Konhobꞌ Ariel yebꞌ xin mak ayko ishowal yinh
29
¡Kꞌanchꞌan konhobꞌ Ariel,a kꞌanchꞌan Ariel,huneꞌ konhobꞌ bꞌay ekꞌlena yaꞌ David!
Ekꞌojabꞌto hayebꞌoxa tiempo yibꞌanh chislahni yekꞌtzen isqꞌinh chiyekꞌtze.b
2 Yajaꞌ haninan chiwayojan isyaꞌtajil yibꞌanh konhobꞌ Ariel tiꞌ,
kat iskankano yinh bꞌiskꞌulal, machi mak xin chiꞌaqꞌni yaqꞌlobꞌal iskꞌul.
Haꞌ konhobꞌ tiꞌ, lahan chꞌelkaniko hakaꞌ tzaqꞌaqꞌ
ayahto yibꞌanh ismexhahil yet xahanbꞌal.
3 Hach konhobꞌ Ariel, chachinhoyayojan;
chiwanikanhan campamento yinhla hahoyanil,
chinwatxꞌenkanhan bꞌay chiꞌokto ebꞌnaj chꞌaniko howal tawinh.
4 Chach ilaxayoj, kat hawaykꞌaykano sat txꞌotxꞌ,
kat hatzotelkanh xol pojoj;
haꞌ bꞌey tuꞌ chiꞌelti yul hanuqꞌ hakaꞌ yul isnuqꞌ ispixan kamom
chachsahsoni yet chachtzotel xol pojoj.
5 Haxa ebꞌnaj ayko ishowal tawinh, ebꞌnaj kaw aykanokanh isbꞌisil,
lahan chiꞌelkaniko ebꞌnaj hakaꞌ pojoj kaw kokꞌ;
haxa ebꞌnaj winaj kaw aykanokanh yip
xin lahan chiꞌelkaniko ebꞌnaj hakaꞌ matzꞌik chiꞌilaxto yu jaqꞌeqꞌ.
Chinhe tit lemna isyaꞌtajil yibꞌanh ebꞌnaj,
6 yu Komam Yahawil yinh sunil, kꞌuh chimaqꞌwahi,
chaniti nime txixkabꞌ, chaniti nime kajtuxkum yebꞌ nimeta yaxnhabꞌ,
chaniti xaj qꞌaꞌ chinhusnito anma.
7 Lahan chiyute isbꞌa hunteqꞌan konhobꞌ tuꞌ
hakaꞌ hunu mak ay tzet chiswayke yet aqꞌbꞌalil.
Sunil nimeta konhobꞌ, matxa isbꞌi hanta isbꞌisil,
chaqꞌni howal yinh konhobꞌ Ariel, chꞌok hoyno yinh,
kat yuchkꞌalaxayo iskꞌubꞌal konhobꞌ tuꞌ.
8 Yebꞌ xin lahan chiyu hakaꞌ ebꞌnaj chinhochahi,
kat iswayikli tato lanhan iswaꞌi, yajaꞌ haxa yet chiꞌel iswayanh,
chꞌel yaw yul iskꞌul yu nhohchahilal.
Maka hakaꞌ hunu naj chitaj istiꞌ, kat iswayikli tato lanhan yukꞌni haꞌ,
yajaꞌ haxa yet chꞌel iswayanh kaw sikina aya,
yebꞌ kaw chitaj istiꞌ.
Hak tuꞌ chu nimeta konhobꞌ kaw matxa isbꞌi hanta isbꞌisil,
chꞌaniko howal yinh wonhan Sión.
Israel chal isbꞌa kꞌulal yebꞌ hakaꞌta mach chu yilni
9 ¡Lahweko heyekꞌ yinh manhnabꞌalehal, lahweko heyekꞌ yinh kꞌaykꞌulal,
lahweko heyekꞌ yinh hakaꞌto mach chu heyilni, chimoyon cheyila!
¡Hex tiꞌ hakaꞌ ukꞌum yelo yul hewiꞌ yajaꞌ maxhtaj yu vino,
chexekꞌ tektoni, maxhtaj yu teꞌ howla vino!
10 Yuto Komam Jahawil aniti huneꞌ hakaꞌ wayanh teyibꞌanh, ismajchen Komam isbꞌaqꞌ sat ebꞌnaj ischejabꞌ ay texol,
yaniko Komam yenhel isnabꞌal ebꞌnaj ischejabꞌ
hakaꞌ yalaxahto huneꞌ yenhel iswiꞌ hunu maka.
11 Yuto haꞌ sunil tzotiꞌ yalkano ebꞌnaj ischejabꞌ Komam Dios, lahan hakaꞌ tzet tzꞌibꞌnhebꞌil yul hum kaw chulbꞌilayoj
yebꞌ xin kaw kꞌul yekaniko issellohal, hak tuꞌ ye yul hesat hex tiꞌ.
Tato chiꞌaqꞌlax tet hunu mak chiyil hum,
kat yal-lax tet hakaꞌ tiꞌ: «Il huneꞌ hum tiꞌ,» ta xhi tet, kat istaqꞌwi:
«Mach chisje wilnihan, yuto ayko issellohal,» xhimi.
12 Taka xin chiꞌaqꞌlax huneꞌ hum tuꞌ tet mak mach chil hum, kat yal-lax tet hakaꞌ tiꞌ:
«Il huneꞌ hum tiꞌ,» ta xhi tet, katmi istaqꞌwi hakaꞌ tiꞌ:
«Mach chiwilan tzꞌibꞌ,» xhimi.
13 Yuxin chiyal Komam Dios Jahawil hakaꞌ tiꞌ:
«Haꞌ huneꞌ konhobꞌ tiꞌ chihitziko inkꞌatanhan yu istiꞌ, chalni kꞌul-la tzotiꞌ winhan yu xaj istiꞌ,
yajaꞌ wal yanma nahat yelo winhan, tonhe chala tato chixiw wetan.
Haxa chejbꞌanile chalni tato ay welapnojan, hakaꞌnhe hunu komon chejbꞌanile ye yul sat.
14 Yu huneꞌ tuꞌ, yuxin chiwaqꞌ takojan iskꞌul huneꞌ konhobꞌ tiꞌ hunelxa,
chiwanitojan nimeta kꞌaybꞌalkꞌule yebꞌ xiwkꞌulal yilaꞌ;
yuto haꞌ ebꞌnaj winaj kaw helan ay bꞌey tuꞌ chitanhilo ishelanil ebꞌnaj,
kat istanhkanilo isnabꞌal ebꞌnaj winaj kaw ay yitzꞌatil iswiꞌ xol konhobꞌ tuꞌ,» xhi Komam.
15 ¡Kꞌanchꞌan ebꞌnaj chiyebꞌa isbꞌa sata Komam Jahawil! Chiyebꞌanto tzetaj chisnah,
chiswatxꞌen tzettaj ye tuꞌ xol qꞌejholo, chalni hakaꞌ tiꞌ: «¿Maktaxka chonhilni?
¿maktaxka chiꞌohtanhenilo tzet chikowatxꞌe?» xhi.
16 Hex tiꞌ, haꞌ ismachiswalil cheyu. Haꞌ txꞌotxꞌ qꞌantxꞌotxꞌ,
mach lahano txꞌotxꞌ yebꞌ mak chitzꞌajni hunu munlabꞌal yinh txꞌotxꞌ.
¿Tom chiyal txꞌotxꞌ munlabꞌal tuꞌ tet naj chitzꞌajni?:
«Mach tajach watxꞌenhe hinan,» tom xhi txꞌotxꞌ. ¿Tom chiyalpaxo txꞌotxꞌ xhalu tet mak tzꞌajni?:
«Mach hawohtajo tzet chawatxꞌe,» tom xhi txꞌotxꞌ.
Chikol-laxilo Israel
17 Haꞌ txꞌotxꞌ Líbano, hanikꞌxanhe tiempo
kat yutenko isbꞌa txꞌotxꞌ kꞌulal bꞌay chiꞌel sat tzꞌunubꞌ,
kat yokpaxo txꞌotxꞌ qꞌebꞌtajil.
18 Haꞌ yinh huneꞌ tiempohal tuꞌ, haꞌ mak mach chabꞌe,
chihajcha istxikin, chiyabꞌen yawtelax tzotiꞌ ayayo yul hum,
haxa mak mach chu yilni, chihajlo sat kat ismujli xol qꞌejholo.
19 Haꞌ mak chewchotanhe, chitzalaho yinh Komam Jahawil,
haxa mak kaw mebꞌaꞌkanoj ay xol anma chitzala yanma yinh Komam Dios,
Komam machi istxꞌojal, isDiosal Israel.
20 Yuto haꞌ mak istzannhetikꞌa yinh howal chitanhiloj, kat istanhpaxilo anma bꞌuchwawom;
kat istanhtzelaxilo sunil ebꞌnaj machi way yet aqꞌbꞌalil yu iswatxꞌen istxꞌojal.
21 Ebꞌnaj chꞌaqꞌni aykꞌayo ebꞌnaj winaj yinh mule yu tzotiꞌ chiyala,
ebꞌnaj chꞌaqꞌni aykꞌayo ebꞌnaj juez chiꞌilni tzet chiꞌeliko anma istiꞌ ispultahil konhobꞌ,c
chiyetanto istoholal chiswatxꞌe anma tohol isbꞌeybꞌal, yu leqꞌtiꞌal.
22 Yuxin haꞌ Komam Jahawil, Komam kolnilo yaꞌ Abraham, chihalni tet yuninal yaꞌ Jacob hakaꞌ tiꞌ: «Haꞌ tinanh, matxa chiꞌok yuninal yaꞌ Jacob yinh txꞌixwilal, matxa chisajpaqꞌilo sat yu txꞌixwilal.
23 Yuto hayet xapohchakanh yuninal yaꞌ Jacob chiyilni iskꞌulal chinwatxꞌehan yinh iskonhobꞌ,
chiyohtanheniloj tato kaw aykano yelapno inbꞌihan;
chiyaniko ebꞌnaj inmayan, hanin machi intxꞌojalan, isDiosal yaꞌ Jacob;
kat isxiw ebꞌnaj wetan, hanin isDiosal Israel.
24 Haꞌ mak somchanakanh isnabꞌal chiyohtanhelo ebꞌnaj helanile,
haxa mak bꞌuchwawom, chiyohtanhelo tzet chalilo kuybꞌanile,» xhi Komam.