Tzotiꞌ yibꞌanhilo Egipto
19
Haꞌ hunteqꞌan tzotiꞌ tiꞌ hal-laxkano yibꞌanhilo Egipto:Aykanh Komam Jahawil yibꞌanh huneꞌ moyan kaw yinh anhe chibꞌelwi chito bꞌey Egipto;
haꞌ hunteqꞌan istioxh Egipto chikꞌuykꞌunkanh sata Komam,
kat ispaxilo yip yanma ebꞌnaj Egipto tuꞌ yu xiwkilal.a
2 Chalni Komam Jahawil hakaꞌ tiꞌ:
«Chiwakojan howal xol ebꞌnaj Egipto yebꞌ yet Egiptohal.
Haꞌ ebꞌnaj yuxhta isbꞌa chiyaqꞌlekanh howal,
chiyaqꞌlenkanh ebꞌnaj howal yebꞌ yet anmahil,
chiyaniko huneꞌ konhobꞌ howal yinh hunxa konhobꞌ,
chiyaqꞌlenpaxokanh howal nimeta konhobꞌ yebꞌ hunxa nimeta konhobꞌ.
3 Haꞌ ishelanil ebꞌnaj Egipto tuꞌ chitanhiloj,
kat wetantojan isnabꞌal ebꞌnaj;
chisqꞌambꞌen isbꞌa ebꞌnaj tet istioxh, yebꞌ tet ebꞌnaj nawal,
yebꞌ tet ebꞌnaj chisqꞌambꞌe isbꞌa tet ispixan kamom,
yebꞌ tet ebꞌnaj ahbꞌelom.
4 Chiwanikojan ebꞌnaj Egipto yul isqꞌabꞌ huneꞌ naj rey kaw how yebꞌ kaw machiswalil,
chiyiqꞌnikanh yip naj yibꞌanh ebꞌnaj,»
xhi Komam Jahawil, Yahawil yinh sunil.
5 Chipaxayo haꞌ mar,
kat ispaxpaxayo haꞌ Nilo chꞌel yojomal, kat istajkanh haꞌ.
6 Chipaxayo yojomal ha haꞌ, kat istajkanh ha haꞌ ay yulaj kꞌuh.
Chitzokꞌlaxkanh teꞌ junco yebꞌ teꞌ ah.
7 Sunil teꞌ ah ay istiꞌla haꞌ Nilo yebꞌ sunil yaxla telaj
yebꞌ sunil tzꞌunubꞌ ay istiꞌla haꞌ chitajiloj kat iskꞌaykanh.
8 Ebꞌnaj iqꞌomahti kay bꞌiskꞌulal chiꞌelkaniko iskꞌul ebꞌnaj sunil,
kat yoqꞌpaxo sunil ebꞌnaj chiꞌanayto chꞌen anzuelo iqꞌomahti kay,
kat iskꞌuykꞌunkanh ebꞌnaj chiꞌanayto txꞌanh hakꞌ xol haꞌ yu bꞌiskꞌulal.
9 Chisomchakanokanh isnabꞌal ebꞌnaj chichemni qꞌap lino,
qꞌap kaw kꞌul yebꞌ ebꞌnaj watxꞌem hakꞌ,
10 yuto haꞌ sunil txꞌanh ishakꞌ ebꞌnaj tuꞌ chilijmo txꞌanh,
kat yiqꞌnipaxokanh bꞌiskꞌulal ebꞌnaj pohcham kay.
11 Yinh kaw yeli haꞌ ebꞌnaj yahaw konhobꞌ Zoán machi isnabꞌal ebꞌnaj,
haxa ebꞌnaj chiꞌaqꞌni kuybꞌanile tet naj faraón,
matxa tzet chalilo kuybꞌanile chaqꞌ ebꞌnaj tuꞌ.
¿Chimyu yalni ebꞌnaj tet naj Faraón hakaꞌ tiꞌ?
«Hanhonhtiꞌanh yuninal ebꞌnaj winaj kaw ay isnabꞌal jehanh,
yebꞌ xin yuninal ebꞌnaj yettax payat jehanh,» xhim ebꞌnaj, ¡Machoj!
12 ¿Bꞌaytuꞌwal ay hunteqꞌan ebꞌnaj kaw ay isnabꞌal chimunla takꞌatanh tinanh?
Yalabꞌ ebꞌnaj tawet yu hawohtanhenilo tzet nabꞌilxa yu Komam yinh Egipto,
Komam Yahawil yinh sunil.
13 Haꞌ ebꞌnaj yahaw konhobꞌ Zoán matxa tzet chal yelapno isnabꞌal ebꞌnaj,
haxa ebꞌnaj yahaw konhobꞌ Menfis xasubꞌcha ebꞌnaj,
haꞌ ebꞌnaj yahawil xol yuxhtaj tuꞌ xin, xasubꞌchapaxo Egipto yu ebꞌnaj.
14 Haꞌ Komam Jahawil aqꞌni somchahokanh isnabꞌal ebꞌnaj,
yaqꞌni subꞌchaho ebꞌnaj Egipto iswatxꞌen sunil tzetaj ye tuꞌ mach kꞌuloj yu iskꞌaytoj.
Chipax yip Egipto hakaꞌ yekꞌtekton naj ukꞌum yet chixabꞌi.
15 Machi hunu mak chu iskolnilo Egipto, nitam ebꞌnaj iswiꞌehal,
nitam ebꞌnaj oje qꞌabꞌe yehi, nitam ebꞌnaj isnhe yekano chu iskolniloj.
16 Haꞌ yinh huneꞌ tzꞌayik tuꞌ sunil ebꞌnaj Egipto lahan chute isbꞌa hakaꞌ ebꞌix ix, yuto chikꞌuykꞌunkanh ebꞌnaj kat isxiwkanh ebꞌnaj yilni yinikanh Komam isqꞌabꞌ yinh ebꞌnaj, Komam Yahawil yinh sunil. 17 Kaw chixiwkanh ebꞌnaj Egipto tet ebꞌnaj ah Judá; hayet chisnaniti ebꞌnaj Egipto Judá tuꞌ kat isxiwkanh ebꞌnaj yu tzet nabꞌilxa yinh ebꞌnaj yu Komam Yahawil yinh sunil. 18 Haꞌ yinh huneꞌ tiempohal tuꞌ ay howebꞌ konhobꞌ bꞌey Egipto chitzotelkanh yinh abꞌxubꞌal yet Canaán, haꞌ hunteqꞌan konhobꞌ tuꞌ chꞌaqꞌni bꞌinaho isbꞌi Komam Yahawil yinh sunil. Haꞌ xol hunteqꞌan konhobꞌ tuꞌ ay huneꞌ konhobꞌ Herez isbꞌi.
19 Hayet huneꞌ tiempohal tuꞌ chiꞌalaxkanh huneꞌ ismexhahil yet xahanbꞌal tet Komam Jahawil sat txꞌotxꞌ Egipto, kat istenbꞌalaxkanh chꞌen chꞌen tet Komam yul ismohonal ismajul Egipto yu isnahlaxti Komam. 20 Haꞌ hunteqꞌan tuꞌ chiyeniloj tato ay mak chiyiyo isbꞌa tet Komam bꞌey txꞌotxꞌ Egipto, Komam Yahawil yinh sunil, yuto chisqꞌan anma tuꞌ ta chikolwa Komam yu iskolnilo tet ebꞌnaj chiꞌaqꞌni ekꞌoyaꞌ, chischejniti Komam iskolomal yebꞌ yahawil anma tuꞌ yu iskolniloj.b 21 Chiyaqꞌ yohtanhelo isbꞌa Komam tet ebꞌnaj Egipto tuꞌ, kat yohtanhenilo ebꞌnaj Komam yinh huneꞌ tzꞌayik tuꞌ. Chaqꞌni ebꞌnaj isxahanbꞌal yebꞌ isyebꞌalqꞌabꞌ tet Komam, chistaqꞌwenkaniko ebꞌnaj yibꞌanh kat yok isyijeno tzet chal Komam. 22 Chiyati Komam huneꞌ niman isyaꞌtajil yibꞌanh Egipto, lahwi tuꞌ kat yanhtenpaxo Komam Egipto, kat ismeltzoko yul isqꞌabꞌ Komam. Chitzꞌaykanh iskꞌul Komam yinh Egipto, chiyanhtenpaxoj.
23 Haꞌ yinh huneꞌ tzꞌayik tuꞌ ay huneꞌ bꞌeh chitit bꞌey Egipto masanta chiꞌapni bꞌey Asiria, kat istit ebꞌnaj asirio bꞌey Egipto, kat istopaxo ebꞌnaj Egipto bꞌey Asiria; chiyinayo isbꞌa ebꞌnaj Egipto yebꞌ ebꞌnaj asirio tet Komam.
24 Haꞌ yinh huneꞌ tzꞌayik tuꞌ haꞌ Israel chiꞌok yetbꞌiho Egipto yebꞌ Asiria; yu oxebꞌ konhobꞌ tuꞌ yuxin chiyayo Komam Jahawil isyaxil yibꞌanh sunil sat yibꞌanhqꞌinal tiꞌ. 25 Yuto haꞌ Komam Yahawil aykano yip, chiꞌanayo iskꞌulal yibꞌanh hunteqꞌan konhobꞌ tuꞌ, chiyalni hakaꞌ tiꞌ: «Haꞌ Egipto inkonhobꞌan, kaw kꞌulkano yet, haxa konhobꞌ Asiria haninan watxꞌenhe, haxa Israel inmajulan yehi,» xhi Komam.