Yaꞌ rey kaw tohol tzet chiswatxꞌe
32
Ay huneꞌ yaꞌ chꞌok reyalil, haꞌ yaꞌ tuꞌ haꞌ istoholal chiswatxꞌe;haxa ebꞌnaj yahaw konhobꞌ chiyil ebꞌnaj yinh tzet chꞌeliko anma yinh istoholal.
2 Haꞌ huneꞌ yaꞌ rey tuꞌ, lahan hakaꞌ bꞌay chiyebꞌa isbꞌa anma tet nime jaqꞌeqꞌ;
lahan yaꞌ hakaꞌ bꞌay chiskol isbꞌa anma yet chinhirla kꞌuh
lahanpaxo hakaꞌ ha haꞌ chꞌekꞌ yojomal bꞌey txꞌotxꞌ tajin txꞌotxꞌ yet waresma,
lahanpaxo yaꞌ hakaꞌ yenhel hunu chꞌen niman chꞌen
bꞌay chiyenhelnhe isbꞌa anma tet qꞌa qꞌaꞌ.
3 Hayet tuꞌ, haꞌ mak machi kaw chu yilni, kaw kꞌulxa ismujli,
haxa istxikin makta mach kaw chabꞌe, kam chihajchakanoj,
kat istxumcha yu tzet chiyabꞌe.
4 Haxa mak somchanakanh isnabꞌal, chitxumchalo helanile yu,
haxa mak chilekta istiꞌ istzoteli,
chiwatxꞌilo istzoteli yebꞌ habꞌanxa istzoteli.
5 Haꞌ mak txꞌoj, matxahojabꞌ chal-lax kꞌulal;
haxa mak leqꞌtiꞌ, machojabꞌ chihal-laxi tato ay yelapnoj.
6 Yuto ebꞌnaj txꞌoj, haꞌ istxꞌojal chiyal ebꞌnaj,
haꞌ machiswalilal chꞌekꞌ yinh yanma ebꞌnaj, haꞌ chiswatxꞌe.
Chiyal ebꞌnaj txꞌoj tzotiꞌ yinh Komam Jahawil.
Chiyinilo ebꞌnaj tzet chislo makta chinhochahi,
chiyinilo ebꞌnaj haꞌ tet makta chitaj istiꞌ.
7 Haꞌ tzet chiswatxꞌe ebꞌnaj leqꞌtiꞌwom, mach kꞌuloj,
chisnakanh ebꞌnaj istxꞌojal yebꞌ leqꞌtiꞌal
yunhe yaqꞌni subꞌchaho anma mach chu iskolni isbꞌa,
chisbꞌalnikanh ebꞌnaj mule yinh anma mebꞌaꞌ.
8 Yajaꞌ wal ebꞌnaj kꞌul, haꞌ iskꞌulal chꞌekꞌ yinh isnabꞌal, haꞌ iskꞌulal tuꞌ xin chꞌinikanh.
Kachbꞌanile yinh ebꞌix ix ah Jerusalén
9 ¡Hex ix ah Jerusalén, kaw machi kam hekꞌul yinh tzet cheyu, ahanhwewanoj,
kat heyabꞌen tzotiꞌ chiwalan; hex ix kaw mach ok yinh hekꞌul yu isahil,
abꞌewe tzet chiwalan teyet tiꞌ!
10 Kaw matzet cheyako yinh hekꞌul heyalni, yajaꞌ yulbꞌal huneꞌ tiempo tiꞌ,
cheyilaꞌ isyaꞌtajil, yuto matxa uxu uva, matxapaxo sat tzꞌunubꞌ chiꞌilaxkanh.
11 ¡Hex ix mach ayoko yinh hekꞌul hetxumni,
bꞌilanhwekanh yu xiwkilal, kat issomchakanh yul hewiꞌ yu kabꞌkꞌulal!
¡Hex ix matzet chal hekꞌul, iwelo xil heqꞌap ayko teyinh tiꞌ,
kat heyaniko xilqꞌape yet bꞌiskꞌulal teyinh!
12 Chetinhni istxam hekꞌul yu heqꞌabꞌ, yu bꞌiskꞌulal,
yuto matxa chaqꞌ sat tzꞌunubꞌ sat txꞌotxꞌ kaw kꞌul,
yebꞌpaxo matxa teꞌ uva teꞌ kaw kꞌul chuko sat.
13 Yuto haꞌ teꞌ txꞌix yebꞌ howla telaj chichꞌibꞌ sat istxꞌotxꞌ inkonhobꞌan,
kat yapni isyaꞌtajil yulaj sunil nha bꞌay aynhetikꞌa qꞌinh,
hunteqꞌan tzalahilalnhetikꞌa ye yet yalanhtokanoj.
14 Yuto haꞌ palacio chitzꞌinhlokanoj haxa anma kaw niman ay yul konhobꞌ tiꞌ, chikꞌaykanh.
Haꞌ torre bꞌay chitanhelax konhobꞌ yebꞌ cuartel,
chiꞌokkano iswaybꞌalo no noqꞌ yinh sunilbꞌal tiempo.
Haꞌ yul konhobꞌ tiꞌ chixew noꞌ xoltelajil burro kat yekꞌ noꞌ wakax lowoj.
15 Masanto yet chꞌalaxayo Espíritu ay yul satkanh teyibꞌanh,
kat ismeltzoko txꞌotxꞌ desierto kꞌulal,
kat ismeltzoko txꞌo txꞌotxꞌ kaw kꞌul yinh qꞌebꞌtajil.a
16 Chibꞌeybꞌalnhelax iskꞌulal sat txꞌotxꞌ desierto;
chibꞌeybꞌalnhelaxpaxo istoholal sat txꞌotxꞌ kꞌul-la txꞌotxꞌ.
17 Haꞌ istoholal chibꞌeybꞌalnhelax tuꞌ chiyaqꞌ aqꞌankꞌulal,
yebꞌ xewilal yebꞌ istꞌinhanil yinh sunilbꞌal tiempo.
18 Chꞌehikꞌo inkonhobꞌtiꞌan yinh aqꞌankꞌulal,
kat yepaxiko yinh istꞌinhanil, kat isxew yinh tzalahilal.
19 Waxanhka chiꞌaykꞌay chꞌen sajbꞌat yibꞌanh teꞌ qꞌebꞌtalaj,
wal konhobꞌ xin chitanhtzelaxilo sunil.
20 ¡Saqꞌal heyet hex chetzꞌun hetzꞌunubꞌ istiꞌla sunil ha haꞌ,
chebꞌejtzonkano hewakax yebꞌ heburro lowoj!