Isaías 27

Yet chikol-laxilo Israel kat ismeltzohi

Hayet huneꞌ tzꞌayik tuꞌ, chiyiti Komam Jahawil yespada,

chiyanayo isyaꞌtajil yibꞌanh noꞌ Leviatán, noꞌ labꞌa yinh kaw anhe chꞌekꞌi,

noꞌ labꞌa potxꞌom anma; chismaqꞌnikamo Komam noꞌ dragón ay xol haꞌ mar.

Haꞌ yespada Komam chaqꞌbꞌalnhe tuꞌ kaw chililon ye chꞌen yinh kaw kꞌul,

kaw kꞌulkano chꞌen sikꞌlebꞌil, kaw ay ismay chꞌen.

2 Haꞌ yinh huneꞌ tzꞌayik tuꞌ chexbꞌitni xol teꞌ tzꞌunubꞌ uva bꞌay chꞌel teꞌ vino kaj jilni.

3 Haꞌ Komam Jahawil chihalni hakaꞌ tiꞌ:

«Hanin Yahawilintiꞌan chintanhehan teꞌ uva tzꞌunbꞌil,

naunhe chinhayenan,

chintanhehan aqꞌbꞌalil yebꞌ yet tzꞌayikal yunhe machi mak chiꞌetanto teꞌ.

4 Mach ayoko inhowalan yinh teꞌ tzꞌunubꞌ uva tuꞌ,

yajaꞌ tato ay teꞌ txꞌix maka teꞌ howla telaj

chiꞌahilo xol teꞌ chitit inhowalan yinh teꞌ txꞌix yebꞌ yinh teꞌ howla telaj tuꞌ,

kat inxanhobꞌtanhenan teꞌ, chinnhusnitojan teꞌ.^a

5 Tato ay hunu mak chiyoche chinkolwahan yinh,

kat yokkano aqꞌankꞌulal inxolan yebꞌi,

¡yilal isqꞌanni aqꞌankꞌulal wetan!» xhi Komam.

6 Chiꞌapni istzꞌayikal bꞌay chiyiqꞌkanh yip yuninal yaꞌ Jacob,

hakaꞌto chiyayto xeꞌ, kat iswolni, kat isxumakli Israel tiꞌ,

kat isnohilo sunil sat yibꞌanhqꞌinal tiꞌ yu issat.

7 Mach ay isyaꞌtajil yibꞌanh Israel

hakaꞌ yu yay isyaꞌtajil yibꞌanh ebꞌnaj ayko ishowal yinh.

Mach sunilopaxo Israel kami

hakaꞌ yu iskamilo sunil ebꞌnaj maqꞌnikamo ebꞌnaj Israel.

8 Hayet chiyanayo Komam isyaꞌtajil yibꞌanh Israel, mach chipalkꞌon yanayoj,

wal xin ay ismalil hanta isyaꞌtajil chiyayoj.

Hakaꞌ chiyu isxulaxto ismatzꞌikal ixim trigo

yu ishowal jaqꞌeqꞌ chitit yinh yetkꞌulal bꞌay chiꞌahilo tzꞌayik,

hak tuꞌ chiyu yilaxilo yul iskonhobꞌ.

9 Hak tuꞌ chu yaqꞌlax nimankꞌulal yinh istxꞌojal yuninal yaꞌ Jacob kat isholaxkanh ismul,

tato kokꞌ chuteyo chꞌen chꞌen ayko yinh ismexha yet xahanbꞌal tet tioxh,

hakaꞌ chiꞌutelax chꞌen chꞌen chꞌok txohal,

yebꞌ ta matxa chihitzlaxkanh yechel tioxh Asera

yebꞌ yechel tzꞌayik, istioxhal ebꞌnaj.

10 Yuto haꞌ konhobꞌ kaw kꞌul yeko iskꞌubꞌal tiꞌ tzꞌinan chukanoj,

haꞌ konhobꞌ bꞌay ay anma tiꞌ,

chibꞌejlaxkanoj, chiꞌeliko txꞌotxꞌ hakaꞌ txꞌotxꞌ desierto.

Haꞌ tuꞌ chiꞌok noꞌ wakax lowoj, kat isxew noꞌ bꞌey tuꞌ,

kat islohnilo noꞌ xaj teꞌ uva.

11 Hayet chitajilo isqꞌabꞌ teꞌ uva tuꞌ kat iswoqꞌlaxilo isqꞌabꞌ teꞌ,

kat yul ebꞌix ix iskutxbꞌanokanh teꞌ,

kat yaniko ebꞌix isqꞌaꞌ yinh teꞌ. Hak tuꞌ xin haꞌ hunteqꞌan tiꞌ mach isnabꞌal,

yuxin matxa chitzꞌay iskꞌul Komam yinh,

matxa chisyepaxo iskꞌulal iskꞌul Komam tet,

Komam watxꞌenhe anma tuꞌ.

12 Haꞌ yinh huneꞌ tzꞌayik tuꞌ chisxanhobꞌtanhe Komam Jahawil konhobꞌla

chiꞌichiti bꞌey haꞌ Éufrates masanta bꞌey ha haꞌ ay bꞌey Egipto;

chisxanhobꞌtanhe Komam hakaꞌ isxanhlaxilti sat ixim trigo.

Haxa hex Israel hex tiꞌ xin hununtajil chu hekutxbꞌaniko hebꞌa.

13 Hayet huneꞌ tzꞌayik tuꞌ chiꞌoqꞌtzelax huneꞌ niman trompeta,

kat iskutxiko sunil anma Israel pujanto bꞌey txꞌotxꞌ Asiria

yebꞌ anma Israel ilaxto bꞌey Egipto.

Chikutxikoj chiyaniko ismay Komam Jahawil bꞌey wonhan yet Komam yehi bꞌey Jerusalén.