Tzotiꞌ yibꞌanhilo akꞌal bꞌay chiyelax tzet nabꞌil yu Komam Jahawila
22
Haꞌ tzotiꞌ tiꞌ hal-laxkano yinh akꞌal bꞌay chiyelax tzet nabꞌil yu Komam Jahawil.¿Tzet cheyaqꞌle yuxin hesunil chexahto yibꞌanh yakꞌalil heyatut?
2 Toxanhe chexwejcha yu tzalahilal,
xanhe chisomchato yul hewiꞌ yu heqꞌinh.
Haꞌ heyet konhobꞌ xakami, maxhtaj yu espada maka xol howal kami.
3 Sunil ebꞌnaj heyahaw hun yu yelkanh tet teꞌ litꞌ,
tzabꞌlaxayo ebꞌnaj iskꞌalbꞌalaxayoj,
sunil ebꞌnaj winaj ay yul konhobꞌ elkanh nahat,
hun yu iskꞌal-laxpaxayo ebꞌnaj.b
4 Yu huneꞌ tiꞌ yuxin walan:
«Matzet cheyal wetan yu chinoqꞌan sikꞌlebꞌil,
mach cheyako yinh hekꞌul heyaqꞌni yaqꞌlobꞌal inkꞌulan yu inbꞌiskꞌulalan
yu isyaꞌtajil ayayo yibꞌanh inkonhobꞌan,» quinchihan.
5 Yuto haꞌ Komam Yahawil, kaw aykano yip,
chiyati istzꞌayikal bꞌay chiꞌahwejna anma yu xiwkilal,
kat yul isyaꞌtajil kat issomchakanh isnabꞌal anma ay bꞌey akꞌal
bꞌay chiyelax tzet nabꞌil yu Komam.
Chiyuchkꞌanayo Komam iskꞌubꞌal konhobꞌ, chiꞌapni yel yaw anma iswiꞌla witz.
6 Haꞌ ebꞌnaj ah Elam yiqꞌ ebꞌnaj isqꞌojbꞌal islitꞌ, yok ebꞌnaj yul carruaje,
yahpaxto ebꞌnaj winaj yet howal yibꞌanh cheh,
hakpax tuꞌ konhobꞌ Kir yiqꞌ yescudo chipahni litꞌ.c
7 Haꞌ sunil yakꞌalil hekonhobꞌ kaw saqꞌal jilni,
nohna yu carruaje yet howal, haxa ebꞌnaj chiyaqꞌ howal ayahto yibꞌanh cheh
iswatxꞌe ebꞌnaj iscampamento sata istiꞌ ispultahil konhobꞌ.
8 Haꞌ tzet chikolni Judá ilaxiloj,
haꞌ yinh huneꞌ tzꞌayikal tuꞌ heyako henabꞌal yinh chꞌen yet howal kꞌuwan yul nha,
bꞌey isqꞌebꞌtala Líbano.d
9 Heyilni tato txꞌiꞌal isholanil iskꞌubꞌal iskonhobꞌ yaꞌ David aykoj,
henohtzen pila ayko yalanh tuꞌ.
10 Hebꞌisni hanta teꞌ nha ay bꞌey Jerusalén,
heyuchkꞌanayo hunteqꞌan teꞌ nha tuꞌ,
yokniko chꞌen chꞌen ayko yich teꞌ yipomalo hekꞌubꞌ.
11 Haꞌ xolbꞌal kabꞌebꞌ chꞌen kꞌubꞌ, hewatxꞌe kꞌuh bꞌay chiꞌetxi ha haꞌ
ay yul icham estanque watxꞌina yettax payat,
yajaꞌ mach ekꞌ henabꞌal yinh mak watxꞌen sunil tiꞌ, machipaxo yelapno mak watxꞌenhe tiꞌ yul hesat.
12 Yuxin haꞌ Komam Yahawil yinh Sunil,
haꞌ yinh huneꞌ tzꞌayik tuꞌ kexyawte yu heyoqꞌi, cheyilni bꞌiskꞌulal,
cheyinilo xil hewiꞌ, cheyaniko xilqꞌape yet bꞌiskꞌulal teyinh.
13 Yajaꞌ wal tinanh tzalahilal heyehi, yebꞌ qꞌinhnhetikꞌa heyehi,
chepotxꞌni noꞌ wakax yebꞌ noꞌ meꞌ hekꞌuxuꞌ,
chekꞌuxni chibꞌe tuꞌ cheyukꞌni vino, cheyalni hakaꞌ tiꞌ:
«Waꞌojonhwej, kat jukꞌnipaxo vino, yuto kꞌuxantaxka kamomonhxa hekal,» kexchi.
14 Haꞌ Komam Yahawil kaw aykano yip, halniko yinh intxikinan hakaꞌ tiꞌ:
«Haꞌ ismul ebꞌnaj tiꞌ machi nimankꞌulal yinh yul insatan,
haꞌ ismul ebꞌnaj tiꞌ chiꞌaqꞌnikamoj,» xhi Komam Dios Jahawil.
Chiꞌalaxiko naj Eliaquim selelo naj Sebna
15 Haꞌ Komam Yahawil yinh sunil, chihalni hakaꞌ tiꞌ:
«As il naj Sebna naj tesorero, naj yilomal yinh tzet ay naj rey, chawalni tet naj:
16 “¿Tzet ay hawu bꞌey tiꞌ? maka ¿mak halni tawet ta chu hawatxꞌen bꞌay chaxhmuji bꞌey tiꞌ,
hakaꞌ mak chiwatxꞌen bꞌay chimuji bꞌay nahat yekanh,
maka hakaꞌ mak chiwatxꞌen bꞌay chimuji yul iskꞌul chꞌen nime chꞌen?
17 Haꞌ Komam Jahawil chachanoto preso yul hunuxa nan konhobꞌal bꞌay chawil isyaꞌtajil,
yinh kaw yeli chiyaqꞌako yenhel hasat.
18 Chachisqꞌojto Komam yinh sunil yip, hakaꞌ hunu pelota,
nahat chachisqꞌojto bꞌey huneꞌ txꞌotxꞌ kaw niman yekoj,
ha tuꞌ chachkami, haꞌ tuꞌ chiꞌapnipaxo hacarruaje ayko hamayoj.
Haꞌ tuꞌ chitxꞌixwikanh ebꞌnaj ay yul yatut naj rey, naj hawahawil.
19 Hak tiꞌ chu yalni Komam Jahawil tawet:
‘Chachwilojan yul hawehobꞌal tiꞌ, chachintirilojan yinh hamunil,’ xhi.
20 Haꞌ yinh huneꞌ tzꞌayik tuꞌ chiwawtetijan naj Eliaquim inchejabꞌan, iskꞌahol yaꞌ Hilcías.
21 Haꞌ xil haqꞌap chawakoj, haꞌ chiwakojan yinh naj,
chiwanikojan hacincho yinh yikta naj, chiwanikojan hamunil yul isqꞌabꞌ naj,
kat yok naj mamehal yinh anma ay bꞌey Jerusalén, yebꞌ yinh anma ay bꞌey Judá.
22 Chiwanikojan islawehal yatut yaꞌ David yul isqꞌabꞌ naj Eliaquim tuꞌ;
hayet chishajni naj pulta machi mak chu ispebꞌani,
haxa yet chispebꞌan naj pulta, machi mak chu ishajni.
23 Kaw kꞌul chiwutekanikojan naj yinh ismunil tuꞌ,
hakaꞌ hunu lawuxh maqꞌbꞌilayto yinh iskꞌul bꞌitzꞌabꞌ kaw kaw,
hak tuꞌ xin chꞌokkano naj ismayo yatut ismam.
24 Haꞌ naj tuꞌ chiꞌok yipo iskꞌul yebꞌ ismayo yuninal ismam yebꞌ iskꞌahol yebꞌ yuninal iskꞌahol,
hakaꞌ chu isnahatli chꞌen vaso, txꞌotxꞌ xi,
yebꞌ xhalu chilokbꞌalaxkanh yinh chꞌen lawuxh maqꞌbꞌilayto yinh iskꞌul bꞌitzꞌabꞌ.
25 Chalni Komam Yahawil yinh Sunil,
haꞌ chꞌen lawuxh kaw kꞌul yu ismaqꞌlaxayto yinh iskꞌul bꞌitzꞌabꞌ,
chihokꞌlaxiltij, kat yaykꞌay sat txꞌotxꞌ, kat isqꞌahtoj,
kat ispohkanto sunil tzet lokan yinh chꞌen tuꞌ,” kachi,»
yuto hak tuꞌ yalni Komam Jahawil.