Isyaꞌtajil alaxayo yibꞌanh Efraín
28
¡Kꞌanchꞌan niman konhobꞌ Efraín, kaw saqꞌal jilni hakaꞌ corona,kaw aykanh chute isbꞌa, kaw ukꞌum vino.
Haꞌ Efraín tuꞌ ayayo yibꞌanh akꞌal bꞌay kaw kꞌul sat txꞌotxꞌ,
yajaꞌ xatajilo iskꞌulchꞌanil tuꞌ; haꞌ ebꞌnaj ukꞌum vino tuꞌ,
kaw chisomchakanh isnabꞌal ebꞌnaj yu xapalkꞌon yukꞌni vino!a
2 Haꞌ Komam Jahawil xaꞌissikꞌilo huneꞌ naj winaj kaw aykano yip,
yebꞌ kaw helan yinh howal.
Haꞌ naj tuꞌ lahan hakaꞌ isyaꞌil chilow nimeta sajbꞌat,
yebꞌ hakaꞌ kajtuxkum chiyetato sunil tzetaj ye tuꞌ,
yebꞌ hakaꞌ haꞌ nime haꞌ chimalilo yul isbꞌeh,
chimaqꞌotayo sunil tzet ye tuꞌ sat txꞌotxꞌ yu yip.b
3 Haꞌ niman konhobꞌ Efraín kaw saqꞌal jilni hakaꞌ corona,
kaw aykanh chute isbꞌa yebꞌ kaw ukꞌum vino,
chixanhobꞌtanhelax yu naj kaw aykano yip tuꞌ.
4 Haꞌ huneꞌ corona kaw saqꞌal jilni ayko yelawilo huneꞌ akꞌal kaw yax sat tuꞌ,
xatajiloj, lahan hakaꞌ hunu bꞌabꞌel sat lobꞌehal chiꞌeliloj;
haꞌ mak bꞌabꞌel chiꞌilni, chisbꞌixiloj, kat islohnayto yinh anhe.
5 Haꞌ yinh huneꞌ tzꞌayik tuꞌ, haꞌ Komam Yahawil yinh sunil corona chitzejla issaqꞌalil,
yebꞌ diadema kaw kꞌulchꞌan,
hak tuꞌ chuko Komam yinh haywanhxa anma Israel chitokankano yul iskonhobꞌ.c
6 Haꞌ Komam Jahawil chiꞌaqꞌni ishelanil ebꞌnaj juez iswatxꞌen istoholal
yet chiꞌay tzꞌonhno yul yehobꞌal,
chaqꞌnipaxo Komam yip ebꞌnaj chimajni yapni ebꞌnaj txꞌoj yul ispultahil konhobꞌ.
7 Yajaꞌ xin ay hunteqꞌan ebꞌnaj iswatxꞌe istxꞌojal yu vino,
yetaxto yul iswiꞌ yu yukꞌni howla vino,
ebꞌnaj sacerdote yebꞌ ebꞌnaj ischejabꞌ Komam Dios,
iswatxꞌe ebꞌnaj istxꞌojal yu teꞌ vino, yetaxto yul iswiꞌ ebꞌnaj.
Chiꞌekꞌ tekton ebꞌnaj yu vino, haꞌ tzet isyeko isbꞌa yinh sat ebꞌnaj mach yeloj.
Haꞌ tzet chal ebꞌnaj ischejabꞌ Komam Dios matxa yelo elikoj.d
8 Yuto haꞌ sunil ismexha ebꞌnaj nohna yu isxaw ebꞌnaj yebꞌ yu istzꞌilal,
machi hunu bꞌay tiꞌ sajninoj.
9 Chal anma wuhan, chalni hakaꞌ tiꞌ: «¿Mak chiꞌochen huneꞌ winaj chikuywa tiꞌ?
¿Mak chikuylax yinh kuybꞌanile? ¿Ham nixhte unin xaꞌilaxilo yinh im?
mato ¿haꞌ nixhte unin tolto ilaxilo yinh yim ismiꞌ chiꞌocheni ta chikuylaxi?
10 ¿Tzet yuxin nixhtechꞌan iskuywa naj?
Huneꞌnhe haꞌ kuybꞌanile chiyal naj.
Huneꞌnhetikꞌa bꞌeybꞌale chiyal naj.
Huneꞌnhetikꞌapaxo haꞌ chejbꞌanile chiyal naj,
kat yal-laxpaxo hunxa chejbꞌanile.
Chiꞌaqꞌlax nichꞌano bꞌey tiꞌ, kat yaqꞌlaxpaxo nichꞌanoxa bꞌey tuꞌ,» xhi.
11 Yuto haꞌ yinh tzotiꞌ mach habꞌanoj
yebꞌ yinh nan abꞌxubꞌal chitzotel Komam tet huneꞌ konhobꞌ tiꞌ.e
12 Haꞌ ton yinh huneꞌ konhobꞌ tiꞌ yal Komam Dios hakaꞌ tiꞌ:
«Haꞌ huneꞌ tiꞌ yet xewilal yehi, yuxin aqꞌ xewilal tet mak kaw sikinaxa aya,
kat yaqꞌlo iskꞌul,» xhi Komam. Yajaꞌ mach ischah yabꞌeꞌ ebꞌnaj.f
13 Yuxin haꞌ istzotiꞌ Komam Jahawil,
hanhkꞌanhe chihal-laxi, chihal-lax chejbꞌanile yibꞌanh hunxa chejbꞌanile,
chihal-lax kuybꞌanile yibꞌanh hunxa kuybꞌanile, chihal-lax nichꞌano bꞌey tiꞌ,
kat yal-lax nichꞌanoxa bꞌey tuꞌ masanta chito ebꞌnaj, kat yelto pakꞌna ebꞌnaj yintaj,
chiꞌaqꞌlax ekꞌoyaꞌ yanma ebꞌnaj kat iskꞌal-laxayo ebꞌnaj kat yalaxiko ebꞌnaj preso.
Kachbꞌanile tet Jerusalén
14 Yuxin hex bꞌuchwawom, yahaw yinh konhobꞌ Jerusalén tiꞌ,
abꞌewe istzotiꞌ Komam Jahawil.
15 Yuto hex tiꞌ xaheyala: «Hanhonhtiꞌanh xakotꞌinhbꞌakanojanh kotratohanh tet naj kamikal yebꞌ tet kambꞌal,
yuxin hayet chihul nimeta isyaꞌtajil matxa chul jinhanh yuto haꞌ leqꞌtiꞌal
haꞌ chꞌok jenhelojanh kat jebꞌanto kobꞌahanh yalanh,» kexchi.
16 Yuxin haꞌ Komam Jahawil chihalni hakaꞌ tiꞌ:
«Hanintiꞌan wakanaytojan huneꞌ chꞌen chꞌen yichebꞌanilkanh xeꞌ nha bꞌey Sión,
haꞌ chꞌen tuꞌ ilwebꞌilxa chꞌen; haꞌ chꞌen chiꞌok istxikino nha
yebꞌ xin kaw aykano yelapno chꞌen,
machi hunu mak chu isbꞌilen chꞌen.
Haꞌ mak chiyayto yul yanma matxa chiyako yinh iskꞌul.g
17 Haꞌ yinh huneꞌ nha chiwatxꞌi tuꞌ,
chiwaqꞌbꞌalnhehan istoholal hakaꞌ yalaxiko plomo,
yebꞌ isyelal hakaꞌ yalaxiko nivel; yajaꞌ chiyetato sajbꞌat huneꞌ yenhel ebꞌnaj,
huneꞌ ayko yipo iskꞌul yu tzotiꞌ mach yelo,
kat yijnito haꞌ nime nhabꞌ bꞌay chiyebꞌa isbꞌa ebꞌnaj chihalni leqꞌtiꞌal,» xhi Komam.
18 Chitanhkano huneꞌ tzet tꞌinhbꞌabꞌilkano heyu yebꞌ kamikal,
matxa tzet chalpaxilo tzet hetꞌinhbꞌakano yebꞌ kambꞌal,
hayet chihul isyaꞌtajil kat hexanhobꞌtanhelax yu.
19 Hunta el chihul isyaꞌtajil tuꞌ chexyijtoj,
hunun sakꞌayal yul isyaꞌtajil teyinh, kat yulpaxo teyinh yet tzꞌayikal yebꞌ yet aqꞌbꞌalil,
yinh kaw yeli hayet cheyabꞌen isqꞌumal isyaꞌtajil tuꞌ, kat hexiwkanh.
20 Cheyu hakaꞌ mak chiway yibꞌanh hunu txꞌat txannhe istel,
haxa yet chebꞌini hebꞌa mach chuhi, cheyanikanh hetxow txannhe sat teyibꞌanh,
machi qꞌoji kexispichnayo.
21 Yuto chiꞌahwano Komam Jahawil teyinh hakaꞌ yu bꞌey witz Perazim,
kat istit ishowal teyinh hakaꞌ yu istit ishowal bꞌey akꞌal Gabaón,
chiꞌahwano teyinh yu iswatxꞌen ismunil,
yaj takbꞌalkꞌule yilot ismunil. Chiswatxꞌen tzet choche iskꞌul,
haꞌ ton tzet chiswatxꞌe kaw xiwkilal yil-laxi.
22 Haꞌ tinanh xin matxa chexbꞌuchwahi,
haxinwal mach chiꞌahkanh isyaꞌtajil teyibꞌanh,
yuto abꞌebꞌilxa wuhan tzet yal Komam Yahawil,
Komam chꞌanayo isyaꞌtajil yibꞌanh sunil anma ay sat txꞌo txꞌotxꞌ tiꞌ.
23 Kaw hajbꞌawe hetxikin heyabꞌen tzet chiwalan,
kaw kam cheyabꞌe tzotiꞌ chiwaltiꞌan.
24 Hayet chito hunu naj munlawom iswatxꞌe txꞌotxꞌ bꞌay chistzꞌun istzꞌunubꞌ
mach hanhkꞌanheho istꞌokni naj txꞌotxꞌ yu chꞌen arado,
maka ismunla naj yu rastrillo yinh sunilbꞌal tiempo.
25 Wal xin hayet chilahwi ismaqꞌnipoho naj txꞌotxꞌ,
kat istxihni teꞌ eneldo yebꞌ teꞌ comino.
Chistxinipaxayo naj ixim trigo yinh istxolal,
chistxinipaxo ixim cebada bꞌay watxꞌebꞌilxa txꞌotxꞌ yu naj,
kat istxihnipaxayo naj teꞌ avena istiꞌlaj bꞌay watxꞌebꞌilxa txꞌotxꞌ.
26 Yuto haꞌ Komam Dios chiyeni yinh tzet chu ismunla huneꞌ mak tuꞌ,
chiskuy Komam yinh istoholal.
27 Teꞌ eneldo, mach chixanhlaxikꞌo teꞌ,
nitam chiꞌekꞌpaxo yantahil carreta yibꞌanh teꞌ comino,
wal xin te teꞌ chimaqꞌnilti sat teꞌ eneldo tuꞌ yebꞌ xin kꞌax teꞌ chimaqꞌnilti sat teꞌ comino.
28 Ixim trigo chixanhlaxilti sat ixim,
yohta naj munlawom iswatxꞌenilo ixim,
machi qꞌaxpohto ixim yu isyantahil carreta,
machi qꞌaxpopaxto ixim yu yeh chꞌen iqꞌomilti sat trigo.
29 Haꞌ huneꞌ helanile tuꞌ, haꞌ Komam Jahawil kaw aykano yip chiꞌaqꞌni,
yu iskꞌay kokꞌul jilni tzet yohtaj, chaqꞌnipaxo hunteqꞌanxa yaqꞌbꞌil helanile.