Chibꞌuchlax isreyal Babilonia
14
Chisye Komam Jahawil iskꞌulchꞌanil iskꞌul yinh ebꞌnaj Israel hunelxa, yuxin chissikꞌkaniko Komam ebꞌnaj yu yokkano iskonhobꞌoj. Chito ebꞌnaj ehoyo sat istxꞌotxꞌ hunelxa. Haxa anma nan konhobꞌal xin chiꞌapnipaxo ehoyo xol ebꞌnaj yikꞌal yaꞌ Jacob tuꞌ, kat yok konhobꞌal yinta ebꞌnaj.a 2 Tzetkꞌa hunteqꞌan konhobꞌ chiꞌok kolwal yinh ebꞌnaj Israel, yet chimeltzo ebꞌnaj bꞌey iskonhobꞌ, kat istit hunteqꞌan anma tuꞌ yinta ebꞌnaj. Chiꞌokkano xin anma tuꞌ ischejabꞌoj ebꞌnaj Israel, sat txꞌotxꞌ istxꞌotxꞌ Komam Jahawil. Hunteqꞌan anma inito ebꞌnaj Israel preso yet yalanhtokanoj, kat yokpaxo ebꞌnaj Israel yahawilo ebꞌnaj, hunteqꞌan anma aqꞌni ekꞌoyaꞌ ebꞌnaj Israel yet yalanhtokanoj.3 Hex Israel, haꞌ istzꞌayikal bꞌay chexyaqꞌ xewo Komam Jahawil yinh hemunil, yebꞌ yet matxa bꞌaytet chexxiwi yet xakexkolchaloj chejabꞌo bꞌay kaw chexaqꞌlax ekꞌoyaꞌ. 4 Cheyalni huneꞌ helan tzotiꞌ tiꞌ yinh naj isreyal Babilonia hakaꞌ tiꞌ:
«¡Tzimi yu istanhkanilo huneꞌ naj aqꞌni ekꞌoyaꞌ yanma anma!
¡Tzimi yu istanhilo huneꞌ niman konhobꞌ kaw ochemiko oro!
5 Qꞌahto isqꞌojoch ebꞌnaj txꞌoj isbꞌeybꞌal yu Komam Jahawil,
isqꞌahpaxto isqꞌojoch ebꞌnaj yahawil yu Komam.
6 Haꞌ ton naj tuꞌ aqꞌni howal yinh konhobꞌ yinh sunil ishowal,
naj machi bꞌejni yaqꞌni ekꞌoyaꞌ yanma anma, naj tuꞌ ok yahawilo yinh ej konhobꞌ,
yetan anma, istzumbꞌenikꞌo anma yu sunil ishowal.
7 Sunil anma ay sat txꞌo txꞌotxꞌ xewi yebꞌ aqꞌankꞌulal yehi,
bꞌitni yu tzalahilal.
8 Hakpax tuꞌ teꞌ tzꞌisis yebꞌ teꞌ cedro ay bꞌey Líbano
kaw chitzala teꞌ yu kach aqꞌlax aykꞌayoj,
hakaꞌto chiyal teꞌ hakaꞌ tiꞌ:
“Hataxtikꞌa yet isqꞌoji ebꞌnaj tawinh,
matxa mak konhhultzꞌoknoyojanh,” xhi teꞌ.
9 Haꞌ kambꞌal yalanh txꞌotxꞌ xiwkanh tawet,
yinilo iswayanh kamom, yahwanoj kach ischahni,
yahpaxowano ebꞌnaj yahaw konhobꞌ tzꞌonhan yul isxhila kach ischahnoj.
10 Sunil ebꞌnaj tuꞌ chiꞌahwi yinh kaw ip, chalni ebꞌnaj:
“¿Tom haꞌ hun hachpaxo hach tiꞌ mapaxilo hawip hakaꞌ hanhonhtiꞌanh?
¿Tom lahan kach elkaniko hakaꞌ honhtiꞌanh?
11 Hayet payxa chaxhilaxkanh yu haloloꞌal, alaxiko teꞌ arpa tawinh;
haxa tinanh xin ayach yul kambꞌal tiꞌ, yibꞌanh noꞌ ha haꞌ chachwayi,
kat isnohiko noꞌ yinh hanimanil,” xhi ebꞌnaj kamom tuꞌ.
12 ¡Tzet chawaqꞌle yuxin kach titkꞌay yul satkanh,
Lucero hach, chaxhtzejtzoni, sajbꞌes yet sahabꞌ sakꞌayal!
Hach hawaqꞌ lektahoj ej nimeta konhobꞌ, kach qꞌojlaxayti sat txꞌotxꞌ.b
13 Hak tiꞌ hatxumni hakaꞌ tiꞌ: “Chinahtojan satkanh, bꞌay kaw nahat yekanokanh,
chinwatxꞌenan intzꞌonhobꞌalan iskawilal istxꞌumel Komam Dios,
haꞌ bꞌey tuꞌ chinaytzꞌonhnojan bꞌey wonhan bꞌay chiskutxbꞌa isbꞌa yinh yetkꞌulal norte.
14 Chinahtojan bꞌay kaw nahat yekanh yibꞌanh moyan,
hak tuꞌ xin lahan chinelikojan hakaꞌ Komam Dios,
kaw niman yelapnoj,” kachi.
15 Yajaꞌ xin kach qꞌojlaxayto yul kambꞌal
yul xabꞌ kaw nahat yich.c
16 Haꞌ mak chachilni chiꞌay kꞌonhnoj,
kat kam istꞌanhxiko tawinh, chiyalni hakaꞌ tiꞌ:
“¿Tom haꞌ huneꞌ naj winaj tiꞌ, haꞌ naj xabꞌilen txꞌo txꞌotxꞌ,
haꞌ naj aqꞌni somchahokanh nimeta konhobꞌ?
17 ¿Ham naj tiꞌ meltzoniko sunil sat yibꞌanhqꞌinal tiꞌ desiertohal?
¿Tom naj tiꞌ tanhtzenilo txꞌiꞌal konhobꞌ,
yebꞌ xin haꞌ ebꞌnaj ayko preso yu naj, maxhtikꞌa bꞌejtzolaxilo ebꞌnaj?
18 Haꞌ sunil ebꞌnaj isreyal nime konhobꞌ lanhan isxew ebꞌnaj
yul ispantionh kaw nanxa islowi.
19 Wal hach xin mach chachalaxikto yul panteón,
wal xin hakaꞌ hunu isqꞌabꞌ te teꞌ matzet chiꞌoknikoj;
chachqꞌojlaxto hakaꞌ isqꞌojlaxto xil isqꞌap kamom anma tejbꞌil yu chꞌen espada;
qꞌojbꞌilayto yich nimeta xabꞌ, kat haxanhobꞌtanhelaxi hakaꞌ isnimanil kamom anma.
20 Machi hach yul panteón hakaꞌ yalaxikto isnimanil ebꞌnaj rey yul ispantionh,
yuto hawetato hatxꞌotxꞌ, hawaqꞌnikamo anma ay yul hakonhobꞌ.
Haꞌ yuninal ebꞌnaj txꞌoj matxa bꞌaqꞌinh chiꞌaqꞌlax bꞌinahoj.
21 Haꞌ ebꞌnaj kꞌahole chimaqꞌlaxkamo ebꞌnaj yu istxꞌojal ismam,
yunhe mach chiꞌahwano ebꞌnaj kat ischahni ebꞌnaj txꞌo txꞌotxꞌ,
yebꞌ yunhe mach chinohilo sat yibꞌanhqꞌinal tiꞌ yu ebꞌnaj,» xhi.
22 Chiyalni Komam Yahawil yinh sunil:
«Chinahlemnahan yinh ebꞌnaj. Chintanhtzelojan Babilonia,
matxa chibꞌinahi, matxa mak chikani;
matxa ebꞌnaj kꞌahole chikani nitam iskꞌahol ebꞌnaj kꞌahole tuꞌ.
23 Chixiw anma yilni Babilonia tuꞌ,
hakaꞌ ha haꞌ panhan tzꞌotzꞌewlaj, haxanhe noꞌ pop chiꞌekꞌi,
chintanhtzelojan hakaꞌta chintzꞌisilojan yu tzꞌisbꞌal,» xhi Komam Jahawil.
Tzotiꞌ halbꞌilkano yibꞌanhilo yinh tzet chu istanhtzelaxilo Asiria
24 Haꞌ Komam Yahawil yinh sunil, chꞌaqꞌni bꞌinaho isbꞌi, chalni hakaꞌ tiꞌ:
«Yinh kaw yeli haꞌ tzet xaꞌekꞌ yinh innabꞌalan chiyij isbꞌa,
haꞌ tzet xawalan masan chuhi.
25 Chintanhtzelojan ebꞌnaj asirio ay sat intxꞌotxꞌan
chinxanhnayojan ebꞌnaj sat intxꞌotxꞌan ay bꞌey wonhan wetan yehi.
Chiwilojan isyaꞌtajil ayayo yibꞌanh inkonhobꞌan yu ebꞌnaj,
chiwinilojan yalil ijatz yibꞌanh iswixikꞌ ebꞌnaj inkonhobꞌan,» xhi Komam.
26 Haꞌ huneꞌ tiꞌ halbꞌilxa yinh sunil txꞌo txꞌotxꞌ,
yebꞌ xin leyanilto isqꞌabꞌ Komam Jahawil yibꞌanh sunil konhobꞌ yu istanhtzeniloj.
27 Yuto haꞌ Komam Jahawil kaw aykano yip halnikanoj,
¿mak xin chu iskachwa yinh Komam? Haꞌ xin isqꞌabꞌ lehantoj,
¿mak chiyu yalni tet tato chismeltzo isqꞌabꞌ?
Tzotiꞌ hal-lax yinh konhobꞌ Filistea
28 Haꞌ ishabꞌilal bꞌay kam yaꞌ rey Acaz yalni Komam Dios hunteqꞌan tzotiꞌ tiꞌ:
29 «Hex nime konhobꞌ Filistea, mach chextzalahi yu maqꞌahto iskꞌax mak chachmaqꞌni,
yuto haꞌ yinh yikꞌal hunu noꞌ komon labꞌa, chipitzkꞌa huneꞌ noꞌ icham,
huneꞌ noꞌ howla labꞌa aykanh sat txꞌotxꞌ chiꞌekꞌi.
30 Haꞌ anma kaw mebꞌaꞌkanoj chiꞌaqꞌlax tzet chislo,
haꞌ anma yaꞌta chꞌekꞌ yu, chꞌok wayo yinh aqꞌankꞌulal,
yajaꞌ wal hex filisteo hex tiꞌ chintanhtzelojan hexeꞌ yu wahil,
haxa heyikꞌal chikankano texol xin, chintanhtzelojan.
31 Hex filisteo okanhwe yinh bꞌiskꞌulal,
elojabꞌ heyaw yu isyaꞌtajil kat heluylunkanh yu xiwkilal,
yuto haꞌ yinh yetkꞌulal norte chitit huneꞌ niman hakaꞌ qꞌej moyan,d
machi hunu ebꞌnaj chꞌel yinh istxolal yet chibꞌelwi.
32 ¿Tzet xin chu istaqꞌwelax tet ebꞌnaj chejbꞌilti yu nime konhobꞌ?
Halwe tet ta haꞌ Komam Jahawil watxꞌen konhobꞌ Sión;
haꞌ bꞌey tuꞌ xin chiskol isbꞌa anma chiꞌilni isyaꞌtajil xol iskonhobꞌ Komam,» xhi Komam.