Yinh Komam Jahawil chitit kolbꞌanile
33
¡Kꞌanchꞌan hach chachok eleqꞌ,chawinito sunil tzet chiꞌilcha hawu, yajaꞌ machi mak xin xaꞌok eleqꞌ tawinh!
Hach chachpakꞌikoj, yajaꞌ machi mak xapakꞌiko tawinh.
Yajaꞌ xin hayet lahwi hawok eleqꞌ kat yelqꞌalaxto tzetaj ayach,
yet chilahwi hapakꞌiko hawelqꞌanto tzet ay hawet anmahil,
kat ispakꞌiko tawinh.a
2 Mam Jahawilanh, tzꞌayojabꞌ hakꞌul jinhanh, yuto echmabꞌil hach juhanh,
haꞌ haqꞌabꞌ chikolwa jinhanh hunun sakꞌayalil;
hach chawaqꞌpaxo kolbꞌanile jetanh yinh istiempohal isyaꞌtajil.
3 Haꞌ konhobꞌlaj, chꞌelkanh yet chabꞌen isbꞌili istit hahowal,
haxa nimeta konhobꞌ chisajlemitoj yet chachahwanoj.
4 Haꞌ qꞌalomal yilo yet isqꞌoji yinh hunteqꞌan konhobꞌ chiꞌilaxpaxiloj tet.
Chikutxbꞌalaxiko ebꞌnaj hakaꞌ iskutxbꞌalaxiko noꞌ qꞌul,
kat yapni bꞌulna ebꞌnaj ayko ishowal yinh yibꞌanh isqꞌalomal tuꞌ
hakaꞌ yapni bꞌulbꞌon noꞌ qꞌul yibꞌanh tzꞌunubꞌ.
5 Chꞌalaxiko ismay Komam Jahawil,
Komam ay satkanh bꞌay kaw nahat yekanh.
Nohilo sunil sat konhobꞌ Sión yu iskꞌulchꞌanil yebꞌ yu istoholal yu Komam.
6 Haꞌ yinh huneꞌ tiempohal tuꞌ kaw ay helanile yebꞌ nabꞌale yebꞌ xin kaw ay kolbꞌanile,
kat hexiw tet Komam Jahawil;
haꞌ hexiw tet Komam tuꞌ xin, haꞌ ton heqꞌalomal yekoj.
7 Abꞌewe yel yaw ebꞌnaj embajador yulaj bꞌeh,
haxa ebꞌnaj chejabꞌ chejlax yaniko aqꞌankꞌulal,
kaw chꞌok ebꞌnaj oqꞌo sikꞌlebꞌil.b
8 Haꞌ yulaj bꞌeh kaw tzꞌinan, matxa mak chilaekꞌi,
istanhtze ebꞌnaj tzet ye tuꞌ tꞌinhbꞌabꞌiltikꞌa yu,
chisyah ebꞌnaj ej nimeta konhobꞌ,
machi yelapno ebꞌnaj winaj yul sat ebꞌnaj.
9 Yok bꞌiskꞌulal yinh txꞌo txꞌotxꞌ, yok yabꞌil yinh txꞌotxꞌ,
istxꞌixwipaxokanh txꞌotxꞌ Líbano, isqꞌajlaxayo teꞌ qꞌebꞌtaj ay sat txꞌotxꞌ.
Ismeltzoko txꞌotxꞌ Sarón hakaꞌ jilni txꞌotxꞌ desierto,
istzikobꞌtanhelax txꞌotxꞌ Basán yebꞌ txꞌotxꞌ Carmelo.
10 Chiyalni Komam Jahawil hakaꞌ tiꞌ:
«Wal tinanh xin, chinahwanojan, wal tinanh chinilaxkanhan,
kat yalaxiko inmayan.
11 Haꞌ tzet xahewatxꞌe hex tiꞌ yebꞌ tzet chꞌekꞌ yinh henabꞌal,
qꞌalemnhe, hakaꞌ istajinal xaj te teꞌ yebꞌ teꞌ yojsah;
chexuko qꞌaꞌ hex tiꞌ, hex hunex chextzꞌatoj.
12 Haxa ej konhobꞌ, chinhuslax hakaꞌ isnhuslax chꞌen txoh,
yebꞌ hakaꞌ isnhuslaxto teꞌ txꞌix xatzokꞌlaxayoj.
13 Abꞌewelo hex ay hex nahata yinh tzetaj xaꞌinwatxꞌehan,
haxa hex ay hex kawil tiꞌ ohtanhewelo wipan,» xhi Komam.
14 Haꞌ anma mulum chitakkanh iskꞌul bꞌey Sión,
kat isxiwkanh anma chal isbꞌa kꞌulal, chalni hakaꞌ tiꞌ:
«¿Makonh tiꞌ chitecha ju jehiko xol qꞌa qꞌaꞌ chonhnhusnitoj?
¿Makonh tiꞌ chitecha ju jehiko xol qꞌa qꞌaꞌ machi bꞌaqꞌinhal chitanhi?» xhi anma tuꞌ.
15 Haꞌ mak chibꞌeybꞌalnhen istoholal, kat yalni isyelal;
haꞌ mak mach chꞌok qꞌalomal yu yiqꞌni ismelyu yinh istxꞌojal;
haꞌ mak mach chisje iskꞌul ischahni melyu yinh ewantajil.
Haꞌ mak chismajche istxikin yunhe machi yato yet xol ebꞌnaj maqꞌomkamo anma;
haꞌ mak chismajche sat yunhe mach chꞌok tꞌanhno yinh istxꞌojal.
16 Haꞌ mak tuꞌ chiꞌehayo bꞌey huneꞌ txꞌotxꞌ nahat yekanh,
chiꞌeh bꞌay kaw tꞌinhan yekoj, haꞌ chiꞌeh yul cuartel nabꞌa chꞌen bꞌay matzet chihul yinh.
Chꞌaqꞌlax ispan kat yaqꞌlax haꞌ yukꞌuꞌ, aynhetikꞌa tzet chislo.
17 Chawil yu isbꞌaqꞌ hasat yinh naj Rey kaw aykano ismay iskꞌulchꞌanil;
haꞌ hetxꞌotxꞌ kaw niman yekoj, cheyilto txꞌotxꞌ kaw nahata.
18 Hayet chenaniti xiwkilal ilbꞌil heyu, cheyalni:
«¿Bꞌaytuꞌwal ay naj chibꞌisni chꞌen tohlabꞌal chꞌel yinh konhobꞌ?
¿Bꞌaytuꞌwal ay naj chimalen hanta chꞌen tohlabꞌal tuꞌ?
¿Bꞌaytuꞌwal ay ebꞌnaj chibꞌisni hanta teꞌ nime nha ay yul konhobꞌ tiꞌ?» kexchi.
19 Matxa cheyil huneꞌ konhobꞌ kaw aykanh chiyute isbꞌa yu yekꞌnajil,
huneꞌ konhobꞌ nan yabꞌxubꞌal, mach chitxumchalo heyu tzet chiyala.
20 Cheyil konhobꞌ Sión, konhobꞌ bꞌay cheyekꞌtze qꞌinh kaw ay yelapnoj,
haꞌ isbꞌaqꞌ hesat chiꞌilni Jerusalén, bꞌay ay aqꞌankꞌulal.
Haꞌ Jerusalén machi helobꞌtanhelaxi
hakaꞌ ishelobꞌtanhelax qꞌap mantiado machi hokꞌlaxkanh yestakahil,
machi tꞌijmopaxo istxꞌanhal.
21 Yinh kaw yeli, haꞌ Komam Jahawil, Komam kaw aykano yip chisyelo isbꞌa koxol.
Haꞌ bꞌey tuꞌ kaw ay ha haꞌ chꞌekꞌi kaw nime sat,
haꞌ yibꞌanh haꞌ machi ekꞌ ebꞌnaj ayko ishowal yinh konhobꞌ yebꞌ isbarco kaw nimej.
22 Yuto Komam Jahawil haꞌ kojuez, Komam Jahawil chiwatxꞌen chejbꞌanile,
Komam Jahawil haꞌ Korey, haꞌ Komam chonhkolni.
23 Haꞌ istxꞌanh ebꞌnaj ayko ishowal jinh tiꞌ, toyqꞌahi,
mach kawo yehayto yoyal, machi bꞌay chiyiqꞌ yip istxꞌanhal isvelohal isbarco ebꞌnaj.
Hak tuꞌ chu kopohnikanh hunteqꞌan isqꞌalomal ebꞌnaj ayko ishowal jinh.
Haꞌ hun ebꞌnaj tzakaꞌ ye yoj, haꞌ ebꞌnaj chichahnipaxo hunteqꞌan qꞌalomal tuꞌ.
24 Haꞌ anma chiꞌeh bꞌey Sión, machi hunu chihalni ta yaꞌay,
haꞌ mak chiꞌeh bꞌey konhobꞌ tuꞌ chiꞌaqꞌlax nimankꞌulal yinh ismul.