Haꞌ kolwal chissay ebꞌnaj Israel bꞌey Egipto nabꞌanhe
30
Haꞌ Komam Jahawil halni hakaꞌ tiꞌ:«¡Kꞌanchꞌan ebꞌnaj kꞌahole chispohilo isbꞌa, chisayniko mak chikuyni,
maxhtaj hinan chinissayikojan yu waqꞌnihan kuybꞌanile tet.
Chissay hunuxa tzet chako yenheloj,
mach xin yalanho Wespírituhan chiskol isbꞌa,
hak tuꞌ xin chiꞌahkanh yaqꞌbꞌil ismul yibꞌanh!
2 Chispohilo isbꞌa winhan, chito bꞌey Egipto,
mach xin tzet chisqꞌambꞌe wetan.
Haꞌ yip naj faraón chissaya yu yiqꞌnikanh yip,
chiyaniko Egipto tuꞌ yipo iskꞌul yu iskolni isbꞌa yinh.
3 Yajaꞌ mak chisaynikꞌo yip naj faraón chikan yinh txꞌixobꞌal,
haxa mak chissaynikꞌoj ta chikolwa Egipto yinh chisomchakanh isnabꞌal.
4 Hayet ay ebꞌnaj yahawil yinh hekonhobꞌ bꞌey Zoán
yebꞌ yet chiꞌapni ebꞌnaj embajador bꞌey Hanes yul ismajul Egipto,
5 kat hetxꞌixwikanh hesunil yu konhobꞌ Egipto tuꞌ, yuto matzet chiyaqꞌ teyet,
mach chikolwa teyinh, matzet cheyiqꞌ yinh;
wal xin haꞌ txꞌixwilal yebꞌ isyaꞌtajil chiyaqꞌ teyet,» xhi Komam.
6 Tzotiꞌ yalkano Komam yibꞌanhilo no noqꞌ chꞌekꞌ bꞌey txꞌotxꞌ Neguev, chalni hakaꞌ tiꞌ:
«Haꞌ txꞌotxꞌ bꞌay ay huchanil yebꞌ isyaꞌtajil,
bꞌay chꞌelti noꞌ bꞌalam yebꞌ noꞌ miꞌe bꞌalam yul bꞌeh,
yebꞌ bꞌay ay noꞌ howla labꞌa, yebꞌ noꞌ labꞌa chꞌekꞌ satkanh,
chꞌekꞌto ebꞌnaj Israel,
chiyinito ismelyu yebꞌ isqꞌalomal yibꞌanh noꞌ burro
yebꞌ yibꞌanh noꞌ camello chito bꞌey Egipto,
konhobꞌ matzet chiyiqꞌ ebꞌnaj yinh.
7 Yinh kaw yeli, haꞌ kolwal chiyaqꞌ Egipto nabꞌanhe yebꞌ xin matzet chaliloj.
Yu huneꞌ tuꞌ yuxin chiwaqꞌan yijaꞌ hakaꞌ tiꞌ:
“No noqꞌ ay ismay yel yaw, yajaꞌ mach chikꞌuxwapaxoj,” kinchihan yinh,» xhi Komam.
8 Yalni Komam Jahawil wetan: «Wal tinanh asiꞌ,
kat hatzꞌibꞌnhen tzet chawil tiꞌ yinh nichꞌan aqꞌinteꞌ sata hunteqꞌan anma tiꞌ,
chatzꞌibꞌnhenpaxayo yul hum yunhe iskankano istzotiꞌal tet anma yinh islahobꞌal tzꞌayik yinh hunteqꞌan tiempo chitohuli.
9 Yuto haꞌ huneꞌ niman konhobꞌ tiꞌ kaw manhkꞌom yu soman ye yul iswiꞌ,
kaw leqꞌtiꞌ, yebꞌ xin mach isje yabꞌeꞌ chejbꞌanile chiwalan, hanin Yahawilintiꞌan.
10 Chiyalni tet ebꞌnaj inchejabꞌan:
“Machojabꞌ tzet chiyaqꞌ Komam heyilaꞌ,” xhi.
Chalnipaxoj: “Machojabꞌ cheyal jetanh isyelal chal Komam teyet;
wal xin haꞌ tzotiꞌ kꞌulchꞌan yoki, haꞌ leqꞌtiꞌal haꞌ cheyala.
11 Elanhwe yul kobꞌehanh, hekꞌwelo hebꞌa, mach cheyaqꞌ bꞌina Komam Dios,
Komam machi istxꞌojal, isDiosal Israel,” xhi ebꞌnaj,» xhi Komam.
12 Yuxin haꞌ Komam Dios, Komam machi istxꞌojal,
isDiosal Israel, chihalni hakaꞌ tiꞌ: «Yu xaheyintanhekanilto intzotiꞌan,
haxa istxꞌojal xin bꞌay chekol hebꞌa,
yebꞌ xin ismachiswalilal cheyako yipo hekꞌul.
13 Yuxin haꞌ hemul tiꞌ, lahan hakaꞌ hunu hatil chilowto yinh hunu kꞌubꞌ nahat yekanh istel,
tona nahul ay hex xin, kat yaykꞌay yinh anhe.
14 Lahan chextanhilo hakaꞌ ispohto hunu txꞌotxꞌ vaso chistzꞌaj naj tzꞌajom munlabꞌal,
haꞌ mak chipohnitoj, machi tzꞌay iskꞌul ispohnitoj,
hayet xapohto tuꞌ, matxa tzet chiꞌoknikoj,
nitam yalaxayto tzaqꞌaqꞌ yul kat yilaxto yul nha,
nitam yokniko letxbꞌalil yul kꞌuh,» xhi Komam.
15 Yuto hak tiꞌ yute yalni Komam Dios Jahawil,
Komam machi istxꞌojal, isDiosal Israel:
«Meltzanhweko yul inqꞌabꞌan, kat heyehikꞌo yinh aqꞌankꞌulal,
hak tuꞌ chu hekolchahi, ehanhwe yinh aqꞌankꞌulal kat kinheyanikojan yipo hekꞌul,
haxinwal cheyiqꞌ heyip,» xhi Komam, yajaꞌ mach heyabꞌe.
16 Wal xin heyala: «Machoj, chonhahtojanh yibꞌanh cheh, kat jelkanhanh,» kexchi.
Yeltoni chexelkanh hakaꞌ heyalni tiꞌ. Heyalnipaxoj:
«Chonhahtojanh yibꞌanh cheh kaw helan isbꞌelwi yinh anhe,» kexchi.
Yeli, haꞌ ebꞌnaj chꞌaqꞌni howal yebꞌ hex,
kaw helan ebꞌnaj yaqꞌni anhe teyintaj, kexistzumbꞌeni.
17 Mil hebꞌisil hex chexelkanh tet huneꞌnhechꞌan naj winaj xol ebꞌnaj ayko ishowal teyinh,
haxa tet howanh ebꞌnaj xin chexelkanh hesunil yu xiwkilal,
haywanhxanhe hex chexkani,
hakaꞌ iskan linhno hunu te teꞌ iswiꞌ witz,
maka hakaꞌ bandera iswiꞌ wonhan.
Chihaltelax iskꞌulchꞌanil iskꞌul Komam Dios tet Israel
18 Yajaꞌ echmabꞌil yu Komam Jahawil bꞌay chisyelo iskꞌulchꞌanil iskꞌul, kat istzꞌay iskꞌul teyinh, yuxin chiꞌilaxkanh, kat yalaxiko ismay; yuto haꞌ Komam Jahawil, Dios kaw toholkanoj. Kaw saqꞌal yet sunil mak chikawxi iskꞌul yinh Komam.
19 Yinh kaw yeli, hex konhobꞌ Sión, hex ay bꞌey Jerusalén, kaw kꞌul iskꞌul huneꞌ mak chitzꞌay iskꞌul teyinh, hayet chiyabꞌen hebꞌiskꞌulal, kat ispajtzen tzet cheqꞌana. 20 Waxanhka chexekꞌ yinh isyaꞌtajil yu Komam Jahawil, hakaꞌto chewah kat heyukꞌni isyaꞌtajil, yajaꞌ wal ebꞌnaj kexkuyni matxa ewano ye ebꞌnaj teyet, wal tinanh xin haꞌ kaw isbꞌaqꞌ hesat chiꞌilni yinh ebꞌnaj. 21 Cheyabꞌen yal-lax teyet hakaꞌ tiꞌ: «Haꞌ huneꞌ tiꞌ bꞌeh bꞌay chextohi, mach xin chehekꞌ hebꞌa yinh hewatxꞌqꞌabꞌ, mach chehekꞌ hebꞌa yinh hemekqꞌabꞌ,» xhi. 22 Hak tuꞌ chu heyetanto hunteqꞌan hetioxh cheyal hediosaloj, ayiko chꞌen plata yebꞌ chꞌen oro yinh, cheqꞌojnito hakaꞌ hunu qꞌap qꞌap tzꞌil, yahbꞌeta jilni, cheyalni tet: «Elanhweto bꞌey tiꞌ,» kexchi.
23 Hak tuꞌ chu yanayo Komam Dios Jahawil haꞌ nhabꞌ yibꞌanh heyinhat chetzꞌunu, chiyaqꞌni txꞌotxꞌ tzet cheloh yinh kaw niman yebꞌ kaw kꞌul chu. Haꞌ henoqꞌ yinh huneꞌ tiempohal tuꞌ kaw ay tzet chislo noꞌ yebꞌ kaw haman bꞌay chꞌekꞌ noꞌ lowoj. 24 Haꞌ hewakax yebꞌ heburro chimunla yinh tꞌoko, haꞌ ixim trigo machi isqꞌalemal chiskꞌux noꞌ, ixim watxꞌebꞌil yu pala yebꞌ criba. 25 Haꞌ yinh iswiꞌla sunil witz nahat yekanh yebꞌ yibꞌanh iswiꞌla wonhan chꞌel yojomal haꞌ nime haꞌ, kat yaykꞌay iscuartel ebꞌnaj ayko ishowal teyinh, kat yul istzꞌayikal bꞌay chꞌok nime kamikal xol ebꞌnaj.a 26 Hayet tuꞌ, haꞌ yoj ixahaw lahanxa yip hakaꞌ yoj tzꞌayik, haxa yoj tzꞌayik hujel ekꞌbꞌal yip istzejlahi, lahan hakaꞌto hujebꞌto tzꞌayik yip huneꞌ tzꞌayik tuꞌ. Hayet huneꞌ tzꞌayik tuꞌ chanhte Komam Jahawil iskonhobꞌ, haꞌ lahwilal yako Komam yinh iskonhobꞌ tuꞌ, chanhte Komam, kat yaniko Komam ispichil.
Isyaꞌtajil chati Komam Jahawil yibꞌanh Asiria
27 ¡Ilwekꞌanabꞌi, nahat lanhan istit isbꞌi Komam Jahawil!
Chiꞌah xaj qꞌa yinh sat yu ishowal, haꞌ xaj qꞌa tuꞌ chinhuswahi,
kaw how yok istiꞌ yu ishowal, haxa yaqꞌ lahan hakaꞌ xaj qꞌa qꞌaꞌ chinhuswahi.
28 Haxa xobꞌ istiꞌ Komam, lahan hakaꞌ haꞌ nime haꞌ chichꞌibꞌkanh
masanta chiꞌahapno yinh isnuqꞌ ebꞌnaj bꞌay ayko ishowal,
chiyanayo isyaꞌtajil yibꞌanh nime konhobꞌ hakaꞌ istixhlaxkanh ixim trigo yu yel isqꞌalemal,
chitxayelax yu Komam, chiyaniko Komam yet istiꞌ konhobꞌla tuꞌ,
chiyinito bꞌay chikꞌaytzelaxiloj.
29 Wal hex hex tiꞌ xin chexbꞌitni hakaꞌ yet chꞌekꞌtzelax isqꞌinal pascua yinh aqꞌbꞌalil,
chextzalahi hakaꞌ chu istzala mak chiꞌoqꞌtzen teꞌ suꞌ
yet chito bꞌey wonhan bꞌay ayahto Yatut Komam Jahawil,
Komam kaw aykano yip chikolni Israel.
30 Chiyaqꞌ Komam Jahawil abꞌelaxo yul isnuqꞌ,
kat yil-lax yip isqꞌabꞌ yu ishowal, chiyaniti qꞌa qꞌaꞌ chinhuswahi,
chimaqꞌwa yu kꞌuh, kat yaniti kajtuxkum, yebꞌ nimeta sajbꞌat hakaꞌ chꞌen chꞌen.
31 Haxa Asiria chiꞌay isyaꞌtajil yibꞌanh yet chiyabꞌen yul isnuqꞌ Komam Jahawil,
kat ismaqꞌlax yu isqꞌojoch Komam.
32 Hunta el chismaqꞌ Komam ebꞌnaj yu isqꞌojoch chiwatxꞌen istoholal,
kat yok pandereta yebꞌ arpa yet chanayo Komam isyaꞌtajil yibꞌanh ebꞌnaj ayko ishowal yinh Komam.
33 Yuto Tofet, watxꞌebꞌilxa yettax payat,
yebꞌ kaw kꞌulxa yeh bꞌay chinhuslaxto isnimanil naj rey Asiria.
Haꞌ huneꞌ bꞌay ay isyaꞌtajil tuꞌ kaw nahat yehayto yich yebꞌ kaw nimajal yeko sat,
bꞌay kaw ay teꞌ siꞌ ayko qꞌaꞌ yinh.
Haꞌ xobꞌ istiꞌ Komam chiꞌaniko yip qꞌa qꞌaꞌ yinh,
hakaꞌto chayto Komam nimeta yojomal azufre xol qꞌaꞌ.b