Tzotiꞌ hal-laxkano yibꞌanhilo Damasco
17
Haꞌ hunteqꞌan tzotiꞌ tiꞌ hal-laxkano yibꞌanhilo Damasco:«Haꞌ niman konhobꞌ Damasco matxa konhobꞌo chukanoj,
yuto chiꞌuchkꞌalaxayoj, huneꞌxanhe niman tenan chukano isqꞌalemal.a
2 Haꞌ hunteqꞌan konhobꞌ yul ismajul Aroerb chibꞌejlaxkano yu anma;
haxa no noqꞌ chꞌekꞌ lowo bꞌey tuꞌ, chikan noꞌ meꞌ wayo aqꞌbꞌalil,
matxa mak chixibꞌten noꞌ.
3 Matxa hoyaniko iskꞌubꞌal yinh iskonhobꞌ Efraín, hakpax tuꞌ konhobꞌ Damasco matxa yip.
Wal anma, aytoko yul konhobꞌ Siria lahan hakaꞌ ebꞌnaj Israel,
matxapaxo yip ebꞌnaj,» xhi Komam Yahawil yinh sunil.
Isyaꞌtajil chitit yibꞌanh Israel
4 Haꞌ yinh huneꞌ tzꞌayik tuꞌ chitanhilo ismay ebꞌnaj yuninal yaꞌ Jacob,
kat iskꞌaykanh isqꞌalomal, hakaꞌtanhe chibꞌajbꞌayoj, kat istanhilo isbꞌaqꞌichal.
5 Lahan chiyukano ebꞌnaj Israel hakaꞌ txꞌotxꞌ chibꞌejlaxkano yet xakꞌuplaxkanh ixim trigo yu naj kꞌupom trigo,
kat isyachbꞌan naj iswiꞌ ixim.
Lahanpaxo hakaꞌ yet xaꞌekꞌ anma issikꞌaꞌkanh iswiꞌ ixim
yet lahwi iskꞌuplaxkanh ixim bꞌey akꞌal Refaim.
6 Haxanhe ixim chito nahul chikankanoj.
Lahanpaxo hakaꞌ yet chiyukxelax teꞌ olivo,
kabꞌ oxebꞌxanhe sat chikankano xolaj isqꞌabꞌ yinh iswiꞌ,
maka haxanhe kanhebꞌ maka howebꞌ sat chikan yinh sunil isqꞌabꞌ.
Haꞌ huneꞌ tiꞌ, haꞌ Komam Jahawil, isDiosal Israel halnikanoj.
7 Haꞌ yinh huneꞌ tzꞌayik tuꞌ chꞌok tꞌanhno anma yinh Komam Dios,
Komam watxꞌen anma, chiyiliko anma yinh Komam yu isbꞌaqꞌ sat,
Komam kaw machi nino istxꞌojal, Komam isDiosal Israel.
8 Matxa chitꞌanhxiko anma yinh ismexhahil yet xahanbꞌal,
huneꞌ watxꞌebꞌil yu isqꞌabꞌ, matxa chikawxipaxo iskꞌul yinh tzetaj watxꞌebꞌil yu,
yebꞌ yinh yechel tioxh Asera, yebꞌ yinh yechel tzꞌayik.
9 Haꞌ yinh huneꞌ tzꞌayikal tuꞌ, kaw hayebꞌxanhe konhobꞌ ayko iskꞌubꞌal chikankanoj,
hakaꞌ kabꞌ oxebꞌ teꞌ lobꞌehal chikankano xolaj isqꞌabꞌ yinh iswiꞌ.
Hakaꞌ yu istzꞌinhlokano hunteqꞌan konhobꞌ yet yelkanh anma yu xiwkilal tet ebꞌnaj Israel,
hak tuꞌ chu iskan tzꞌinhnahi.
10 Yuto henahulnheto Komam Dios, Komam hekolomal,
machi xin henati Komam, Komam hakaꞌ hunu chꞌen niman chꞌen chꞌok heyenheloj,
yu iskolwa teyinh.
Wal xin chetzꞌun teꞌ qꞌebꞌtaj kꞌulejchꞌan jilni;
chetzꞌunnipaxo teꞌ uva chitit nan konhobꞌal.
11 Waxanhka chichꞌibꞌnakanh teꞌ yinh huneꞌ tzꞌayik,
kat isxumakli teꞌ yinh sahabꞌ sakꞌayal yet hunxa tzꞌayik,
yajaꞌ nabꞌanhe sat teꞌ tuꞌ yet chihul istzꞌayikal isyaꞌtajil,
yebꞌ yet cheyabꞌen bꞌiskꞌulal yu isyaꞌil isyaꞌtajil.c
12 ¡Kꞌanchꞌan ej konhobꞌ tuꞌ, xanhe chiꞌel yaw hakaꞌ jabꞌen isbꞌili haꞌ mar!
¡Kꞌanchꞌan ej nime konhobꞌ chiꞌah wejlahi, chiꞌawi hakaꞌ isbꞌili haꞌ nimeta haꞌ!
13 Waxanhka kaw ay ismay isbꞌili istit konhobꞌ,
hakaꞌ ishaxon txꞌiꞌal haꞌ nimeta haꞌ; yajaꞌ chikachwa Komam Dios yinh ej konhobꞌ tuꞌ,
kat yelkanh nahat yu xiwkilal, chisajlemito hakaꞌ yijlaxto matzꞌik yu jaqꞌeqꞌ,
maka hakaꞌ chu yijlaxto pojoj yu kajtuxkum.
14 Hayet qꞌejbꞌiyal kaw ay ismay jilni ebꞌnaj chihul aqꞌno howal jinh,
yajaꞌ haxa yet sahabꞌ sakꞌayalil xin xatanhilo sunil ebꞌnaj.
Hak tuꞌ chu istanhkanilo ebꞌnaj chonhxanhobꞌtanheni;
hak tuꞌ yinhbꞌal ebꞌnaj chiꞌelqꞌanto tzetaj ayonh.