Bꞌit chiꞌaniko ismay Komam Jahawil yu iskꞌulal
25
Mam Jahawil, hach tiꞌ hach inDiosalan, chiwakojan hamay,chinbꞌitnhenan habꞌi yuto xahawatxꞌe nimeta kꞌaybꞌalkꞌule;
haꞌ kuybꞌanile hawalkano yettax payat
kaw yel chala yebꞌ xin aynhetikꞌa yinh sunilbꞌal ej tiempo.
2 Yuto hameltzoko hunteqꞌan konhobꞌ yinh huneꞌ tenan txꞌo txꞌotxꞌ,
haxa hunteqꞌan konhobꞌ kaw ay yip ayko iskꞌubꞌal hawuchkꞌakantoj,
hawuchkꞌankanto nimeta yatut ebꞌnaj nan konhobꞌal yuxin matxa konhobꞌo chiꞌelkanikoj;
matxa bꞌaqꞌinhal xin chiwatxꞌelaxkanh.
3 Yu huneꞌ tuꞌ, yuxin haꞌ konhobꞌ kaw ay yelapnoj chiꞌaniko hamay,
kat isxiwkanh anma tawet, anma ay yul konhobꞌ kaw aykano yip.
4 Yuto hach kaxhok yipo iskꞌul anma mebꞌaꞌ,
haxa mak ay isyaꞌtajil yibꞌanh xin hach hakoliloj.
Hach kaxhok yenhelo anma yet yapni huneꞌ niman jaqꞌeqꞌ,
hach kaxhokpaxo yenhelo anma tet yoj tzꞌayik,
yuto haꞌ yip ebꞌnaj txꞌoj lahan hakaꞌ nime jaqꞌeqꞌ chismaqꞌiko isbꞌa yinh chꞌen kꞌubꞌ.
5 Hakaꞌ chu ispaxilo yip anma yu yip qꞌa qꞌaꞌ bꞌey txꞌotxꞌ tajin txꞌotxꞌ,
hak tuꞌ chu istanhilo yip ebꞌnaj nan konhobꞌal yu loloꞌal.
Hakaꞌ isxobꞌxon yalanh moyan, hak tuꞌ chu ispaxilo yip ebꞌnaj txꞌoj kat yok tuknoj.
6 Haꞌ Komam Yahawil kaw aykano yip,
chiwatxꞌen huneꞌ niman wah tet ej konhobꞌ bꞌey wonhan Sión, bꞌay ay itah kaw xuqꞌ,
yebꞌ vino kaw kꞌul payat qꞌuhinaxa.a
7 Haꞌ bꞌey wonhan tiꞌ chiyilo Komam qꞌap qꞌap ayko yenhelo sat sunil ej konhobꞌ,
kat yinilo qꞌap velo ayko ispichilo sat sunil nimeta konhobꞌ.
8 Chistanhtzekanilo Komam Jahawil naj kamikal yinh sunilbꞌal ej tiempo,
chissunilo Komam yal sat sunil mak chiꞌoqꞌi;
chiyinilo Komam isyaꞌtajil xol iskonhobꞌ ay sunil sat txꞌo txꞌotxꞌ tiꞌ,
yuto haꞌ Komam Jahawil halnikanoj.b
9 Haꞌ yinh huneꞌ tzꞌayik tuꞌ chijal hakaꞌ tiꞌ «Haꞌ Komam Jahawil tiꞌ,
haꞌ koDiosal echmabꞌil ju, yuto haꞌ chonhkolni;
haꞌ ton Komam Jahawil tiꞌ ayko yipo kokꞌul.
Chijaqꞌ tzalaho kokꞌul yu kokolbꞌanil chaqꞌ Komam,» konhchi.
10 Yuto haꞌ isqꞌabꞌ Komam Jahawil chixew yibꞌanh huneꞌ wonhan tiꞌ.
Haxa Moab chixanhobꞌtanhelax bꞌay ayayoj,
hakaꞌ chu isxanhobꞌtanhelax teꞌ chꞌim xol istzaꞌ noꞌ wakax.c
11 Chislenito isqꞌabꞌ Moab tuꞌ, hakaꞌ islenito isqꞌabꞌ hunu mak chimaqꞌni ha haꞌ yet chiꞌaxhni xol haꞌ,
chito yaqꞌ yip ismaqꞌni haꞌ yalni,
yajaꞌ chitanhayo isloloꞌal yebꞌ yip yu Komam.
12 Chistzikobꞌtanhe Komam iskꞌubꞌal Moab,
hunteqꞌan kꞌubꞌ kaw ay yip yebꞌ kaw nahat yekanh;
chiꞌuchkꞌatoj, kat yaykano wuyna sat txꞌotxꞌ.