Tzotiꞌ hal-laxkano yinh txꞌotxꞌ Moab
15
Haꞌ hunteqꞌan tzotiꞌ tiꞌ hal-laxkano yinh txꞌotxꞌ Moab.Yinh kaw yeli yinhnhe huneꞌ aqꞌbꞌal uchkꞌalaxto konhobꞌ Ar ay yul ismajul Moab;
haꞌ konhobꞌ Ar tuꞌ tzꞌintzꞌonkanoj.
Yinh kaw yeli yinhnhe huneꞌ aqꞌbꞌal uchkꞌalaxto konhobꞌ Kir ay yul ismajul Moab,
haꞌ konhobꞌ Kir tuꞌ kaw tzꞌintzꞌonpaxkanoj.
2 Yahto anma oqꞌo bꞌey Bayit, yebꞌ bꞌey Dibón bꞌay kaw nahat yekanh,
yok oqꞌoj; yokpaxo anma ah Moab oqꞌo yinh Nebo yebꞌ yinh Medeba.
Yinilo sunil ebꞌnaj winaj xil iswiꞌ yebꞌ xil istiꞌ yu bꞌiskꞌulal.
3 Ayko xil isqꞌap yet bꞌiskꞌulal yet chꞌekꞌ yulaj bꞌeh.
Sunil anma chꞌel yaw yinh kaw ip yibꞌanh yakꞌalil yatut yebꞌ yulaj txonhbꞌal,
chiyaniko yul isnuqꞌ yoqꞌi yu bꞌiskꞌulal.
4 Chꞌelpaxo yaw anma ah Hesbón yebꞌ anma ah Eleale, chisqꞌanni kolwal,
chitaxin apni yul isnuqꞌ bꞌey konhobꞌ Jahaza,
yuxin sunil ebꞌnaj yet howal bꞌey Moab chꞌel yaw,
kat yoqꞌ yanma hunun ebꞌnaj tuꞌ yu bꞌiskꞌulal.
5 Kaw chitzꞌay inkꞌulan yinh ebꞌnaj ah Moab,
haꞌ anma ah Moab chiꞌelkanh chitaapnikano bꞌey Zoar,
chꞌelkanh hakaꞌ yelkanh noꞌ nixhte wakax oxebꞌ habꞌil.
Chꞌoqꞌ yet chiꞌahto yinh istzalanil Luhit,
kat yel yaw yu isyaꞌtajil yet chito yul isbꞌelal Horonaim.
6 Ha haꞌ ay bꞌey Nimrim, chitajkanh haꞌ,
kat istajilo sunil teꞌ telaj yebꞌ iswol te teꞌ,
haꞌ sunil te teꞌ yax chitajkaniloj.
7 Yuxin haꞌ isqꞌalomal anma kꞌuwan yu,
yito yet yelkanh yekꞌto xol teꞌ sauce istiꞌla nixhte haꞌ.
8 Haꞌ sunil istiꞌla ismohonal txꞌotxꞌ Moab abꞌelax yel yaw anma yu bꞌiskꞌulal,
chitaapni yel yaw bꞌey Eglaim, yabꞌelaxpaxo yel yaw bꞌey Beer-elim.
9 Ha haꞌ ay bꞌey Dimón chissomchato haꞌ yebꞌ chikꞌ,
yajaꞌ machnhetaj tuꞌ ayto hunteqꞌanxa nimeta isyaꞌtajil chiwayojan yibꞌanh Dimón.
Haꞌ anma Moab chikolchalo xol howal, haꞌ noꞌ bꞌalam chikꞌuxnitoj,
yebꞌpaxo anma chitokankano sat txꞌotxꞌ, haꞌ noꞌ chikꞌuxnitoj.