Tzotiꞌ yibꞌanhilo yet chiꞌaykꞌay Babilonia
21
Tzotiꞌ hal-laxkano yinh txꞌotxꞌ desierto ay istiꞌ haꞌ mar.Hakaꞌ kajtuxkum chiꞌekꞌ bꞌey txꞌotxꞌ Neguev,
hak tuꞌ chu istit kuybꞌanile bꞌey txꞌotxꞌ desierto bꞌay ay xiwkilal kaw ay ismay.
2 Haꞌ tzet isye Komam Dios wilaꞌan kaw xiwkilta jilni:
Haꞌ mak chinani istxꞌojal, haꞌ istxꞌojal tuꞌ chiswatxꞌe,
haxa ebꞌnaj chiqꞌoji yinh hunteqꞌanxa konhobꞌ, ayto konhobꞌ chetapaxto ebꞌnaj.
Hex ah Elam, asiꞌwe yinh howal, haxa hex ah Media,
haꞌ Komam chiꞌaqꞌni tanho isyaꞌtajil chiyaqꞌle huneꞌ konhobꞌ tuꞌ.a
3 Kaw yaꞌ istel wichinhan chiwabꞌehan, kaw bꞌiskꞌulal eliko inkꞌulan yu isyaꞌil;
kaw ayayo isyaꞌil wibꞌanhan, hakaꞌ isyaꞌil yet chiwatxꞌi iskꞌul ix ix, hak tuꞌ wehan.
Kaw bꞌiskꞌulal eliko inkꞌulan yu tzet wabꞌehan, inxiwkanhan yu tzet wilan.
4 Kaw sukbꞌilo inkꞌulan, wiqꞌnikanojan xiwkilal yu tzetaj wilan,
kaw saqꞌaltikꞌa yekꞌ hunun aqꞌbꞌal wilaꞌan,
yajaꞌ wal tinanh xin xiwkilal wehan.
5 Iswatxꞌeyo ebꞌnaj mexha, yalaxayo qꞌap yibꞌanh mexha tuꞌ,
yok ebꞌnaj waꞌoj, chukꞌni tzet chukꞌu, yok huneꞌ aw, yalni hakaꞌ tiꞌ:
«¡Hex yahaw soldado, ahanhwewanoj,
watxꞌewe hebꞌa yebꞌ heyescudo!» xhi.
6 Yuto haꞌ Komam Dios,
Jahawil halni wetan hakaꞌ tiꞌ:
«Asiꞌ, kat hawaniko hunu naj majwawom yu yalni naj yinh tzet chiyila.
7 Tato chiyil naj istit carruaje nhikꞌbꞌil yu kakꞌonh noꞌ cheh,
maka anma ayahto yibꞌanh noꞌ burro maka yibꞌanh noꞌ camello,
kaw kam chil naj mak anmahil chuli,» xhi Komam.
8 Haꞌ naj majwawom tuꞌ el yaw naj hakaꞌ yel yaw noꞌ bꞌalam, yalni naj:
«Haꞌ bꞌay chinmajwatiꞌan, Mamin,
ayinnhetikꞌakojan hunun tzꞌayik yebꞌ sunilbꞌal aqꞌbꞌal inmajwahan.
9 Haꞌ tinanh xin chiwilan hunteqꞌan ebꞌnaj yibꞌanh cheh,
katawanh yiqꞌni isbꞌa ebꞌnaj chiꞌekꞌ yibꞌanh cheh tuꞌ,» xhi naj.
Lahwi tuꞌ yalnipaxo naj hakaꞌ tiꞌ:
«Xaꞌaykꞌay Babilonia, xaꞌaykꞌay Babilonia;
haꞌ sunil istioxh ayko isdiosaloj xapohkantoj,
xaxitmokanto sat txꞌotxꞌ,» xhi naj majwawom tuꞌ.b
10 Abꞌewe hex wet konhobꞌ, hex kexxanhlaxikꞌo yu Babilonia,
hakaꞌ isxanhlaxikꞌo ixim trigo yet chiwatxꞌelaxilo ixim,
lanhan walnihan teyet tzet mawabꞌehan,
yinh tzet mayal Komam Jahawil wetan, Komam Yahawil kaw aykano yip, isDiosal Israel.
Tzotiꞌ hal-laxkano yibꞌanh konhobꞌ Edom
11 Haꞌ tzotiꞌ tiꞌ hal-laxkano yibꞌanhilo konhobꞌ Duma:c
Ay huneꞌ mak chiꞌawiti wetan bꞌey Seir, chalni:
«Hach majwawom, ¿hantato issajbꞌiloj?
Hach majwawom ¿hantato issajbꞌiloj?» xhi.
12 Intaqꞌwihan hakaꞌ tiꞌ:
«Lanhanxa issajbꞌiloj, yajaꞌ chiꞌokpaxo aqꞌbꞌal hunelxa.
Ta chawoche haqꞌambꞌeꞌ hunelxa, meltzohanh,
kat haqꞌambꞌeni,» kinchihan.
Tzotiꞌ hal-laxkano yibꞌanhilo Arabia
13 Haꞌ tzotiꞌ tiꞌ hal-laxkano yibꞌanhilo Arabia:
«Hex txonhwom ah Dedán, hex chiꞌekꞌ aqꞌbꞌal heyu xolaj qꞌebꞌtaj bꞌey Arabia.
14 Elanhweti hechabꞌ makta chitaj istiꞌ, cheyaqꞌni haꞌ yukꞌuꞌ.
Haxa hex ah Tema elanhweti heyaqꞌaꞌ tzet chislo makta lanhan yelkanh,
15 yuto lanhan yelkanh tet chꞌen espada, chꞌen kaw ay ye,
yebꞌ tet litꞌ kꞌulxa yehi toxanhe chiqꞌojlaxtoj.
Haꞌ hunteqꞌan anma tuꞌ lanhan yelkanh tet howal,
howal kaw how yaqꞌni,» xhi.
16 Yuto haꞌ Komam Jahawil halni wetan hakaꞌ tiꞌ: «Haꞌ yinh huneꞌ habꞌil tinanh, hakaꞌ chu yok naj munlawom isbꞌisno hayebꞌ ixahaw ismunil, hak tuꞌ chu istanhkanilo sunil ismay konhobꞌ Cedar. 17 Haywanhxanhe ebꞌnaj ah Cedar, ebꞌnaj yet howal chiqꞌojnito litꞌ chikani,» yuto haꞌ Komam Jahawil, isDiosal Israel chihalni.