Tzotiꞌ hal-laxkano yibꞌanhilo Etiopía
18
¡Kꞌanchꞌan huneꞌ niman konhobꞌ bꞌay kaw chibꞌili xikꞌ noꞌ nixhte noqꞌ,akonhobꞌ ay yintalto ha haꞌ yet Etiopía.b
2 Konhobꞌ chischejto ischejabꞌ yibꞌanh haꞌ mar.
Haꞌ teꞌ junco watxꞌelaxayo barcohal,
yul teꞌ ok ebꞌnaj, isto ebꞌnaj yibꞌanh ha haꞌ!
Hex chejabꞌ hex tiꞌ, chexto yinh anhe,
asiꞌwe bꞌey konhobꞌ bꞌay ay ebꞌnaj winaj kaw nimej istel yebꞌ chisulsun sat,
tet ebꞌnaj kaw chixiw anma tet, tet ebꞌnaj kaw ay yip yebꞌ kaw kꞌul yinh howal.
Ebꞌnaj ay bꞌey txꞌo txꞌotxꞌ pohkilta yehayo yu haꞌ nime haꞌ.
3 Sunil hex, ay hex yulaj konhobꞌ ay sat yibꞌanhqꞌinal tiꞌ
cheyil yalaxkanh qꞌap bandera iswiꞌla witz,
kat heyabꞌen yoqꞌ chꞌen trompeta,
4 yuto yal Komam Jahawil wetan hakaꞌ tiꞌ:
«Hata bꞌay ay hinan chinmujlitijan yinh ebꞌnaj,
matzet xin chiwalan, tonhe tukan hinan hakaꞌ yay yoj tzꞌayik yet lahwi yaqꞌnikanilo nhabꞌ,
yebꞌ hakaꞌ moyan chiꞌanayo yal chew yet kaw ay qꞌaꞌ yet istzꞌayikal chihatxꞌlaxkanh sat tzꞌunubꞌ.
5 Yet xaꞌekꞌto isxumakil teꞌ uva yet xakan sat teꞌ, kat isqꞌanbꞌilo teꞌ,
yajaꞌ hayet yalanhto maxhto chiꞌuxlax teꞌ,
kat istzokꞌlaxilo isqꞌabꞌ teꞌ yebꞌ nixhte ischon teꞌ.
6 Kat isbꞌejlaxkano teꞌ sunil,
chislonito noꞌ chꞌik yebꞌ noꞌ xoltelajil noqꞌ sunil teꞌ tuꞌ,
haꞌ bꞌey tuꞌ xin chikan noꞌ chꞌik yulbꞌal waresma,
yebꞌ noꞌ xoltelajil noqꞌ ay sat txꞌo txꞌotxꞌ yulbꞌal nhabꞌil,» xhi Komam.
7 Hayet huneꞌ tiempohal tuꞌ chiꞌilaxti yebꞌalqꞌabꞌe tet Komam Jahawil kaw aykano yip.
Huneꞌ konhobꞌ tuꞌ ay ebꞌnaj winaj kaw nimej istel,
yebꞌ chisulsun sat, ebꞌnaj kaw chixiw anma tet,
ebꞌnaj kaw ay yip yebꞌ kaw kꞌul yinh howal.
Ebꞌnaj ay bꞌey txꞌo txꞌotxꞌ pohkilta yehayo yu haꞌ nime haꞌ.
Haꞌ isyebꞌalqꞌabꞌ ebꞌnaj tuꞌ, chiyito ebꞌnaj bꞌey wonhan Sión,
bꞌay chibꞌina isbꞌi Komam Jahawil kaw Aykano Yip.