Tzotiꞌ hal-laxkano yibꞌanh Tiro
23
Haꞌ tzotiꞌ tiꞌ hal-laxkano yibꞌanhilo Tiro:¡Hex cheyikꞌo teꞌ barco ay bꞌey Tarsis, chexoqꞌ yu bꞌiskꞌulal,
yuto chiꞌuchkꞌalaxto konhobꞌ Tiro ay istiꞌ haꞌ mar,
matxa hunu nha chikani, nitam bꞌay chiꞌapni teꞌ barco!
Haꞌ huneꞌ tiꞌ, hata bꞌey txꞌotxꞌ Quitim hal-laxkano yu heyohtanheniloj.a
2 ¡Hex ay hex istiꞌla haꞌ mar, yilal heyok tuknoj, yebꞌ hex txonhwom ay bꞌey Sidón,
haꞌ ton hex chechejto heloqꞌwom isqꞌaxebꞌikꞌto haꞌ mar!
3 Chiꞌapni ebꞌnaj loqꞌwom tuꞌ bꞌey Egipto chisloqꞌni ebꞌnaj ixim trigo,
chiꞌel bꞌey istiꞌla haꞌ Nilo, kat istxonhnito ebꞌnaj tet ej nimeta konhobꞌ.
Haꞌ ton yinh tuꞌ xin cheyiqꞌ hemelyu.
4 ¡Hex ah Sidón txꞌixwanhwej!
Yuto hakaꞌta chiyal haꞌ niman mar kaw aykano yip hakaꞌ tiꞌ:
«Machi hunelo tiꞌ pitzkꞌa unin winhan,
machipaxo ebꞌnaj tzehtaj waqꞌ chꞌibꞌojan.
Machipaxo ebꞌix qꞌopotaj waqꞌ chꞌibꞌojan,» xhi haꞌ mar.
5 Hayet chiꞌapni isqꞌumal huneꞌ tiꞌ bꞌey Egipto,
kat yok anma yinh bꞌiskꞌulal yinh tzet yu bꞌey Tiro.
6 Chiyalni: «Ekꞌanhweto bꞌey Tarsis kat heyoqꞌ yu bꞌiskꞌulal hex ay hex istiꞌ haꞌ mar,» xhi.
7 ¿Ham huneꞌ hekonhobꞌ tiꞌ tzalahilalnhetikꞌa yehi
yebꞌ xin payattax huneꞌ konhobꞌ tiꞌ?
¿Tom maxhtaj huneꞌ tiꞌ chibꞌey nahat, kat yehayo yulajla konhobꞌ?
8 ¿Mak nani huneꞌ tiꞌ yinh Tiro, huneꞌ konhobꞌ yet ebꞌnaj rey yehi?
Haꞌ ebꞌnaj txonhom ay bꞌey tiꞌ yahaw konhobꞌ ebꞌnaj,
haꞌ ebꞌnaj txonhom tiꞌ kaw aykano yelapno ebꞌnaj sat yibꞌanhqꞌinal tiꞌ.
9 Haꞌ huneꞌ tiꞌ, haꞌ Komam Yahawil yinh sunil halni,
yu istanhilo isloloꞌal ebꞌnaj kaw ay yelapnoj,
kat yilaxilo ispixan ebꞌnaj kaw ay yip yul sat yibꞌanhqꞌinal tiꞌ.
10 Ekꞌanhweto bꞌey hetxꞌotxꞌ hex ix ah Tarsis,
aqꞌlewekꞌto hebꞌa hakaꞌ chu yel ha haꞌ yul isbꞌeh yuto matxa heyip tinanh.
11 Yato Komam Jahawil isqꞌabꞌ yibꞌanh haꞌ mar, yaqꞌni bꞌilokanh sunil konhobꞌ,
yalni Komam tato chiꞌuchkꞌalaxto sunil cuartel ay yul ismajul Canaán.
12 Yalni Komam tet iskutzꞌin ebꞌnaj ah Sidón:
«Hex ix ah Sidón, hex kaw xaheyaqꞌle isyaꞌtajil, matxa chextzalahi.
Ahanhwewanoj, kat heyekꞌto bꞌey Quitim,b
haꞌ bꞌey tuꞌ xin matxa bꞌay chexok xewoj.»
13 ¡Ilweto istxꞌotxꞌ ebꞌnaj ah Caldea!c
Haꞌ ton huneꞌ konhobꞌ tiꞌ, bꞌejbꞌilkano yu ebꞌnaj ah Asiria.
Yehobꞌalxa noꞌ xoltelajil noqꞌ yehi. Watxꞌebꞌilkanh torre,
yaj yuchkꞌayo ebꞌnaj nime nha, yuchkꞌanayo sunil.
14 ¡Hex cheyikꞌo teꞌ barco ay bꞌey Tarsis,
oqꞌanhwe yu bꞌiskꞌulal,
yuto uchkꞌabꞌilxato huneꞌ konhobꞌ ayko yipo hekꞌul!
15 Haꞌ yinh huneꞌ tiempohal, chinahulnhelaxkanto konhobꞌ Tiro yulbꞌal 70 (lahonhebꞌ iskanhwinaj) habꞌil, hakaꞌ istiempohal chꞌok hunu naj rey yul yehobꞌal. Haxa yet xaꞌekꞌto 70 (lahonhebꞌ iskanhwinaj) habꞌil tuꞌ, kat isbꞌitnhen ebꞌnaj ah Tiro huneꞌ bꞌit chibꞌitnhelax yinh ebꞌix txꞌoj ye iswiꞌ, bꞌay chal hakaꞌ tiꞌ:
16 «Hex ix txꞌoj ye hewiꞌ xakexnahulnhelaxtoj,
iweti hunu teꞌ arpa, kat hehoyni konhobꞌ, kaw kꞌul chu heyaniko hebꞌit,
yebꞌ xin txꞌiꞌal el cheyakoj, yu henalaxpaxti hunelxa,» xhi.
17 Hayet xaꞌekꞌto 70 (lahonhebꞌ iskanhwinaj) habꞌil tuꞌ, kat istuklenpaxo Komam Jahawil konhobꞌ Tiro tuꞌ hunelxa, kat istxonhwipaxo tet ej hunteqꞌanxa konhobꞌ; kat iswatxꞌenpaxo tzet chiyoche iskꞌul, yebꞌ sunil konhobꞌ ay sat yibꞌanhqꞌinal tiꞌ. 18 Yajaꞌ haꞌ ismelyu chischah yinh istxonh tuꞌ yet Komam Jahawil chukoj, mach chiskꞌubꞌatoj. Haꞌ ismelyu ebꞌnaj chiyiqꞌ tuꞌ chꞌaqꞌlax tet ebꞌnaj ischejabꞌ Komam Jahawil, yu iswaꞌ ebꞌnaj masanto kaw chinoh iskꞌul, kat isqꞌaptzen isbꞌa yinh kaw kꞌul.