobꞌ Sión yu hunteqꞌan anma tuꞌ.
9 Haꞌ bꞌey Edom chimeltzoko ha haꞌ qꞌolal,
haxa pojoj chimeltzoko azufrehal,
kat yah xaj qꞌaꞌ yinh istxꞌotxꞌ ebꞌnaj yu qꞌol.c
10 Haꞌ xaj qꞌa qꞌaꞌ tuꞌ, mach chitanh yet aqꞌbꞌalil,
mach chitanhpaxo tzꞌayikal,
haꞌ isnhubꞌal qꞌa tuꞌ chiꞌah yinh sunilbꞌal ej tiempo.
Chibꞌejlaxkano txꞌotxꞌ Edom tuꞌ yinh sunilbꞌal tiempo,
matxa bꞌaqꞌinh chꞌekꞌ hunu mak sat txꞌotxꞌ.
11 Haꞌ konhobꞌ tuꞌ, chiꞌokkano iswaybꞌalo noꞌ pelícano,
noꞌ erizo, noꞌ pop yebꞌ noꞌ hoh;
kaw tzꞌajan chu yay isyaꞌtajil yibꞌanh konhobꞌ tuꞌ yu Komam, hakaꞌto chꞌok nivel yebꞌ plomo yinh,
chimeltzokaniko desiertohal yebꞌ xin kaw tzꞌinan chukano yu Komam.
12 Ebꞌnaj yahawil chal-lax yinh ebꞌnaj ta matxa mak yibꞌanh chaqꞌ ebꞌnaj yahawilal.
Haꞌ sunil ebꞌnaj winaj kaw ay yelapnoj matxa yelapno chꞌelkaniko ebꞌnaj.
13 Haxa teꞌ txꞌix chichꞌibꞌ yul ispalacio ebꞌnaj, kat ischꞌibꞌpaxo teꞌ txꞌix yebꞌ telaj yul iscuartel,
kat yok cuartel tuꞌ yatuto noꞌ oj, haxa yamaqꞌil, chꞌok yatuto noꞌ avestruz yebꞌ nixhte yunin.
14 Haꞌ bꞌey tuꞌ chiskutxbꞌa isbꞌa noꞌ howla noqꞌ ay bꞌey txꞌotxꞌ desierto,
chiyawtenpaxo noꞌ xoltelajil chiw yetbꞌi bꞌey tuꞌ;
chꞌapnipaxo noꞌ pop eho bꞌey tuꞌ, chissayni noꞌ bꞌay chiwayi.
15 Haꞌ bꞌey tuꞌ chiswatxꞌe noꞌ pop yatut bꞌay chiyayo ishos,
kat yelti nixhte yunin noꞌ, chistxupnayo noꞌ nixhte yunin yalanh xikꞌ.
Haꞌ tuꞌ chiskutxbꞌapaxo isbꞌa noꞌ usmij, noꞌ miꞌe yebꞌ noꞌ mame.
16 Saywe yul yum Komam Jahawil,
kat heyilni tato sunil hunteqꞌan no noqꞌ chibꞌina yul hum tuꞌ, machi hunu noꞌ mach tzꞌajanoj.
Tzꞌajan noꞌ icham tzꞌajanpaxo noꞌ miꞌe,
yuto haꞌ kaw istiꞌ Komam Jahawil halnhekanoj.
Haꞌ Yespíritu Komam chikutxbꞌaniko noꞌ sunil.
17 Yakano Komam ismajul hunun noꞌ.
Haꞌ txꞌo txꞌotxꞌ okkano ismajulo noꞌ yinh sunilbꞌal tiempo,
haꞌ tuꞌ xin ehayo noꞌ.