16
Hex ah Sela ay bꞌey txꞌotxꞌ desiertoaweti noꞌ meꞌ tet ebꞌnaj yahaw konhobꞌ bꞌey wonhan Sión.
2 Hakaꞌ chu isxiwto noꞌ chꞌik kat isbꞌejnikano noꞌ yatut,
hak tuꞌ chu yelkanh ebꞌix ix ah Moab bꞌay kawil yehati yich haꞌ Arnón.
3 Chiyalni ebꞌnaj ah Moab tet ebꞌnaj ah Sión hakaꞌ tiꞌ:
«Lahtiꞌnhewe hebꞌa yinh tzet chu konhhekolnihanh, watxꞌewe istoholal jinhanh;
lahanojabꞌ cheyuko jenhelojanh hakaꞌ yenhel hunu te teꞌ yet chumanil,
haꞌ heyenhel tuꞌ qꞌejholojabꞌ jilni hakaꞌ yet aqꞌbꞌalil.
Chebꞌanto anma chꞌelkanh yul iskonhobꞌ,
mach cheyalilo anma tonhe chꞌekꞌ kolohi.
4 Ehojabꞌayo anma Moab konhobꞌan tekꞌatanh,
anma elnakanh yul iskonhobꞌ ebꞌawelo tet naj chiꞌochen istanhtzeniloj,» xhi ebꞌnaj.
Yuto haꞌ naj chꞌaqꞌni ekꞌoyaꞌ yanma anma chitanhilo naj,
haꞌ naj chitanhtzenilo ej konhobꞌ, chitanhilo naj;
haꞌ naj chixanhobꞌtanhen anma chikꞌaytzelaxilo naj sat txꞌo txꞌotxꞌ tiꞌ.
5 Ay huneꞌ yikꞌal yaꞌ David chꞌok yahawilal, chixin tzꞌay iskꞌul yinh anma,
haꞌ istzꞌonhobꞌal bꞌay chꞌaqꞌ yahawilal chitꞌinhbꞌalaxkanoj,
chiyilni yinh tzet chꞌeliko anma yinh istoholal,
yuto hanhe istoholal chiswatxꞌe.a
6 Abꞌebꞌilxa juhanh hanta isloloꞌal anma ah Moab,
haꞌ anma tuꞌ kaw ekꞌnaxa isloloꞌal,
kaw chiyikanh isbꞌa yebꞌ xin kaw nime anma chute isbꞌa,
yajaꞌ haꞌ isleqꞌtiꞌal tuꞌ, mach chinahatli.
7 Yuxin haꞌ sunil anma Moab tuꞌ chꞌoqꞌ yinh iskonhobꞌ,
kat yiqꞌni niman bꞌiskꞌulal yu matxa chiyil teꞌ uva chitit bꞌey Kir-hareset.
8 Haꞌ tzꞌunubꞌ ay bꞌey txꞌotxꞌ Hesbón tanhtzelaxiloj;
haꞌ ebꞌnaj yahawilal nime konhobꞌ
isxanhobꞌtanhe ebꞌnaj ischayanil sat teꞌ uva kaw ay yal bꞌey Sibma,
haꞌ isqꞌabꞌ teꞌ tuꞌ xatikꞌa apni bꞌey Jazer, isto lekꞌo istxam teꞌ sat txꞌotxꞌ desierto,
isto lekꞌo istxam teꞌ uva tuꞌ yapni teꞌ istiꞌ haꞌ mar.
9 Yuxin chinoqꞌan yu bꞌiskꞌulal yuto matxa teꞌ uva chꞌel bꞌey Jazer yebꞌ bꞌey Sibma,
chꞌaypaxo yal insatan yinh Hesbón yebꞌ yinh Eleale;
yuto haꞌ xolaj sat tzꞌunubꞌ bꞌey tuꞌ chꞌel aw yu howal.b
10 Haꞌ bꞌay ay txꞌo txꞌotxꞌ kaw kꞌul chꞌilaxilo tzalahilal,
haꞌ xolaj teꞌ uva matxa mak chibꞌitni, matxa mak chitzalapaxoj,
matxa chixanhlaxilti yal teꞌ uva yu ebꞌnaj xanhom uva.
Intanhtzelojan aw yet tzalahilal yinh ebꞌnaj xanhomilti yal uva tuꞌ.
11 Kaw bꞌiskꞌulal chꞌeliko inkꞌulan yu Moab hakaꞌ isbꞌiskꞌulalil yok teꞌ arpa,
chiqꞌnipaxo bꞌiskꞌulal wanmahan yu Kir-hareset.
12 Waxanhka kaw chisikilo anma Moab
yu isto yinoyo isbꞌa bꞌey huneꞌ txꞌotxꞌ kaw nahat yekanh,
kat isto txahlo yul yatut istioxh, yaj nabꞌaxanhe, matxa tzet chaliloj.
13 Haꞌ hunteqꞌan tzotiꞌ tuꞌ yal Komam Jahawil yinh Moab yet yalanhto tuꞌ. 14 Yajaꞌ wal tinanh chitzotelpaxo Komam, chalni hakaꞌ tiꞌ:
«Hayet oxebꞌ habꞌil tinanh,
hakaꞌ chu isbꞌisni hunu naj munlawom istiempohal yinh ismunil,
hak tuꞌ chu istanhilo iskꞌulchꞌanil Moab;
haꞌ anma Moab tuꞌ kaw niman isbꞌisil, yajaꞌ chitanhiloj.
Haꞌ haywanhxa mak chikankano tuꞌ, kaw matxa yip,» xhi Komam.