Ebꞌnaj Egipto anma ebꞌnaj mach Dioso ebꞌnaj
31
¡Kꞌanchꞌan ebꞌnaj chito bꞌey Egipto yu issayni kolwal, kat iskawxi iskꞌul yinh noꞌ cheh,chiyaniko ebꞌnaj carruaje ay bꞌey Egipto tuꞌ yipo iskꞌul yuto kaw nimankanoj.
Chiyanipaxiko ebꞌnaj ebꞌnaj soldado kaw helan yaqꞌni howal yibꞌanh cheh yipo iskꞌul.
Machi xin chꞌok tꞌanhno ebꞌnaj yinh Komam Dios, Komam machi istxꞌojal, isDiosal Israel.
Mach xin chissayikꞌo ebꞌnaj Komam Jahawil yu iskolwa yinh ebꞌnaj!
2 Yajaꞌ helanpaxo Komam, chiyati Komam isyaꞌtajil yibꞌanh ebꞌnaj,
haꞌ tzet chiyal Komam mach chꞌekꞌto yet yijni isbꞌa.
Chiꞌahwano Komam kat yanayo isyaꞌtajil yibꞌanh konhobꞌ txꞌoj isbꞌeybꞌal,
yebꞌ yibꞌanh makta chikolwa yinh anma txꞌoj isbꞌeybꞌal tuꞌ.
3 Haꞌ ebꞌnaj Egipto tuꞌ anma ebꞌnaj, mach Dioso ebꞌnaj;
haxa ischeh ebꞌnaj, chibꞌenhe, machi espíritu yinh;
yuxin hayet chiyinikanh Komam Jahawil isqꞌabꞌ chiyanayo isyaꞌtajil,
chiꞌaykꞌay ebꞌnaj chikolwahi, kat yaykꞌaypaxo ebꞌnaj chikol-laxi;
hak tuꞌ chu istanhkanilo ebꞌnaj sunil.
4 Yuto haꞌ Komam Jahawil halni wetan hakaꞌ tiꞌ:
«Hakaꞌ chu yel yaw noꞌ miꞌe bꞌalam yebꞌ yunin, yibꞌanh noꞌ meꞌ chitzabꞌcha yu,
waxanhka chiskutxbꞌa isbꞌa ebꞌnaj tanhem meꞌ, kat yel yaw ebꞌnaj yinh noꞌ,
mach chixiw noꞌ. Mach chixiwpaxo noꞌ yabꞌen yekꞌ wejwon ebꞌnaj yinta noꞌ.
Hak tuꞌ chu wulan waqꞌnojan howal bꞌey wonhan Sión, hanin Yahawil yinh sunil.
5 Hakaꞌ chu yekꞌ purpun noꞌ chꞌik istanhen nixhte yunin, hak tuꞌ chu intanhenan Jerusalén,
hanin Yahawil yinh sunil, haninan chintanhehan, chinkolnipaxojan,» xhi Komam.a
6 ¡Meltzanhwe yul isqꞌabꞌ Komam Jahawil,
Komam bꞌay kaw yelaꞌ kaw manhkꞌom heyute hebꞌa, hex Israel!
7 Yuto chiꞌapno istzꞌayikal bꞌay cheqꞌojto hetioxh watxꞌebꞌil yinh chꞌen plata yebꞌ yinh chꞌen oro,
hunteqꞌan tioxh tuꞌ watxꞌebꞌil heyu yu hetxꞌojal.
8 Yalnipaxo Komam: «Chitanhilo Asiria yu espada, yajaꞌ maxhtaj yu yespada ebꞌnaj winaj.
Chitanhkaniloj, yajaꞌ maxhtaj yu espada chiyaqꞌbꞌalnhe anma.
Ay ebꞌnaj xin chꞌelkanh tet espada tuꞌ, kat yilaxto ebꞌnaj tzehtaj chejabꞌoj.
9 Haxa yu xiwkilal chꞌelkanh isreyal ebꞌnaj Asiria tuꞌ,
kat isbꞌejnipaxkano ebꞌnaj yahawil soldado isbandera yu xiwkilal,» xhi Komam Jahawil,
Komam ayayo isqꞌaꞌ bꞌey Sión, yebꞌ ishorno bꞌey Jerusalén.