Bꞌit chiꞌaqꞌni iskawxobꞌal iskꞌul anma ta haꞌ Komam Jahaw chitanheni
26
Haꞌ yinh huneꞌ tzꞌayik tuꞌ, sat txꞌotxꞌ Judá chibꞌitnhelaxo huneꞌ bꞌit tiꞌ:«Haꞌ kokonhobꞌ tiꞌ kaw aykano yip, haꞌ Komam Jahawil chikolni,
yuto hakaꞌ chꞌen kꞌubꞌ kabꞌebꞌ yekanh, hak tuꞌ ye Komam.
2 Hajwe ispultahil konhobꞌ tiꞌ,
kat yokti anma tohol, yebꞌ anma chikꞌubꞌan isyelal.
3 Mam Jahawil, hach chakꞌubꞌa sikꞌlebꞌil yinh aqꞌankꞌulal mak aynhetikꞌako isnabꞌal tawinh;
yuto tawinh chikawxi iskꞌul.
4 Kawxojabꞌ hekꞌul yinh Komam Jahawil yinh sunilbꞌal ej tiempo,
yuto haꞌ Komam Jahawil chexkolni yinh sunilbꞌal ej tzꞌayik.
5 Yuto yaqꞌ aykꞌayo Komam makta aykanh chute isbꞌa, yinayo konhobꞌ yikanh isbꞌa,
yuchkꞌankanayo sat txꞌotxꞌ, yekꞌ wejna xol pojoj.
6 Chixanhobꞌtanhelaxikꞌo yu anma xayaqꞌle isyaꞌtajil,
yebꞌpaxo yu anma mebꞌaꞌ,» xhi huneꞌ bꞌit tiꞌ.
7 Haꞌ isbꞌeh anma tohol isnabꞌal toholtoni.
Mamin, hach tiꞌ tohol hach, hach chamale tzettaj chiswatxꞌe anma tohol.
8 Mam Wahawil, echmabꞌil hach juhanh yu istoholal chawatxꞌe,
hachnhechꞌan chachjochehanh, chachekꞌ yinh konabꞌalanh.
9 Yinh sunil wanmahan chachwochehan,
chiꞌekꞌ innabꞌalan tawinh yet aqꞌbꞌalil,
yulbꞌal istiempohal yet itzitz hinan, chaxhinsayikꞌojan hunun sahabꞌ sakꞌayal.
Yuto hayet chawanayo isyaꞌtajil yibꞌanh txꞌo txꞌotxꞌ tiꞌ,
chaqꞌ yul iswiꞌ anma, ay istoholal chal kuybꞌanile aykano hawu.
10 Chiyelaxilo iskꞌulal hakꞌul tet anma txꞌoj, yajaꞌ maxhtikꞌa chikuycha yinh tzet yelapno ye istoholal.
Haꞌ sat txꞌo txꞌotxꞌ bꞌay ay anma chiwatxꞌen istoholal,
haꞌ istxꞌojal chiswatxꞌe anma txꞌoj.
Haꞌ hunteqꞌan anma tuꞌ machi txumchalo yu yinh tzet yelapno ye hawip, Mam Wahawil.
11 Mam Wahawil, haqꞌabꞌ aykanh yu yanayo isyaꞌtajil,
yajaꞌ machi txumcha yu ebꞌnaj.
Haꞌ yinh islahobꞌal tzꞌayik chitxꞌixwokanh anma chichiwako iskꞌul yinh hakonhobꞌ;
kat isnhuslaxto ebꞌnaj ayko ishowal tawinh xol qꞌa qꞌaꞌ.
12 Mam Wahawil, hach tiꞌ chawaqꞌ aqꞌankꞌulal jetanh,
yuto hawu yuxin chiyij isbꞌa sunil tzet chikowatxꞌehanh.
13 Mam Wahawil, koDiosalanh,
ay hunteqꞌan ebꞌnaj rey tiꞌ yako isbꞌa jahawilojanh,
yajaꞌ hachnhechꞌan chachjalanh Jahawilojanh, chikonatijanh habꞌi.
14 Ebꞌnaj tuꞌ kamomxa ebꞌnaj, matxa chulkanh iskꞌul ebꞌnaj, tanhnaxalo ebꞌnaj;
matxa chiꞌitzitzbꞌikanh ebꞌnaj, yuto ayxayo isyaꞌtajil yibꞌanh ebꞌnaj hawu,
xatanhkanilo ebꞌnaj, chꞌekꞌkanto yet yalbꞌanil ebꞌnaj.
15 Hach hawaqꞌ chꞌibꞌo hakonhobꞌ tiꞌ, Mam Wahawil,
hach hawaqꞌ chꞌibꞌoj yu yalaxiko hamay,
hahitzni sunil ismohonal txꞌotxꞌ konhobꞌ tiꞌ, yu ischꞌibꞌilo txꞌotxꞌ.
16 Mam Wahawil, hayet yay isyaꞌtajil yibꞌanh hakonhobꞌ tiꞌ,
kach issayni, istxahli tawet yet hawanayo isyaꞌtajil yibꞌanh.
17 Hakaꞌ hunu ix ix chꞌoqꞌi, kat yel yaw yu isyaꞌil yet lanhanxa iswatxꞌi iskꞌul,
hak tuꞌ jaqꞌlehanh tasataj, Mam Wahawil.
18 Hakaꞌto pitzkꞌati hunu nichꞌan unin jinhanh, jabꞌenanh isyaꞌil ispitzkꞌahi,
yajaꞌ jaqꞌeqꞌnhe chichꞌibꞌkanh yul kokꞌulanh.
Machi kolbꞌanile jaqꞌanh tet anma sat txꞌo txꞌotxꞌ tiꞌ,
¿tom aytikꞌa isbꞌisil anma pitzkꞌa juhanh? Matzet.
19 Yajaꞌ ebꞌnaj hakamom chihulkanh iskꞌul ebꞌnaj, chiꞌitzitzbꞌikanh isnimanil.
¡Chiꞌel iswayanh, kat isbꞌitni makta ay xol pojoj!
Hakaꞌ chiyu yahilo tzꞌunubꞌ yu yal chew chiꞌay yet aqꞌbꞌalil,
hak tuꞌ chu yitzitznhenkanh txꞌotxꞌ iskamom.
20 Hex inkonhobꞌan asiꞌwej,
okanhweto yul heyatut chepebꞌanilti hepulta teyintaj,
ebꞌaweto hebꞌa hunepoj masanto chilahwi yekꞌto ishowal Komam Jahawil.
21 Yuto chiꞌelti Komam Jahawil yul yehobꞌal bꞌay aya,
kat yanayo isyaꞌtajil yibꞌanh anma ay sat txꞌotxꞌ yu istxꞌojal chiswatxꞌe yinh Komam.
Haꞌ txꞌo txꞌotxꞌ chiyalilo txꞌotxꞌ makta malnato ischikꞌil sat txꞌotxꞌ,
matxa xin chiyebꞌa txꞌotxꞌ makta kamna sat txꞌotxꞌ.a