Isyaꞌtajil chiyati Komam Jahawil yibꞌanh sunil txꞌo txꞌotxꞌ
24
Haꞌ Komam Jahawil chiꞌinilo sunil tzet ayayo sat txꞌo txꞌotxꞌ tiꞌ,kat iskan tzꞌinhno txꞌotxꞌ, kat issomchakanh sunil tzet ay sat txꞌotxꞌ,
kat issajlemito makta ay sat txꞌotxꞌ.
2 Hakaꞌ chu istanhilo anma hak tuꞌ chu istanhpaxilo ebꞌnaj sacerdote,
lahan chu istanhkano naj chejabꞌ yebꞌ yahaw, lahan chu istanhkano ix chejabꞌ yebꞌ ix yahawil,
lahan chu istanhkano naj chitxonhwi yebꞌ naj chiloqꞌwi,
lahan chu istanhkano naj chiqꞌanni hunu tzet ye tuꞌ kꞌamil yebꞌ naj chiꞌaqꞌni kꞌamil,
lahan chu istanhkano naj chiꞌaqꞌni melyu kꞌamil
yebꞌ naj chichahni melyu kꞌamil.
3 Matxa hunu tzet chikan sat txꞌo txꞌotxꞌ tiꞌ;
yuto chiꞌilaxilo sunil tzet ay sat txꞌotxꞌ,
wal xin haꞌ Komam Jahawil chalni hunteqꞌan tzotiꞌ tiꞌ.
4 Xaꞌetaxto txꞌo txꞌotxꞌ tiꞌ, xatanhilo txꞌotxꞌ,
yaꞌay txꞌotxꞌ, xaꞌetaxto sunil yul sat yibꞌanhqꞌinal tiꞌ,
yaꞌejpaxo ay sunil nimeta konhobꞌ kaw ay yelapnoj sat yibꞌanhqꞌinal tiꞌ.
5 Xaꞌetaxto txꞌotxꞌ yu anma ayayo sat txꞌotxꞌ,
yuto ismanhkꞌo anma chejbꞌanile, yetato anma istoholal,
ismanhkꞌon anma huneꞌ tzet tꞌinhbꞌabꞌilkano yu Komam yinh sunilbꞌal ej tiempo.a
6 Yuxin lanhan istanhilo txꞌotxꞌ yu tzꞌaktiꞌ ay yibꞌanh txꞌotxꞌ,
yaypaxo isyaꞌtajil yibꞌanh anma, istanhiloj;
istanhayo isbꞌisil anma ay sat txꞌotxꞌ.
7 Kꞌayilo teꞌ vino, ok isyabꞌil teꞌ uva,
yok bꞌiskꞌulal yinh iskꞌul ebꞌnaj chitzala yanma.
8 Matxa qꞌinh bꞌay chiꞌok pandereta yebꞌ teꞌ arpa,
matxa chiwejcha anma yu tzalahilal.
9 Matxa mak chiꞌukꞌni vino yet chiꞌok bꞌit;
haꞌ vino tuꞌ kaw kꞌaxa chabꞌe yet chiyukꞌni.
10 Yu uchkꞌalaxto sunil konhobꞌ yuxin yekꞌlenalxanhe aykanoj pehikano sunil nha
yuxin machi hunu mak chu yoktoj.
11 Ok anma oqꞌoj yulaj bꞌeh yuto matxa teꞌ vino.
Tanhilo tzalahilal yu bꞌiskꞌulal. Haꞌ tzalahilal elnaxa sat txꞌo txꞌotxꞌ.
12 Haꞌ konhobꞌ uchkꞌalaxtoj, yekꞌkano pakꞌla ispultahil, ispohkantoj.
13 Yuto hak tuꞌ chiyu xolaj konhobꞌ ay sat txꞌo txꞌotxꞌ tiꞌ,
haywanhxanhe anma chikani, chiꞌutelax hakaꞌ isyukxelax teꞌ olivo,
yebꞌ xin lahan chiꞌutelax hakaꞌ yet chiꞌekꞌ saylaxoj
ta matxa teꞌ uva chikankano yet xalahwi yuxlaxilo sat.
14 Haꞌ anma chitokani chiꞌawi yinh kaw yip yu tzalahilal,
kat isbꞌitni yuto yil ebꞌnaj yip Komam Jahawil,
chitaxin apni yel yaw ebꞌnaj bꞌey haꞌ mar yu tzalahilal.
15 Hakpax tuꞌ mak ay bꞌey yetkꞌulal bꞌay chiꞌahilo tzꞌayik, yebꞌ ej konhobꞌ,
ayayo istiꞌ haꞌ mar chiyako ismay Komam Jahawil yu huneꞌ tuꞌ,
chiyaqꞌni bꞌinaho isbꞌi Komam Jahawil, isDiosal Israel.
16 Jabꞌehanh isbꞌitni anma ay islahobꞌal txꞌo txꞌotxꞌ chalni:
«¡Jaqꞌaꞌweko ismay mak tohol!» xhi. Walnihan: «¡Kꞌanchꞌan hinan!
¡Waqꞌaꞌ chiwaqꞌlehan! ¡Mach kꞌulo winhbꞌalan!»
Ebꞌnaj txꞌoj isnabꞌal iswatxꞌe ebꞌnaj istxꞌojal, yinhnhe eleqꞌ chꞌekꞌ yu ebꞌnaj.
17 ¡Haꞌ anma ay sat txꞌo txꞌotxꞌ tiꞌ chiyil nimeta xiwkꞌulal,
chitokꞌay yulaj holan, maka chꞌaykꞌay yul txꞌanh hakꞌ!
18 Haꞌ mak chiꞌelkanh yu xiwkilal chitokano yul nime holan,
haxa mak chikolcha yul nime holan chitzabꞌlaxayo yu txꞌanh hakꞌ,
yuto chihajlax isventanahil yet ha haꞌ chitit satkanh,
kat isnhirnhonkanh yalanhayto txꞌo txꞌotxꞌ.
19 Chibꞌili txꞌotxꞌ yinh kaw ip, kat istzikobꞌtanhelax txꞌotxꞌ sikꞌlebꞌil, kat ishatkanh txꞌotxꞌ.
20 Chiyukyunkanh txꞌotxꞌ hakaꞌ yekꞌtekton ukꞌum,
kat ishekꞌni isbꞌa txꞌotxꞌ hakaꞌ ishekꞌlax hunu pat yul yehobꞌal,
yuto haꞌ ismul anma chiꞌaykꞌay yibꞌanh txꞌotxꞌ;
chiꞌaykꞌaykano txꞌotxꞌ matxa bꞌaqꞌinh chikanh isbꞌa txꞌotxꞌ.
21 Haꞌ yinh huneꞌ tzꞌayikal tuꞌ chiyayo Komam isyaꞌtajil yibꞌanh sunil tzet ay yip
yul satkanh bꞌay kaw nahat yekanh.
Chiyanipaxayo isyaꞌtajil yibꞌanh ebꞌnaj isreyal konhobꞌ
ay sat txꞌo txꞌotxꞌ sat yibꞌanhqꞌinal tiꞌ.b
22 Kat iskutxbꞌalaxiko ebꞌnaj, kat istenbꞌalaxikto ebꞌnaj yul preso,
hakaꞌ chu istenbꞌalaxikto ebꞌnaj presowom yul hunu holan.
Chimajchelax ebꞌnaj, chilahwi yekꞌto txꞌiꞌal tzꞌayik xin,
kat yalaxayo isyaꞌtajil yibꞌanh ebꞌnaj.c
23 Haꞌ ixahaw chitxꞌixwikanh,
kat issomchapaxokanh chiyil tzꞌayik yet chꞌok Komam Dios,
Komam sunil chisje yu, yahawil bꞌey wonhan Sión, haꞌ ton bꞌey Jerusalén.
Yuto kaw nanxa yok ismay yet chꞌok Komam Yahawilal sata ebꞌnaj icham winaj yul konhobꞌ.d