Chal-laxkanoj ta chiꞌaykꞌay Egipto yebꞌ Etiopía yu Asiria
20
Haꞌ yinh istiempohal yet ischejnito naj Sargón, isreyal Asiria iscomandante yebꞌ issoldado yanoko howal yinh konhobꞌ Asdod, qꞌoji ebꞌnaj yinh.a 2 Istzotel Komam Jahawil tet yaꞌ Isaías, iskꞌahol yaꞌ Amoz yinh huneꞌ tzꞌayik tuꞌ, yalni hakaꞌ tiꞌ: «Asiꞌ, kat hawinilo xil haqꞌap ayko tawinh, kat hawinipaxilo haxanhabꞌ yinh hawoj,» xhi Komam. Isyijen yaꞌ Isaías tzet yal Komam, yinilo yaꞌ xil isqꞌap, haxanhe yul iswex yaꞌ aykoj, machipaxo isxanhabꞌ yaꞌ aykoj yet yekꞌi.3 Yalnipaxo Komam Jahawil hakaꞌ tiꞌ: «Hakaꞌ yu yekꞌ yaꞌ Isaías, inchejabꞌan yulbꞌal oxebꞌ habꞌil yinh yet machi xil isqꞌap yebꞌ machi isxanhabꞌ, yu isyenilo tet Egipto yebꞌ tet Etiopía, 4 ta hak tuꞌ chu yinito naj rey asirio ebꞌnaj Egipto yebꞌ ebꞌnaj Etiopía preso bꞌey Asiria. Chiꞌilaxto ebꞌnaj tzehtaj yebꞌ ebꞌnaj ichamta winaj preso, machi xin xil isqꞌap aykoj yebꞌ machi xanhabꞌ, tꞌilan isyutz ebꞌnaj, yu yel ispixan ebꞌnaj Egipto. 5 Anma haꞌ Etiopía ayko yipo iskꞌul, yebꞌ anma chikawxi iskꞌul yinh Egipto, chixiwkanh kat istxꞌixwikanh yilni tzet chꞌelkanikoj. 6 Haꞌ yinh huneꞌ tzꞌayikal tuꞌ chiyal sunil anma ay istiꞌla haꞌ mar hakaꞌ tiꞌ: “Ilwe tzet yukano konhobꞌ ayko yipo kokꞌul, konhobꞌ bꞌay chijiyo kobꞌa yu kokolcha tet naj rey Asiria. Wal tinanh xin ¿tzet chu kokolni kobꞌa hanhonh tiꞌ?” xhi anma,» xhi Komam.